فۋتبولدان كلۋبتار اراسىنداعى الەم چەمپيوناتى: «ال- حيليال» جارتىلاي فينالعا شىقتى
شيرەك فينالداعى العاشقى كەزدەسۋدە «ۆيداد» (ماروككو) جانە «ال- حيليال» (ساۋد ارابياسى) كوماندالارى كەزدەستى.
كەزدەسۋ بارىسىندا كوماندالار تارتىستى ويىن وتكىزدى. دەسە دە ءبىرىنشى كەزەڭدە ەسەپ اشىلعان جوق.
ەكىنشى كەزەڭدە «ۆيداد» ساپىنان ەيۋب ەل املۋد 52-مينۋتتا ءبىر گول سوقتى. بۇدان كەيىن دە كوماندالار ەسەپتى وزگەرتەتىن مۇمكىندىكتى ىزدەدى.
ويىننىڭ 94-مينۋتىندا ساۋد ارابياسى كلۋبىنان موحاممەد كاننو تارازى باسىن تەڭەستىردى.
ويىنننىڭ نەگىزگى كەزەڭى 1:1 ەسەبىمەن تەڭ اياقتالىپ، وۆەرتايمعا ۇلاستى. وۆەرتايمدا جەڭىمپاز انىقتالعان جوق. ال پەنالتي تەبۋدە «ال- حيليال» كومانداسىنىڭ جولى بولدى. وسىلايشا جارتىلاي فينالعا جولداما الدى.
ەندى جارتىلاي فينالدا 7-اقپاندا برازيليانىڭ «فلامەنگو» كومانداسىمەن كەزدەسەدى.
سونداي- اق، قازىر «سيەتل ساۋندەرس» (ا ق ش) جانە «ال- احلي» (ەگيپەت) كوماندالارى شەبەرلىك بايقاسۋدا. جەڭىمپاز كوماندا 7 اقپاندا «رەال مادريد» (يسپانيا) كلۋبىنا قاپسىلاس اتانادى.
ەگيپەتتىك كلۋب بۇدان بۇرىن «وكلەند سيتي» (جاڭا زەلانديا) كومانداسىن 1:0 ەسەبىمەن قاپى قالدىرعان ەدى.
ءتۋرنيردىڭ 3-ورىن ءۇشىن سايىس پەن فينالى 11-اقپانعا بەلگىلەنگەن.
اتالعان تۋرنير 2000 -جىلدان بەرى تۇراقتى تۇردە وتكىزىلىپ كەلەدى. بۇعان دەيىن 11 كوماندا جەڭىمپاز اتاندى.