ديماش قۇدايبەرگەن كونسەرتىنەن تۇسكەن قاراجاتتى تۇركياداعى زارداپ شەككەندەرگە اۋدارادى
«قازاق حالقىنا باۋىرلاس، اعايىن ەل بولىپ سانالاتىن تۇركياداعى، سيرياداعى جانە باسقا دا ەلدەردە تابيعاتتىڭ زالالىنان كوپتەگەن ادامنىڭ قازا تاپقانىن ەستىدىك. ارينە، زور كۇيزەلىسپەن قابىلداپ وتىرمىز. بارلىق دۇنيە سالعان ادامداردىڭ جاقىندارىنا قايعىرا كوڭىل ايتامىز. اۋىر حالدە كۇي كەشىپ جاتقان باۋىرلارىمىزعا تەزىرەك ساۋىعىپ كەتۋىن تىلەيمىز»، - دەدى قازاقستاندىق ءانشى ءوزىنىڭ Instagram پاراقشاسىندا.
وسى تۇستا ءانشى الەم بويىنشا ۇيىمداستىرلىپ جاتقان جەكە كەشتەرىنەن تۇسكەن قاراجاتتىڭ ءبىر بولىگىن زارداپ شەككەن وتباسىلارعا كومەك رەتىندە اۋداراتىنىن ايتتى.
«ءار وتباسىعا امانشىلىق تىلەيمىن. اسپانىمىز اشىق، الەم اتتى ورتاق ءۇيىمىز اپات پەن ءزىلزالادان امان بولسىن. ەلىمىزدە، الەمدە تىنىشتىق بولسىن! بارشا الەم حالقى باقىتتى بولسىن!»، - دەيدى ديماش قۇدايبەرگەن.
ايتا كەتەيىك، بۇگىن قازاقستاندىق قۇتقارۋشىلار مەن دارىگەرلەر بورتى گازيانتەپ قالاسىنا قونادى.
سوڭعى دەرەكتەر بويىنشا، تۇركيادا ءزىلزالادان كوز جۇمعان ادامدار سانى 3419 ادامعا جەتتى، 20534 ادام جاراقات الدى.