قاراعاندى وبلىسىندا الەم رەكوردىن قايتالاعان قاريا تۇرادى

None
None
استانا. قازاقپارات - قاراعاندى وبلىسى شەت اۋدانى اقادىر كەنتىندە 73 جاسىندا زىلتەمىر كوتەرۋدەن الەمدىك رەكوردىن قايتالاعان ءدارىباي وسپانوۆ ەسىمدى قاريا تۇرادى.

ول 180 كەلى زىلتەمىردى كوتەرەدى. مۇنداي كورسەتكىشتى الەمدە وسى جاستاعىلار اراسىندا باسقا ەشكىم كوتەرمەگەن. جاقىندا پرەزيدەنت ونىڭ سپورتتاعى جەتىستىكتەرىنە ءتانتى بولىپ، العىس حات، ساعات جانە بۋراباي شيپايجايىنا جولداما تۇرىندە سىيلاق جاسادى.

56 جاسىنان باستاپ پاۋەرليفتينگكە دەن قويعان اقساقال ازيا بىرىنشىلىگىندە گونكونگ، فيليپپين، ءۇندىستاندا، الەم بىرىنشىلىگىندە ا ق ش، پراگا، چەحيا، جاپونيادا ونەر كورسەتكەن. الەمدىك دەڭگەيدە 5 التىن، 5 كۇمىس مەدالى بار. ول - ەكى دۇركىن ازيا، ءۇش دۇركىن الەم چەمپيونى.

رەكورد رەتىندەگى كورسەتكىشى 180 كەلى بولعانىمەن، جاتتىعۋلاردا 200 كەلىگە دەيىن كۇشى جەتەتىن چەمپيون اۋلەتىمەن جات جەردە 31 رەت جەڭىس تۋىن جەلبىرەتىپتى. ونىڭ ىشىندە ءانۇران 18 رەت شىرقالعان.

اقساقالدىڭ ءۇش ۇلى دا وسى پاۋەرليفتينگتەن زور جەتىستىكتەرگە جەتكەن. ەكى ۇلكەن ۇلى جانە نەمەرەسى - الەم چەمپيونى. ال كەنجە ۇلى ادۋلكاريم قارامان - الەمنىڭ ءتورت دۇركىن، ازيانىڭ التى دۇركىن چەمپيونى، التى رەت ازيانىڭ كۇمىس جۇلدەسىنىڭ يەگەرى، قازاقستاننىڭ ەڭبەك سىڭىرگەن سپورت شەبەرى.

«ينجەنەر- گەودەزيست بولىپ جۇمىس ىستەدىم. قۇبىر تارتىپ، ايدالادا جۇرگەندە بوس پلاستماسسا قۇتىلارعا قۇمدى تولتىرىپ، كوتەرىپ جاتتىعاتىن ەدىم. سودان الەمدىك دەڭگەيگە شىقتىم. العاش رەت 2008 -جىلى گونكونگتەگى ازيا بىرىنشىلىگىندە كۇمىس جۇلدەگەر اتاندىم. ودان كەيىن فيليپپيندە التىن الدىم. امەريكادا 2012 -جىلى كۇمىس يەلەنىپ، حالىقارالىق دارەجەدەگى سپورت شەبەرى نورماسىن ورىندادىم. قازىرگى دارەجەم - حالىقارالىق دارەجەدەگى سپورت شەبەرى»، - دەيدى ءدارىباي وسپانوۆ.

بۇدان سوڭ ول ليتۆادا ەكى دۇركىن الەم چەمپيونى اتانعان. اقساقال جاپونداردى تاڭعالدىرىپ، الەم چەمپيونى اتاعىن جەڭىپ العان. ال بىلتىر الماتىدا وتكەن الەم بىرىنشىلىگىندە ابسوليۋت الەم چەمپيونى رەتىندە مويىندالدى.

«ءۇش دۇركىن الەم چەمپيونى اتانعان سوڭ بالاما - ەڭبەك سىڭىرگەن سپورت شەبەرى، جاتتىقتىرۋشىسى ماعان قازاقستان رەسپۋبليكاسىنىڭ ەڭبەك سىڭىرگەن جاتتىقتىرۋشىسى اتاعى بەرىلدى. بالام قازىر كلاسسيكالىق تۇردەن الەمدىك رەيتينگتە ءبىرىنشى ورىندا تۇر. 175,5 كەلى كوتەرگەن رەكوردىن 4 جىلدان بەرى ەشكىم جاڭارتا العان جوق. بۇل - قازاقستاندا بولماعان ناتيجە. قازاقستاندا ءبىر سپورتشى الەمدىك رەيتينگتە 4 -جىل قاتارىنان ءبىرىنشى تۇرعان ەمەس. قازىر ول اقادىردا بالالاردى جاتتىقتىرادى. چەمپيونداردى دايىنداپ جاتىر»، - دەيدى اقساقال.

ءدارىباي وسپانوۆ اپتاسىنا بەس رەت جاتتىعادى. ءۇش ۇلىمەن بيىلعى حالىقارالىق جارىستاردا قازاقستاننىڭ نامىسىن قورعاۋعا دايىندىق ۇستىندە.

«قازاندا موڭعولياداعى الەم بىرىنشىلىگىنە قاتىسۋدى جوسپارلاپ وتىرمىز، ال ماۋسىمدا ءۇندىستانعا بارامىز»، - دەيدى سپورت ارداگەرى.

Massaget.kz

سوڭعى جاڭالىقتار