قازاق ءتىلىن ۇيرەنگىسى كەلەتىندەر سانى ارتىپ كەلەدى

استانا. قازاقپارات - ەلىمىزدە قازاق ءتىلىنىڭ تەگىن كۋرستارىنا كۇننەن كۇنگە سۇرانىس ارتىپ كەلەدى. ۇيرەنەمىن دەۋشىلەردىڭ اراسىندا وزگە ەلدەن قونىس اۋدارعان ازاماتتار مەن شەتەلدىكتەر كوپ.

اننا گرەچكا قازاق ءتىلىن مەڭگەرۋگە نيەتتى. ونىڭ ايتۋىنشا، بۇرىن الەۋمەتتىك جەلىلەردە اقىلى نەگىزدە عانا ساباق بەرەتىن مامانداردىڭ جارنامالارى شىعاتىن. الايدا قالتام كوتەرمەيتىن، دەيدى ول. سوندىقتان مەملەكەتتىك ءتىلدى ءوز بەتىنشە ۇيرەنە باستاعان. كەيىن عالامتورداعى تەگىن كۋرستىڭ پاراقشاسىن كوزى شالىپ، بىردەن حابارلاسۋعا بەت الىپتى. ءبىراق وعان جازىلۋ - وڭايعا سوقپاعان.

اننا گرەچكا، قالا تۇرعىنى:

- پاراقشادا كورسەتىلگەن نومەرگە ءبىر اپتا بويى حابارلاسا الماي ءجۇردىم. كەيىن ۆاتساپ جەلىسىنە تىركەلگەن نومەرىنە جازدىم. ول جەردەن دە جاۋاپ المادىم. ءبىراق 10 كۇننەن كەيىن ولار مەنى ءتىل وقىتاتىن ارنايى توپقا قوستى. شىنىمدى ايتسام، قازاق ءتىلىن جەتىك مەڭگەرۋگە دەگەن ويىم - جۇزەگە اسپاي قالادى ما دەپ قورىقتىم.

استانادا قازاق ءتىلىن ۇيرەتەتىن تەگىن كۋرستار بار. ارنايى ساباق - قالاداعى كىتاپحانالاردا وتەدى. ونى جەرگىلىكتى اكىمدىك پەن «جاستار رۋحى» جاستار قاناتى ۇيىمداستىرعان. ماسەلەن «سويلە» كلۋبىنىڭ وزىندە مەملەكەتتىك ءتىلدى 100-دەن استام ادام جەتىك مەڭگەرىسى كەلەدى. مۇنداعى مۇعالىمدەردىڭ ايتۋىنشا، كۋرسقا كەلەتىندەردىڭ باسىم بولىگىن وزگە ەلدەن قونىس اۋدارعاندار مەن ەلورداداعى ورىسءتىلدى ازاماتتار قۇرايدى.

الۋا ارمان قىزى، «سويلە» كلۋبىنىڭ مۇعالىمى:

- بىزدە قازىرگى ۋاقىتتا سلاۆيان وكىلدەرى جانە قازاق وكىلدەرىنەن باسقا، قىرعىز، وزبەك سياقتى ۇلتتار ءبىلىم الادى. وسىنداي قازاق ءتىلىن ۇيرەنەمىن دەگەن ازاماتتار وتە كوپ، وسىعان قاتتى قۋانامىن. مۇستافا شوقاي ايتقان بولاتىن «بالاعا قاي تىلدە ءبىلىم بەرەتىن بولساڭ، ءتۇبى سول ەلدە قىزمەت ەتەدى» دەپ. مەنىڭ وسى ماقساتىم - بارشا وقۋشىلارعا، بالالارعا، زەينەتكە شىعىپ كەتكەن كىسىلەرگە قازاق ءتىلىن جەتىك ءتۇسىندىرىپ، ءتىلدى دامىتۋ.

قازاق ءتىلىن مەڭگەرۋ كۋرسىنىڭ ۇزاقتىعى - جارتى جىل. ول اياقتالعان سوڭ، وقۋشىلارعا ارنايى سەرتيفيكاتتار تابىستالادى. اننا گرەچكا، بۇل تۇرعىدا تەگىن ءبىلىم الىپ جۇرگەنىنە قۋانىشتى. جانە مۇنداي يگىلىكتىڭ عالامتورداعى بارلىق پلاتفورمالارىندا جارنامالانعانىن قالايدى.

اننا گرەچكا، قالا تۇرعىنى:

- تەگىن ءتىل كۋرستارى - الەۋمەتتىك جەلىنىڭ بارلىق پلاتفورماسىندا جارنامالانۋى كەرەك دەپ ويلايمىن. ادامداردىڭ موتيۆاتسياسى بولۋى مۇمكىن. ءبىراق اقىلى نەگىزدەگى كۋرستاردى قالتاسى كوتەرمەي جاتادى. سوندىقتان مەملەكەتتىك ءتىلدى مەڭگەرەمىن دەۋشىلەرگە بۇل تاپتىرماس مۇمكىندىك.

راسىمەن، ەلىمىزدىڭ بارلىق شاھارىندا تىلدەردى مەڭگەرەتىن تەگىن كۋرستار بارىن ءبىرى بىلسە، ءبىرى بىلمەيدى. بۇل تۇرعىدا ۇيىمداستىرۋشىلار اتالمىش كۋرستاردىڭ ناسيحاتىن كوبەيتىپ، اۋقىمىن كەڭەيتسە دەگەن تىلەك بار.

www.24.kz