كاسپيدە يتبالىقتاردىڭ قىرىلۋ سەبەبى انىقتالدى

استانا. قازاقپارات - وتكەن جىلى كاسپي تەڭىزىندە يتبالىقتاردىڭ جاپپاي قىرىلۋىنا پنيەۆمونيا سەبەپ بولعان. بۇل جايىندا ەكولوگيا جانە تابيعي رەسۋرستار مينيسترلىگىنىڭ بالىق شارۋاشىلىعى كوميتەتىنەن ءمالىم ەتتى، دەپ حابارلايدى قازاقپارات ءتىلشىسى.

ۆەدومستۆونىڭ Facebook-پاراقشاسىندا جاريالانعان مالىمەتكە سايكەس، 2022 -جىلعى 7- قاراشادان 3- جەلتوقسانعا دەيىنگى كەزەڭدە ماڭعىستاۋ وبلىسىنىڭ ءتۇپقاراعان اۋدانىندا، كاسپي تەڭىزىنىڭ جاعالاۋىندا رەيدتىك ءىس- شارالار بارىسىندا 172 يتبالىقتىڭ ۇشاسى تابىلعان. وسىدان كەيىن كوميتەت يتبالىقتاردىڭ ءولۋ سەبەبىن انىقتاۋ ءۇشىن «گيدروبيولوگيا جانە ەكولوگيا ينستيتۋتى» مەكەمەسى، «ميكروبيولوگيا جانە ۆيرۋسولوگيا عىلىمي- وندىرىستىك ورتالىعى» ج ش س، «قازاقستان قولدانبالى ەكولوگيا اگەنتتىگى» ج ش س، كاسپي يتبالىعىن زەرتتەۋ جانە وڭالتۋ ورتالىعىمەن، سونداي- اق ماڭعىستاۋ وبلىسىنىڭ ەكولوگيا دەپارتامەنتى، ا ش م ۆەتەريناريالىق باقىلاۋ جانە قاداعالاۋ كوميتەتىنىڭ اۋماقتىق بولىمشەلەرىمەن ءتيىستى جۇمىس جۇرگىزدى.

«عىلىمي ۇيىمدار مەن قۇزىرەتتى مەملەكەتتىك ورگانداردىڭ وكىلدەرىنەن تۇراتىن جۇمىس توبى ساراپتاما ناتيجەسى بويىنشا 2022 -جىلعى قاراشادا تابىلعان كاسپي يتبالىقتارىنىڭ كوپتەگەن داراعىنىڭ قىرىلۋىنىڭ نەگىزگى سەبەبى تەڭىزدىڭ قازاقستاندىق بولىگىندە جانۋارلاردىڭ كۇزگى شوعىرلانۋى كەزەڭىندە ارالاس تۇماۋ جانە موربيلليۆيرۋستى ينفەكسيانىڭ ءورشۋى سالدارىنان ۆيرۋسپەن بايلانىستى پنيەۆمونيا دەگەن قورىتىندىعا كەلدى»، - دەپ اتاپ وتەدى كوميتەتتەن.

تاراتىلعان اقپاراتقا قاراعاندا، تەڭىز جانۋارلارىنىڭ يممۋنوتوكسيكالىق ەلەمەنتتەرمەن جانە قوسىلىستارمەن سوزىلمالى ۋلانۋى ولاردىڭ يممۋنيتەتىنىڭ تومەندەۋىنە جانە اعزانىڭ جالپى توزىمدىلىگىنە بايلانىستى جۇقپالى اۋرۋلارعا سەزىمتالدىعىنىڭ جوعارىلاۋىنا ىقپال ەتەدى.

«وسىلايشا، 2022 -جىلدىڭ قاراشاسىندا تابىلعان كاسپي يتبالىقتارىنىڭ قىرىلۋ سەبەبى - يممۋنيتەتتىڭ السىرەۋىنەن تۋىنداعان ۆيرۋستى ينفەكسيالاردىڭ ورشۋىنەن پايدا بولعان پنيەۆمونيا. يممۋنيتەتتىڭ تومەندەۋ سەبەبىنىڭ ءبىرى - جانۋارلاردىڭ تىرشىلىك ەتۋ ورتاسىنىڭ لاستانۋى»، - دەلىنگەن تاراتىلعان اقپاراتتا.

فوتو: www.facebook.com/fishcomitteekz

اۆتور

مارلان جيەمباي