گيزا پيراميداسىنان جاسىرىن ءدالىز تابىلدى - فوتو
ەجەلگى الەمنىڭ جەتى كەرەمەتىنىڭ ىشىنەن جالعىز ساقتالعان حەوپس پيراميداسى دەگەن اتپەن تانىمال ۇلى گيزا پيراميدالارى تۋرالى جاڭالىق Scan Pyramids جوباسى اياسىندا جاسالدى. بۇل جوبا بويىنشا 2015 -جىلدان باستاپ قۇرىلىمنىڭ ىشىنە «ۇڭىلۋگە» مۇمكىندىك بەرەتىن 3D- مودەلدەۋ، ەندوسكوپ، سونداي-اق ينۆازيۆتى ەمەس ينفراقىزىل تەرموگرافيا تەحنولوگياسى پايدالانىلادى.
«پيراميدانى زەرتتەۋ كەزىندە ۇزىندىعى 9 مەتر، ەنى 2,1 مەتر بولاتىن ءدالىز تابىلدى، بۇل جوبانىڭ جۇمىسى 2015 -جىلدان بەرى جۇرگىزىلىپ كەلەدى»، - دەپ حابارلادى ەگيپەتتىڭ تۋريزم جانە كونە زاتتار ءمينيسترى احمەد يسسا.
«اياقتالماعان ءدالىز پيراميدانىڭ سالماعىن شامامەن 7 مەتر جەردە ورنالاسقان نەگىزگى كىرەبەرىستىڭ اينالاسىنا نەمەسە باسقا، ءالى اشىلماعان كامەراعا نەمەسە كەڭىستىككە قايتا ءبولۋ ءۇشىن جاسالعان بولۋى مۇمكىن. ءبىز ونىڭ استىنان نەمەسە ءدالىزدىڭ سوڭىنان الدەنە تابا الامىز با دەگەن سۇراققا جاۋاپ بەرۋ ءۇشىن سكانەرلەۋدى جالعاستىرامىز. پيراميدانىڭ باسقا بولىگىندەگى پاتشا جەرلەنگەن كامەرانىڭ ۇستىندەگى 5 بولمە ۇلكەن قۇرىلىمنىڭ سالماعىن قايتا ءبولۋ ءۇشىن سالىنعان دەپ ەسەپتەلەدى. فاراوننىڭ بىرنەشە جەرلەۋ كامەراسى بار بولۋى مۇمكىن. الداعى ايلاردا بىزگە ءدالىزدىڭ ارتىندا نە تۇرعانىن ايتادى»، - دەدى ەگيپەت كونە زاتتار جوعارعى كەڭەسىنىڭ باسشىسى موستافا ۆازيري پيراميدا الدىندا ۇيىمداستىرىلعان باسپا ءسوز كونفەرەنسياسىندا.
عالىمدار ءدالىزدىڭ بار ەكەنىن رادار مەن ۋلترادىبىس ارقىلى تەكسەردى، كەيىنىرەك پيراميدا تاستارىنداعى كىشكەنتاي عانا بۋىن ارقىلى 6 ميلليمەترلىك ەندوسكوپتى ەنگىزىپ، ونىڭ سۋرەتىنە قول جەتكىزدى.
ەگيپەت تاريحشىسى ءارى ارحەولوگى زاكي حاۆاس بۇل قازىرگى زامانداعى حەوپس پيراميداسىمەن بايلانىستى ەڭ ماڭىزدى جاڭالىقتاردىڭ ءبىرى ەكەنىن مالىمدەدى.
2017 -جىلى Scan Pyramids زەرتتەۋشىلەرى 19-عاسىردان قالعان العاشقى ءىرى قۇرىلىم - ۇلى پيراميدا ىشىندە كەمىندە 30 مەتر بولاتىن بوس كەڭىستىك انىقتالعانىن مالىمدەگەن بولاتىن.
ۇلى پيراميدا ءبىزدىڭ زامانىمىزعا دەيىنگى شامامەن 2560 -جىلدارى حۋفۋ نەمەسە حەوپس فاراون باسقارعان كەزدەرى سوعىلعان. 146 مەترلىك ۇلى پيراميدا 1889 -جىلى پاريجدەگى ەيفەل مۇناراسى سوعىلعانعا دەيىن ادام قولىمەن جاسالعان الەمدەگى ەڭ بيىك قۇرىلىم بولدى.
