قازاقستاندا جۇمىس ىستەيتىن شەتەلدىك ينۆەستورلار ەلدەگى سيفرلاندىرۋ ۇدەرىسىن دامىتۋعا نيەتتى
قازاقستاندا جۇمىس ىستەيتىن شەتەلدىك ينۆەستورلار ەلدەگى سيفرلاندىرۋ ۇدەرىسىن دامىتۋعا نيەتتى ەكەندەرىن جەتكىزدى.
بۇل تاقىرىپ بيىل ق ر پرەزيدەنتى جانىنداعى شەتەلدىك ينۆەستورلار كەڭەسىنىڭ 35-وتىرىسىندا تالقىلاناتىن بولادى.
سەسسيا مودەراتورى، KPMG Caucasus جانە Central Asia باسقارۋشى سەرىكتەسى ساكەن جۇماشيەۆتىڭ ايتۋىنشا، تاۋەلسىزدىك جىلدارى قازاقستان ەكونوميكاسىنا 370 ميلليارد دوللار ينۆەستيتسيا تارتىلعان. ءبىراق بۇل سومانىڭ باسىم بولىگى ءوندىرۋشى سەكتورلارعا بەرىلدى. دەسە دە قازىر دامۋ ۆەكتورى وزگەرۋدە.
سيفرلىق دامۋ، يننوۆاتسيالار جانە اەروعارىش ونەركاسىبى ۆيتسە- ءمينيسترى اسەت تۇرىسوۆ قازىرگى الەمدە كەز كەلگەن سالانى سيفرلاندىرۋسىز ەلەستەتۋ مۇمكىن ەمەس ەكەنىن ايتتى. ال تەحنولوگيالىق پروتسەستەر، ءوز كەزەگىندە، بارلىق ەلدىڭ ۇكىمەت جوسپارىنا تۇزەتۋلەر ەنگىزىپ جاتىر.
قازاقستان ۇكىمەتى سيفرلاندىرۋ ترەندىن بۇرىننان قولعا العان. قازىر سيفرلىق دامۋ مينيسترلىگى ۋاكىلەتتى ورگان رەتىندە وسى سالاداعى زاڭنامانى جەتىلدىرۋ بويىنشا جۇمىس جۇرگىزۋدە.
«ءبىز قازاقستانعا كەلگەن ينۆەستورلاردىڭ وزدەرىن جايلى سەزىنۋى ءۇشىن قالىپتى زاڭنامالىق بازا جاساۋ ماقساتىندا جۇمىس ىستەپ جاتىرمىز. بۇل وتە ماڭىزدى، سەبەبى سيفرلاندىرۋ زاڭنامالىق تۇرعىدان دا كۇشەيتىلۋى ءتيىس»، - دەپ ءتۇسىندىردى اسەت تۇرىسوۆ.
سونىمەن قاتار، ول سەكتورلاردىڭ ينۆەستيتسيالىق تارتىمدىلىعىن قۇرا وتىرىپ، ۇكىمەت ءداستۇرلى، جالپى قابىلدانعان تالاپتاردى عانا ەمەس، ونىڭ ىشىندە سالىق ساياساتىنىڭ تۇراقتىلىعىن، زاڭنامانىڭ ۇستەمدىگىن ەسكەرەتىنىن جانە ادام كاپيتالىن دامىتۋعا ەرەكشە نازار اۋدارىلاتىنىن اتاپ ءوتتى.
«قازاقستاندىق شەتەلدىك ينۆەستورلار كەڭەسى» قاۋىمداستىعىنىڭ ديرەكتورى جاننا بايداشيەۆا ينۆەستورلار قانداي دا ءبىر ەلگە ينۆەستيتسيا سالۋ تۋرالى شەشىم قابىلداعاندا، ءارقاشان بىرنەشە فاكتورعا، ياعني زاڭ ۇستەمدىگىنە، سالىق زاڭناماسىنا، سالىق جۇيەسىنە، ادامداردىڭ الەۋەتىنە جانە تەحنولوگيالىق فاكتورلارعا قارايتىنىن راستادى.
«قازاقستاندى بيزنەس جۇرگىزۋ كوپىرى كورەتىن ينۆەستورلار ايتقانداي، قازاقستاندا سيفرلاندىرۋ دەڭگەيى قازىر وتە جاقسى. ءبىز ءوڭىر بويىنشا ءبىرىنشىمىز. ءارى قاراي، ارينە، بيزنەسپەن بىرلەسە تسيفرلىق كۇن ءتارتىبىن دامىتۋدى جوسپارلاپ وتىرمىز»، - دەدى جاننا بايداشيەۆا.