مەملەكەت باسشىسى بىرىككەن اراب امىرلىكتەرىنىڭ پرەزيدەنتىمەن تەلەفون ارقىلى سويلەستى

استانا. قازاقپارات - مەملەكەت باسشىسى قاسىم- جومارت توقايەۆ بىرىككەن اراب امىرلىكتەرىنىڭ پرەزيدەنتى شەيح مۇحاممەد بەن زايد ءال ناحايانمەن تەلەفون ارقىلى سويلەستى، دەپ حابارلايدى قازاقپارات اقوردانىڭ رەسمي سايتىنا سىلتەمە جاساپ.

تاراپتار ەكىجاقتى ىنتىماقتاستىقتى نىعايتۋ پەرسپەكتيۆالارىن تالقىلادى، سونىڭ ىشىندە ساۋدا- ەكونوميكالىق جانە ينۆەستيتسيالىق سالالارداعى قاتىناستاردى نىعايتۋعا باسا ءمان بەردى. وسى رەتتە قازاقستان پرەزيدەنتىنىڭ جاقىندا بىرىككەن اراب امىرلىكتەرىنە رەسمي ساپارى كەزىندە قول جەتكىزىلگەن ۋاعدالاستىقتاردى ءتيىمدى جۇزەگە اسىرۋدىڭ ماڭىزدىلىعى اتاپ ءوتىلدى.

ەكى ەل باسشىلارى ساياسي ديالوگتى ودان ءارى كەڭەيتۋگە، ساۋدا- ساتتىق بايلانىستاردى جانداندىرۋعا جانە ەكونوميكانىڭ ءتۇرلى سەكتورلارىندا بىرلەسكەن جوبالاردى جۇزەگە اسىرۋعا ءوزارا نيەتتى ەكەنىن راستادى.