سپورت الەمىندەگى ءتۇرلى-ءتۇرلى قىزىقتار
ويىندى كورگەندەردىڭ ايتۋىنشا، وسى امالدان سوڭ تارتىپسىزدىك جوقتىڭ قاسى بولدى دەيدى.
مىلقاۋعا ءتىل بىتىرگەن قازى
بۇل ەرەكشە قىزىق وقيعانى 1967-جىلى تۋنيستەگى ءبىر ستاديونعا جينالعان كورەرمەندەر كورىپتى. تورەشى ويىن بارىسىندا ءبىر ويىنشىنى الاڭنان قۋۋعا شەشىم قابىلدايدى. سويتسە، ويىننان قۋىلعان فۋتبولشى جاستايىنان سويلەۋ قابىلەتىنەن ايىرىلعان ەكەن. قازىنىڭ بۇل شەشىمىنە قاتتى نارازىلىق ءبىلدىرىپ، اشۋلانعان ول كەنەتتەن سويلەپ كەتەدى. ءتارتىپ بۇزعانىنىڭ ۇستىنە ءوزىنىڭ بالاعات سوزدەر ايتۋىن توقتاتپاعان ول تورەشىنىڭ شەشىمىمەن الاڭنان قۋىلادى. سول كەزدەسۋدە ول الاڭنان قۋىلعانىنا اسا قاتتى وكىنە قويماعان ەدى. ويتكەنى ول بۇدان بىلاي سويلەي الاتىن بولدى.
بارىنە بىردەي «قىزىل قاعاز»
كوپ كەزدەسە بەرمەيتىن وقيعانىڭ ءبىرى يسپانيانىڭ 2-ليگاسىنداعى «سان يسيدرو» مەن «وليمپيكو كاررانتە» كەزدەسۋىندە بولادى. ويىننىڭ اياقتالۋىنا 3 مينۋت قالعاندا تورەشىلىككە نارازى بولعان ەكى كوماندانىڭ اياقدوپشىلارى جينالىپ، تورەشىنى قورشاپ، نارازىلىقتارىن بىلدىرەدى. سول ساتتە تورەشى ەش ساسپاستان «قىزىل قاعازدى» ويىنعا قاتىسقان بارلىق 22 ويىنشىعا كورسەتىپ شىعادى. وسىلايشا ويىن اياقتالعان.
تۇمانداعى شىتىرمان
اعىلشىن فۋتبولىنىڭ قىستىگۇنگى جاعدايى ەلگە ءمالىم. تريبۋنانى دا، الاڭدى دا تۇمان باسادى دا تۇرادى. وسىنداي جاعدايدا وتكەن ءبىر ويىندا ەسەپ 3:3 بولىپ تىركەلەدى. ءبىراق شابۋىلشى دجوردج ودس «مەن بۇل ويىندا 5 گول سوققانىمدى انىق بىلەمىن، ءبىراق ولاردىڭ قاي قاقپاعا كىرگەنىن بايقاماپپىن» دەيدى. سونداي-اق وسى ويىننىڭ سوڭىندا بەلگىلى بولعانداي، تورەشىلەر بۇل كەزدەسۋگە ءار كوماندادان 18 فۋتبولشىدان قاتىسقانىن دا بايقاماي قالىپتى.
باسپەن سوعىلعان پەنالتي
شىنىمەن-اق ەرەكشە سوعىلعان پەنالتيدى 1971-جىلى تامىزدا پولتوۆالىق «سترويتەل» ويىنشىسى الەكساندر مولودەسكي سوعادى. گول يەسىنىڭ ءوزى: «مەن جۇگىرىپ كەلدىم دە ەڭكەيىپ بارىپ قوزعالماي تۇرعان دوپتى باسپەن سوقتىم. گول! دوپ وڭ جاق تومەنگى بۇرىشقا ءتۇسىپتى» - دەيدى. ءيا، بۇل گولدى كوزگە ەلەستەتۋدىڭ ءوزى قيىن. بۇل جايت تاريحتا راسىندا تىركەلگەن ەكەن.
11مەترلىكتەن ءوز قاقپاسىنا
بۋكسحايمداعى (گەرمانيا) فۋتبول ويىنىندا تورەشى 11 مەترلىك ايىپ دوبىن بەلگىلەيدى. بۇعان البەتتە نارازى بولعان اياق دوپ شەبەرلەرى تورەشىگە قىسىم كورسەتەدى. الاي-بۇلاي جالىنىپ سۇراعانىمەن، تورەشى ءوز شەشىمىن وزگەرتپەي، دوپتى نۇكتەگە قويادى. وسى كەزدە قارسىلىق ءبىلدىرۋشى ءبىر قورعاۋشى دوپتى ءبىر تەبەدى، ول ءدال بارىپ قاقپاعا كىرىپ كەتەدى. ال تورەشى دىم بولماعانداي گولدى ساناپ، ەسەپ اشىلعانىن بىلدىرەدى. بۇل ءوز قاقپاسىنا پەنالتيدەن سوعىلعان گول الەمدىك فۋتبول تاريحىندا ازىرگە جالعىز بولسا كەرەك.
ءۇي قاماۋىنداعى جانكۇيەر
جەكسەنبى كۇندەرىنىڭ بىرىندە يتاليانىڭ كامپوس قالاسىنىڭ ءورت ءسوندىرۋ بولىمىندە دابىل قاعىپ ءورت سوندىرۋشىلەر مەجەلى جەرگە كەلەدى. ءبىراق ەشقانداي وت، ءتۇتىننىڭ ءيىسى شىقپايدى. كەنەت 2-قاباتتان «قۇتقارىڭدار، ءورت!» دەگەن داۋىس شىعادى. تەز ارادا داۋىس شىققان تەرەزەگە ساتى قويىلىپ، ءۇي ىشىندەگى ادام امان-ەسەن جەرگە تۇسەدى. ءاي-شايعا قاراماعان ول ستاديونعا جۇگىرە جونەلەدى. سويتسە، ول دجوۆاني كرۋيزارونىڭ ويىنىن ءسۇيىپ كورەتىن جانكۇيەر بولىپ شىعادى. بۇگىنگى ماڭىزدى ويىننان قالماۋ ءۇشىن امال جوق وسىنداي ارەكەتتەرگە بارادى. ويتكەنى وسى فۋتبولعا جىبەرمەۋ ءۇشىن ايەلى ونى سىرتىنان كىلتتەپ كەتكەن ەكەن. ءار جەكسەنبى سايىن فۋتبولدان قالمايتىن ول، بۇل جولى دا ايەلىنەن ءوز ايلاسىن اسىرادى.
ەڭ سوراقى گول
«سپارتا» (روتەردام) قورعاۋشىسىنىڭ «بارسەلوناعا» 1973- جىلى سوققان دوبىن ماماندار ءدال وسىلاي اتاعان ەكەن. ويتكەنى ول ءوز قاقپاسىنان قاۋىپتىڭ بەتىن قايتارامىن دەپ، دوپتى اۋەگە تەۋىپ جىبەرەدى. قاتتى سوققان جەلدىڭ اسەرىنەن دوپ جارىلىپ، ءدال «بارسەلونانىڭ» قاقپاسىنا تۇسەدى. تورەشى دوپتى ايىرباستاپ، فۋتبولشىلاردىڭ قارسىلىعىنا قاراماستان، گولدى ساناعان ەكەن.
پوليسەيلەر فۋتبولى
برازيليانىڭ «كاكوۆا» فۋتبول كلۋبى جاقسى ونەر كورسەتىپ، كوزگە تۇسىسىمەن ءى ءى م شەشىم قابىلداپ، كوماندانى تاراتىپ جىبەرەدى. نەگە دەسەڭىز، كوماندا ساپى كىلەڭ پوليسەيلەردەن قۇرالادى. ولار وزدەرىنىڭ نەگىزگى مىندەتىن اتقارۋدان گورى فۋتبولعا تىم اۋەس بولىپ كەتكەن دەسەدى. ال ولاردىڭ جانكۇيەرلەرى پوليسەي كيىمىمەن ستاديونعا كەلىپ، تريبۋنانى ءبىر تۇسپەن ادەمى قىلىپ كورسەتەدى. قوشەمەتتىڭ بۇل ەرەكشە ءتۇرى بۇرىن-سوڭدى بولماعان. سول كەزدەردەگى باسىلىمداردىڭ جازۋىنشا قالادا قىلمىس كوبەيىپ كەتكەنمەن، ستاديونداعى ءتارتىپ ۇلگى الارلىقتاي بولىپتى-مىس.
«جىرتىق» قاقپاشى
بريتان ارالىنداعى ريدينگ اتتى قالانىڭ فۋتبول كومانداسىنىڭ قاقپاشىسى دجيممي تەيلوردىڭ ويىنىنا كوپ ادام نارازى بولادى. ءبىر ماۋسىمدا وتكىزگەن 27 ويىندا ول 456 دوپ جىبەرىپ ۇلگەرگەن. ورتاشا ەسەپپەن العاندا ءبىر ويىندا - 17 گول.
دوپ ۇستاماعان قاقپاشى
50-جىلداردىڭ سوڭىندا وزىندىك رەكوردپەن «يۋگوردەن» (ستوكگولم) كومانداسىنىڭ قاقپاشىسى ەرەكشەلەنەدى. ونىڭ كومانداسى ءبىر ويىندا 18:0 ەسەبىمەن جەڭىپ، قاقپاشىعا بىردە-ءبىر رەت دوپ ۇستاتپاپتى. ويىنعا قاقپادان قوسقان دوپتىڭ ەكەۋىن دە دوپتىڭ ارتىنان جۇگىرگەن قورعاۋشى تەۋىپتى.
4 كوماندا، 44 ويىنشى، 2 دوپ
بۇل ەرەكشە ويىن 1959- جىلى گەلزەنكيرحەندە (فرگ) بولعان. ستاديون اكىمشىلىگى بايقاۋسىزدا قول دوبى شەبەرلەرى مەن فۋتبولشىلاردى ءبىر كۇنگە، ءبىر ۋاقىتقا شاقىرىپ قويادى. ال ەندى الاڭدا كىم وينايتىنىن شەشۋ ءۇشىن ەكى كوماندا قىزۋ تارتىسقا تۇسەدى. اقىرى كەلىسىم تاپپاي، ءتورت كوماندا دا الاڭعا شىعىپ، ويىنعا كىرىسەدى. بۇل ءبىرتۇرلى ويىندا ەرتەڭگى شىققان گازەتتەردە: «وسىنشاما قيىن جاعدايدا وتكەن ويىندار ايتەۋىر سوڭىنا دەيىن جەتتى» دەپ جازدى. گاندبولشىلاردىڭ ەسەبى 14:2 بولىپ تىركەلسە، فۋتبولشىلار 4:2 دەگەن ناتيجەمەن تارقاسادى. گاندبولدان ۇتىلعان كوماندا ويىن سوڭىنان شاعىم تۇسىرەدى. ال ويىندى كورگەن جانكۇيەر قاۋىم ماۋسىمنىڭ مۇنداي ەرەكشە ويىنىن كورگەندەرىنە ەش وكىنبەگەن.
گرەكياداعى سوراقى گول
1978- جىلعى گرەكيا بىرىنشىلىگىندە ونەر كورسەتكەن «ەتنيكوس» فۋتبول كلۋبى ءوز الاڭىندا پاوك-تى قابىلدايدى. پاوك ويىنشىلارى ەسەپ اشىپ، قۋانىشتارى قويىندارىنا سىيماي الاڭ شەتىنە بارىپ مارە-سارە بولادى. تورەشىنىڭ ويىندى جالعاستىرۋعا نۇسقاعانىن دا بايقاماي قالادى. وسى ءساتتى ۇرىمتال پايدالانعان الاڭ يەلەرى، دوپتى ورتادان باستاپ، بوس تۇرعان قاقپاعا گول سوعادى دا، ەسەپتى تەڭەستىرەدى.
شالقار ەستەن
دەرەككوز: «ايقىن» گازەتى. 2012