موڭعولياداعى ەڭ تومەنگى جالاقى بايان- ولگيدە تىركەلگەن - شەتەلدەگى قازاق باسپا ءسوزى

استانا. قازاقپارات - «قازاقپارات» ح ا ا شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.

وزبەكستانداعى قازاق ادەبيەتى كەڭەسى جىلدى قورىتىندىلادى – ءوزا

وزبەكستان جازۋشىلار وداعىندا قازاق ادەبيەتى كەڭەسىنىڭ 2022 -جىلى اتقارعان قىزمەتىنىڭ قورىتىندىسىنا ارنالعان جيىن ءوتتى. وندا وزبەكستان جازۋشىلار وداعىنىڭ ءتوراعاسى، حالىق اقىنى سيروجيددين سايد، وداقتىڭ قازاق ادەبيەتى كەڭەسىنىڭ ءتوراعاسى ءتۇرسىنالى احمەدوۆ جانە ەلدەگى بارشا زيالى قاۋىم وكىلدەرىنىڭ انا تىلىندە ەركىن ەڭبەك ەتىپ، شىعارماشىلىقپەن اينالىسۋىنا زور كوڭىل ءبولىنىپ جاتقانى، وسىعان بايلانىستى ولارعا قاجەتتى مۇمكىندىكتەر جاسالىپ جاتقانى ايتىلدى، دەپ حابارلايدى ءوزا اقپارات اگەنتتىگى.

اتالعان باسقوسۋعا قاتىسقان وزبەكستان جازۋشىلار وداعىنىڭ ءتوراعاسى، حالىق اقىنى سيروجيددين ساييدتىڭ ايتۋىنشا، وتكەن جىلى باۋىرلاس حالىقتىڭ ءبىرقاتار قالامگەرلەرىنىڭ شىعارماشىلىعىنا ارنالعان تانىمدىق شارالار وتكىزىلىپ، شىعارمالارى كىتاپ بولىپ باسىلىپ شىقتى. وزبەكستان جازۋشىلار وداعى ۇيىمداستىرعان ورتالىق ازيا شىعارماشىل جاستار فورۋمىنا قازاقستاننىڭ شىعارماشىل جاستارى بەلسەندى قاتىستى.

وزبەكستاندىق ب ا ق- تىڭ دەرەگىنشە، بۇگىندە وزبەكستان جازۋشىلار وداعى جانىنداعى قازاق ادەبيەتى كەڭەسى - وداق قۇرامىنداعى ەڭ ءىرى كەڭەستەردىڭ ءبىرى بولىپ، وتكەن جىلى 10 نان استام مادەني ءىس- شارا جانە بىرنەشە كىتاپ تۇساۋكەسەرىن وتكىزگەن.

اتاپ ايتقاندا وتكەن جىلى جازۋشىلار وداعى جانىنداعى قازاق ادەبيەتى كەڭەسىنىڭ مۇشەلەرى وزبەك- قازاق ادەبي بايلانىستارى جونىندە تۇركى الەمى ەلدەرى اراسىندا تۇڭعىش رەت ۇيىمداستىرىلعان جاھاندىق شارا - «تۇرىك ادەبيەتىنىڭ جاۋھارلارى» اتتى ءجۇز تومدىق كىتاپ جارىققا شىعىپ، ونىڭ ون تومى، ياعني 72-81 تومدارى قازاق ادەبيەتىنە ارنالعان.

وسى ون تومدىققا قازاقتىڭ ۇلى اقىنى ابايدان باستاپ وتكەن عاسىردىڭ كلاسسيك جازۋشىلارىنان تارتا بۇگىنگى قازاق ادەبيەتىنە ۇلەس قوسىپ جۇرگەن جاستاردىڭ شىعارمالارى ەنگەن.

قازاق ادەبيەتى كەڭەسىنىڭ ءتوراعاسى ءتۇرسىنالى احمەدوۆ ءوز بايانداماسىندا 2023 -جىلعى كەڭەسىتىڭ الداعى جوسپارىنا توقتالىپ ەل اۋماعىنداقى قازاق اقىن- جازۋشىلاردىڭ جاڭا كىتاپتارىنىڭ تۇساۋكەسەرى، مەكتەپتەردە مادەني- ادەبي كەزدەسۋلەر، تانىمدىق شارالار، دوڭگەلەك ۇستەلدەر وتكىزۋ كوزدەلىپ وتىرعانىن جەتكىزدى.

ەڭ تومەنگى جالاقى بايان- ولگي ايماعىندا تىركەلگەن - Kaznews

موڭعوليانىڭ 21-ايماعىنىڭ ءال- اۋقات الەۋەتى جانە باسەكەگە قابىلەتى تۋرالى بايانداما جارىق كوردى. 2022 -جىلعى كورسەتكىش بويىنشا بايان- ولگي ايماعى موڭعوليادا باسەكەگە قابىلەت يندەكسىندە 13- ورىنعا قايتا سىرعىعان.

باتىس موڭعوليادا ۋۆس 11، گوۆ- التاي 18، حوۆد 15، زاۆحان 20- ورىندارعا تۇراقتاعان، دەپ جازادى موڭعوليانىڭ Kaznews اقپارات پورتالى.

اتالعان ب ا ق- تىڭ مالىمەتىنشە، بايان- ولگي ايماعىنىڭ يندەكسىنىڭ تومەندەۋىنە تەحنولوگيالىق ينفراقۇرىلىم، مەنەجمەنتتىك جۇيە اسەر ەتكەن.

سونىمەن قاتار، حالىقتىڭ تۇرمىس دەڭگەيى جاقسارعان ايماق رەتىندە دورنوگوۆ ايماعى كوش باستاپ تۇرسا، ەڭ تومەنگى كورسەتكىش حوۆد ايماعىندا تىركەلگەن.

ال، ورتاشا جالاقى بويىنشا ورحون ايماعى كوش باستاپ تۇرسا، ەڭ تومەنگى جالاقى بايان- ولگي ايماعىندا تىركەلگەن.

ايماقتاردىڭ باسەكەگە قابىلەتى تۋرالى قورىتىندىنى موڭعوليالىق تاۋەلسىز زەرتتەۋ ورتالىعى شىعارعان. بۇل رەيتينگ ايماقتاردىڭ ءال- اۋقات الەۋەتىنە باعا بەرۋ سالاسىنداعى ەڭ بەدەلدى ساراپتاما سانالادى.

اتالعان زەرتتەۋ قورىتىندىسى يننوۆاتسيانى وندىرىسكە ەڭگىزۋدىڭ جانە اكىمشىلىك كەدەرگىلەردى ازايتۋ، بيلىكتەگى اشىقتىقتى قالىپتاستىرۋ ارقىلى باسەكەگە قابىلەتتى ارتتىرۋعا بولاتىنىن كورسەتەدى، دەپ جازادى موڭعوليالىق ب ا ق.

استانادان انكاراعا تىكەلەي رەيس اشىلدى- TRT

قازاقستاندىق اۆياكومپانيا استانادان انكاراعا تۇراقتى رەيس باستايدى. ال قازاقستاندىق اۋە كومپانيا استانادان تۇركيا استاناسى انكاراعا بيلەت ساتۋدىڭ باستالعانىن حابارلادى.

استانا- انكارا رەيسى 23-مامىردان باستالادى. رەيستەر اپتاسىنا ەكى رەت، سەيسەنبى جانە سەنبى كۇندەرى تۇراقتى ورىندالادى.

بۇل تۋرالى وسى اپتادا تۇركيا راديو تەليەۆيزيا پورتالى حابارلاعان بولاتىن.

ايتا كەتەيىك، بۇعان دەيىن ق ر يندۋستريا جانە ينفراقۇرىلىمدىق دامۋ مينيسترلىگى پاندەميادان كەيىن قازاقستان 109 باعىت بويىنشا 29 ەلگە حالىقارالىق رەيستەردى باستاعانىن حابارلاعان بولاتىن.

تۇركيالىق باسىلىمنىڭ مالىمەتىنشە، بيىل استانا، الماتى، اقتاۋ، تۇركىستان جانە اتىراۋدان ستامبۋلعا، استانا مەن الماتىدان انتالياعا اۋە رەيستەرىن ارتتىرۋ جوسپارلانعان.

سونىمەن قاتار، جاڭا باعىتتار اياسىندا اقتاۋ مەن شىمكەنتتەن انكاراعا، استانادان دوحاعا، استانادان باكۋگە جانە شىمكەنتتەن دۋشانبەگە رەيستەر اشىلادى دەپ كۇتىلۋدە.

يران مەن قازاقستان سپورت جانە جاستار سالاسىندا مەموراندۋم جوباسىنا قول قويدى - Parstoday

يراننىڭ جاستار جانە سپورت مينيسترلىگىنىڭ ستراتەگيالىق زەرتتەۋلەر ورتالىعىنىڭ ديرەكتورى رەزا نيكباحش يران مەن قازاقستاننىڭ باقىلاۋشى ورگاندارى اراسىندا سپورت جانە جاستار سالاسىندا مەموراندۋمنىڭ جالپى جوباسىنا قول قويدى، دەپ حابارلايدى Parstoday اقپارات اگەنتتىگى.

يراندىق باسىلىمنىڭ كەلتىرگەن دەرەگىنە سۇيەنسەك، رەزا نيكباحش ءوزىنىڭ جۋىردا قازاقستانعا بارعانىن جەتكىزگەن. ونىڭ ايتۋىنشا، سپورت جانە جاستار سالاسىندا ەكى ەلدىڭ جوعارى لاۋازىمدى ساراپشىلارى ءوزارا كەزدەسۋلەر ۇيىمداستىرىپ، تاجىريبە مەن اقپارات الماسىپ، مەموراندۋمنىڭ باپتارىن ناقتى تالقىلايدى دەپ كەلىسىلگەن.

سونداي- اق، يراندىق رەسمي وكىلدىڭ مالىمەتىنشە، ءبىلىم، عىلىم مەن مادەنيەت سالالارىندا ارىپتەستىك جاساۋ، شەبەرلىك ساباقتارى مەن بىرلەسكەن ءبىلىم بەرۋ كۋرستارىن وتكىزۋ ءىسى قولعان الىنباق.

سول ارقىلى سپورتشىلار، جاتتىقتىرۋشىلار جانە تورەشىلەرمەن الماسۋ، سپورتتىق مەديتسينالىق ەمحانالاردى پايدالانۋ، ورتاق جاتتىعۋلار وتكىزۋ، جالپىعا ورتاق سپورت جانە مۇگەدەكتەرگە ارنالعان سپورت سالاسىندا ارىپتەسۋ وسى مەموراندۋمدا اتالعان باپتار بولىپ تابىلادى.

Parstoday اقپارات اگەنتتىگىنىڭ دەرەگىنشە، قوس تاراپ اتالعان مەموراندۋمنىڭ جالپى جوباسىنا كەلىستى. ەكى ەلدىڭ ساراپشىلارى مەموراندۋمنىڭ باپتارىن ەگجەي- تەگجەيلى تالقىلايتىن بولادى.

«اسگات» كۇمىس كەنى ىسكە قوسىلسا، كەمى 500 ادام جۇمىسپەن قامتىلادى - Janadauir

بايان- ولگي ايماعىندا ورنالاسقان «اسگات» كۇمىس كەنىنىڭ قورى العاش 1976 -جىلى بارلاۋ جۇمىسىن باستاعان ەدى.

تاريحى 44 جىل بولعان اتالمىش ءىرى جوبانى ەكونوميكالىق اينالىمعا ەنگىزۋ، پايدالانۋ ماقساتىندا موڭعول ۇكىمەتىنەن كوپتەگەن ساياساتتار، ءارتۇرلى شەشىمدەر شىعىپ كەلگەن، دەپ جازادى موڭعوليانىڭ janadauir.com اقپارات پورتالى.

جازبا اۆتورى بايان- ولگيي ايماعىنىڭ دامۋ قورى باسقارۋ كەڭەسىنىڭ ءتوراعاسى پالداين ءنيامحۇۇ «بۇل كەننىڭ بىزگە بەرەشەگى قانداي؟ اسگات كەنى دەگەنىمىز نە؟» دەگەن سەكىلدى ماسەلەلەرگە توقتالعان.

اۆتور اتالعان كەننىڭ العا قويعان جوسپارلارى تۋرالى توقتالا كەلىپ، ءوزىنىڭ ۇسىنىس، جوبالارى تۋرالى ايتقان.

ول «اسگات» كۇمىس كەنىنىڭ جوباسىنىڭ الدىن الا تەحنيكالىق، ەكونوميكالىق نەگىزىن قايتا جاساۋ قاجەتتىلىگى تۋىنداۋدا ەكەنىن تىلگە تيەك ەتكەن. اۆتوردىڭ ايتۋىنشا، اتالمىش جوبا ىسكە اسسا ەڭ كەم دەگەندە 500 ادامدى تۇراقتى جۇمىسپەن قامتيدى.

سونىمەن قاتار، قوسىمشا جۇمىس ورىندارى پايدا بولادى، شاعىن جانە ورتا وندىرىستەر كوپتەپ اشىلادى ەكەن.

قىتايدىڭ ۇلتتىق ىستەر كوميتەتىنىڭ ديرەكتورى قازاقستان ەلشىسىمەن كەزدەستى- جەنمين جيباو

1-اقپان كۇنى تۇستەن كەيىن مەملەكەتتىك ۇلتتىق ىستەر كوميتەتىنىڭ ديرەكتورى پان يۋە بەيجىڭدەگى ۇلتتار سارايىندا قازاقستاننىڭ قىتايداعى ەلشىسى شاحرات نۇرىشيەۆپەن كەزدەسىپ، ءوزارا الماسۋ مەن ىنتىماقتاستىقتى ودان ءارى دامىتۋ ماسەلەلەرىن جان- جاقتى تالقىلادى. كەزدەسۋدە قىتاي مەن قازاقستان اراسىنداعى ەتنيكالىق بارىس- كەلىس جانە ورتاق تولعاندىراتىن ماسەلەلەر ايتىلدى، - دەپ حابارلادى People Daily.

قىتايلىق باسىلىمنىڭ دەرەگىنشە، ەلشى شاحرات نۇرىشيەۆ جانە ونىڭ دەلەگاتسياسى ۇلتتار مادەنيەت سارايىنداعى «بارلىق ەتنيكالىق توپتاردىڭ قىتاي حالىق رەسپۋبليكاسى قۇرىلعان كۇننەن باستاپ پارتيا مەن مەملەكەت باسشىلارىنا ۇسىنعان تارتۋلارى كورمەسىندە» جانە «ۇلتتار مادەنيەت سارايىندا» بولدى.

سونىمەن قاتار ولار «ۇلتتار مادەنيەت سارايىندا ساقتالعان ەرتە زامانداعى تاڭداۋلى كىتاپتار كورمەسى» قاتارلىلاردى تامالاشالادى.

وزبەكستاندا حالىق ىقىلاسىنا بولەنگەن قانداسىمىز جاڭا لاۋازىمعا تاعايىندالدى - ءوزا

وزبەكستاندا وزەكتى ماسەلەلەردى ۇنەمى كوتەرىپ، حالىق ىقىلاسىنا بولەنگەن ەكس- دەپۋتات راسۋل كۋشەربايەۆ جاڭا قىزمەتكە تاعايىندالدى. بۇل تۋرالى ول ءوزىنىڭ الەۋمەتتىك جەلىدەگى ارناسىندا مالىمدەپ، ەل دامۋى، بولاشاعى، تاعدىرىنا قاتىستى ماسەلەلەرگە بەلسەنە قاتىسۋدى جالعاستىراتىنىن جازعان، دەپ حابارلايدى ءوزا اقپارات اگەنتتىگى.

راسۋل كۋشەربايەۆ الەۋمەتتىك جەلىدەگى پاراقشاسىندا:

«تابيعات رەسۋرستار ءمينيسترىنىڭ كەڭەسشىسى رەتىندە جۇمىسىمدى جالعاستىراتىن بولدىم. ەندى تابيعات انانى قورعاۋ جولىنداعى بار ماسەلەلەردى شەشۋ ءۇشىن ويىمىزدا بار كوپتەگەن جوسپارلاردى جۇزەگە اسىرۋعا تىرىسامىز. ەڭ باستىسى، جۇرتشىلىق پەن حالىق اراسىنداعى بايلانىستان ءۇزىلىس بولمايدى. نەگىزگى جۇمىس ءالى الدا» دەپ جازعان.

ايتا كەتەيىك، بۇعان دەيىن قانداسىمىز راسۋل كۋشەربايەۆ وزبەكستان رەسپۋبليكاسىنىڭ وليي ماجليس زاڭ شىعارۋ پالاتاسى دەپۋتاتى لاۋازىمىنداعى جۇمىسىنان ءوز ەركىمەن كەتكەن ەدى.

راسۋل قىدىرالى ۇلى كۋشەربايەۆ 1987 -جىلى 12-قاڭتاردا تاشكەنت وبلىسى يانگيۋل اۋدانىندا تۋعان. قازاق ۇلتىنان شىققان وزبەك ساياساتكەرى، رەداكتور، زاڭگەر جانە جۋرناليست.

وزبەكستان رەسپۋبليكاسى ولي ماجليسي زاڭ شىعارۋ پالاتاسىنىڭ دەپۋتاتى بولعان.

سونداي- اق، وسى اپتادا ءو ز ا اقپارات اگەنتتىگىندە «ارال تەڭىزىنىڭ قۇرعاعان ايماعىندا ورمان ءوسىرۋدىڭ كەزەكتى ماۋسىمى باستالدى» دەگەن تاقىرىپتاعى اقپارات جارىق كوردى.

اتالعان باسىلمنىڭ دەرەگىنشە، 2023 -جىلى مۇندا 100 مىڭ گەكتار جەرگە ورمان ءوسىرۋ جۇمىستارىن جۇرگىزۋ جوسپارلانۋدا. ورمان ءوسىرۋ قۇرعاعان تەڭىز ايماعىنان زياندى تۇزدار مەن شاڭنىڭ كوتەرىلۋىنە جول بەرمەيدى ەكەن.

توتەنشە جاعدايلار مينيسترلىگى مەن مەملەكەتتىك ورمان شارۋاشىلىعى كوميتەتى بىرلەسە بۇعان دەيىن ارال تەڭىزىنىڭ قۇرعاعان بولىگىندە 1620000 گەكتار ايماقتا سەكسەۋىل جانە باسقا دا ءشول وسىمدىكتەرىنەن تۇراتىن ورمان القابىن جاساعان.

اۆتور

بەيسەن سۇلتان