ولار ءبىزدى قيىندىقتا قالدىرمادى - تۇركيادان ورالعان قازاقستاندىقتار پرەزيدەنت پەن س ءى م- نە العىس ايتتى

استانا. قازاقپارات - تۇركيادان ەۆاكۋاتسيالانعان قازاقستان رەسپۋبليكاسىنىڭ ازاماتتارى ءوز ازاماتتارىن قيىندىقتا قالدىرماعانى ءۇشىن پرەزيدەنت قاسىم-جومارت توقايەۆ پەن قازاقستان رەسپۋبليكاسىنىڭ سىرتقى ىستەر مينيسترلىگىنە العىس ءبىلدىردى، دەپ حابارلايدى قازاقپارات ءتىلشىسى.

25- قاڭتاردان بەرى اسادۋللا ارىستانوۆ گازيانتەپ قالاسىندا. ول تۇركياعا جەكە جۇمىسىمەن، بيزنەسپەن اينالىسۋعا كەلگەن. يران مەن تۇركيادان توقىما بۇيىمدارىن، كىلەمدەر الىپ بارىپ ساتادى.

«بىرىنشىدەن، مەن ەلىمىزدىڭ پرەزيدەنتى قاسىم-جومارت توقايەۆقا العىسىمدى بىلدىرەمىن. قازاقستاننىڭ تۇركياداعى ەلشىسى ەركەبۇلان ساپيەۆكە دە العىس ايتقىم كەلەدى. ءبىز قيىن جاعدايدا قالدىق. كونسۋلدىقتىڭ رەسمي سايتىندا ءبىز ديپلوماتيالىق وكىلدىك قىزمەتكەرلەرىنىڭ بايلانىستارىن تاپتىق. ولار بىزگە بىردەن جاۋاپ بەردى. ءبىر قوڭىراۋدان كەيىن قازاقستاننىڭ تۇركياداعى ەلشىلىگىنىڭ قىزمەتكەرلەرى حابارلاسىپ، ەۆاكۋاتسيانى ۇيىمداستىردى. ولار بىزگە جول كورسەتتى، ءبىزدى قايدا كۇتەتىنىن ءتۇسىندىردى. ازاماتتارىن قيىنشىلىقتا قالدىرماي، ەلىنە امان-ەسەن جەتكىزگەنى ءۇشىن پرەزيدەنت پەن ەلشىلىككە العىسىمىزدى بىلدىرەمىز»، - دەپ ءبولىستى اسادۋللا ارىستانوۆ.

رايحان نابيەۆا گازيانتەپتە تۇراتىن تۋىستارىنا قوناققا بارعان. ول سوندا ءۇش اي تۇرۋدى جوسپارلاپتى.

«الايدا جەر سىلكىنىسى مەنىڭ جوسپارلارىمدى وزگەرتتى. ماعان كومەكتەسكەن تۇركيانىڭ قازاقستانداعى ەلشىلىگىنىڭ قىزمەتكەرلەرىنە راحمەت، مەن ءساتتى جەتتىم. جيەنىم الماتىدا پوليتسيادا جۇمىس ىستەيدى. ول ماعان كومەكتەستى، قىزمەتكەرلەرمەن، قۇتقارۋشىلارمەن حابارلاستى. بارشا قازاقستاندىقتارعا راحمەت. ءبارى جاقسى، ۋاقىتىندا قۇتقارىلدى، جاقسى ۇشتى. جەر سىلكىنىسى بولعان كەزدە قوناقتا وتىر ەدىم. ەستىگەن بويدا كوشەگە جۇگىرىپ شىعىپ، تاڭعا دەيىن كولىكتەردە وتىردىق. قۇربان بولعاندار كوپ بولدى. اللا بارلىعىنا جاردەم بەرسىن»، - دەدى رايحان نابيەۆا.