پاكىستاننىڭ بۇرىنعى پرەزيدەنتى پەرۆەز مۋشارراف قايتىس بولدى
بۇل تۋرالى جەكسەنبى كۇنى Geo.tv پاكىستان تەلەارناسى ءمالىم ەتتى، دەپ حابارلايدى قازاقپارات تاسس اگەنتتىگىنە سىلتەمە جاساپ.
بۇرىنعى مەملەكەت باسشىسى دۋبايدا جەكە اۋرۋحانادا جاتقان.
گەنەرال مۋشارراف پاكىستان بيلىگىنە 1999 -جىلى قازاندا اسكەري توڭكەرىس ناتيجەسىندە كەلگەن. 2001 -جىلى 20-ماۋسىمدا ول پرەمەر- مينيستر جانە قۇرلىق كۇشتەرى شتابىنىڭ باستىعى قىزمەتىن ساقتاي وتىرىپ، ءوزىن پرەزيدەنت دەپ جاريالادى.
2002 -جىلدىڭ ساۋىرىندە ونىڭ پرەزيدەنتتىك مەرزىمى بەس جىلعا ۇزارتىلدى.
2007 -جىلى مۋشارراف وپپوزيتسيامەن كەلىسسوز جۇرگىزۋدى تالاپ ەتكەن ءوز ورتاسىمەن، سونداي- اق ونىڭ كەزەكتى پرەزيدەنتتىك سايلاۋعا قاتىسۋىنا قارسى شىققان جوعارعى سوتپەن قاقتىعىسقا ءتۇستى.
سوعان قاراماستان، ول 2007 -جىلدىڭ 6-قازانىندا جاڭا مەرزىمگە قايتا سايلاندى، ءبىراق جوعارعى سوتتىڭ سايلاۋ قورىتىندىسىن بەكىتۋدى كەشىكتىرۋى ىشكى ساياسي داعدارىستى تۋدىردى.
بۇل جاعدايدا 2007 -جىلدىڭ 3-قاراشاسىندا مۋشارراف توتەنشە جاعداي ەنگىزىپ، كونستيتۋتسيانى جانە ءبىرقاتار ازاماتتىق بوستاندىقتاردى توقتاتتى.
سول جىلى 28-قاراشادا ول ارميا قولباسشىسى قىزمەتىنەن كەتىپ، ازاماتتىق پرەزيدەنت رەتىندە انت قابىلدادى.
الايدا، 2008 -جىلدىڭ اقپانىندا وتكەن پارلامەنت سايلاۋى وپپوزيتسياعا جەڭىس اكەلدى، سوندىقتان يمپيچمەنت جاريالاماۋ ءۇشىن مۋشارراف 2008 -جىلى 18-تامىزدا وتستاۆكاعا كەتۋگە ءماجبۇر بولدى، سودان كەيىن لوندونعا كەتتى.
2013 -جىلدىڭ 24-ناۋرىزىندا مۋشارراف پارلامەنت سايلاۋىنا قاتىسۋ ءۇشىن وتانىنا ورالدى. الايدا 31-ناۋرىزدا وعان قارسى بىرنەشە قىلمىستىق ءىس قوزعالدى.
سول جىلى 18-ساۋىردە سوت ونى تۇتقىنداۋعا سانكتسيا بەردى، 20-تامىزدا وعان رەسمي ايىپ تاعىلدى. مۋشارراف قاماۋعا الىنىپ، ءۇي قاماۋىندا بولدى.
2016 -جىلدىڭ ناۋرىزىندا وعان ەمدەلۋ ءۇشىن شەتەلگە كەتۋگە رۇقسات ەتىلدى، ول پاكىستانعا سوتقا كەلۋگە ۋادە بەردى.
2019 -جىلدىڭ 17-جەلتوقسانىندا پاكىستاننىڭ ارنايى سوتى مۋشاررافتى ءولىم جازاسىنا كەستى.
ول كونستيتۋتسيا ارەكەتىن توقتاتا تۇرۋعا جانە 2007 -جىلى توتەنشە جاعدايدىڭ ەنگىزىلۋىنە بايلانىستى ساتقىندىق جاساعانى ءۇشىن كىنالى دەپ تانىلدى.
پاكىستاننىڭ بۇرىنعى باسشىسى سوڭعى جىلدارى دۋبايدا (ب ء ا ا) تۇردى.