پرەزيدەنتتىككە كانديدات بولعان قاراقات ابدەن «اۋىل» پارتياسىنا ءوتتى

استانا. قازاقپارات - قوعام قايراتكەتى، بىلتىر پرەزيدەنتتىككە كانديدات بولعان قاراقات ابدەن «اۋىل» پارتياسىنىڭ مۇشەسى اتاندى، دەپ حابارلايدى قازاقپارات ءتىلشىسى.

«قاراقات ابدەن ءبىزدىڭ قاتارىمىزعا قوسىلدى. بايقاساڭىزدار، پرەزيدەنت سايلاۋىندا قاراقات ابدەننىڭ تۇجىرىمداماسى حالىقتىق داستۇرلەرمەن، اۋىلدىق باعىتتاعى داستۇرلەرمەن بايلانىستى بولدى. سوندىقتان ونىڭ داستۇرلەرى بار، ءداستۇردى، مادەنيەتتى، ادامي كاپيتالدى، شىعارماشىلىقتى دامىتۋ - ءبىز ۇستانعان نەگىزگى باعىتتاردىڭ ءبىرى. سوندىقتان قاراقاتتى قاتارىمىزعا قۋانا قابىلدادىق. تولىق پارتيالىق ءتىزىمدى ۇسىنۋ جانە قابىلداۋدى بۇگىنگى سەزد شەشەدى»، - دەدى «اۋىل» پارتياسىنىڭ ءتوراعاسى ءالي بەكتايەۆ سەزد الدىندا ب ا ق وكىلدەرىنىڭ ساۋالىنا.

«قازاقتا «اۋىلىنا قاراپ ازاماتىن تانى» دەگەن جاقسى ءسوز بار. اۋىلدىڭ جاعدايىنا ءبارىمىز جاۋاپتىمىز. اۋىلدىڭ ەڭسەسىن كوتەرۋىمىز كەرەك. اۋىل يدەولوگياسى، مەملەكەتتىك يدەولوگيانىڭ نەگىزى بولۋ كەرەك دەپ ەسەپتەيمىن. گۇلدەنسە اۋىل، گۇلدەنەمىز ءبارىمىز دەمەكشى، اۋىل - تۇتاس ەلدىڭ بولاشاعى. ال ءبىز اۋىل جارقىن بولۋى ءۇشىن ايانباي جۇمىس ىستەۋگە دايىنبىز. ءبىز ءارقاشان ەلمەن، حالىقپەن بىرگەمىز. ەل بولاشاعىن ويلاعان «اۋىل» پارتياسىنىڭ مۇشەسى بولۋ - مەن ءۇشىن ۇلكەن مارتەبە»، - دەدى قاراقات ابدەن سەزدە.

ايتا كەتسەك، ەلوردادا «اۋىل» حالىقتىق- دەموكراتيالىق پارتياسىنىڭ كەزەكتەن تىس XXII سەزى ءوتىپ جاتىر.