پرەزيدەنت تارازدا قولونەرشىلەر كورمەسىن ارالاپ كوردى
قازاقپارات بۇل تۋرالى اقورداعا سىلتەمە جاساپ حابارلايدى.
پرەزيدەنت «شەبەر شاڭىراق» مۇمكىندىگى شەكتەۋلى جاندار قوعامدىق بىرلەستىگى، «وشپەس مۇرا» جامبىل وبلىسى قولونەر شەبەرلەرىنىڭ قاۋىمداستىعى، «جامبىل وبلىسى قولونەرشىلەر وداعى» قوعامدىق بىرلەستىگى، اسىل-ديزاين» ءسان ءۇيى جانە باسقا دا ۇيىمدار شەبەرلەرى جاساعان بۇيىمداردى تاماشالادى. كورمەگە 29 قولونەر شەبەرىنىڭ اعاش، تەرى جانە كيىزدەن جاساعان بۇيىمدارى، قىش ىدىستار، پاننو، ۇلتتىق مۋزىكالىق اسپاپتار، ۇلتتىق كيىم ۇلگىلەرى، ات ابزەلدەرى، زەرگەرلىك بۇيىمدار قويىلعان.
مەملەكەت باسشىسىنا كورسەتىلگەن «كيىز ءۇي» ينستاللياتسياسىندا جاستارعا توقىما، كيىز باسۋ، قۇراق قۇراۋ، ۇرشىق ءيىرۋ، سىرماق سىرۋ جانە باسقا دا ونەر تۇرلەرى بويىنشا شەبەرلىك ساباعى وتكىزىلدى.
سونىمەن قاتار كورمەدە كوشپەندىلەردىڭ زاماناۋي الەمدىك ۇلگىدە جاڭعىرتىلىپ، نەو-فولكلور ستيلىندە تىگىلگەن كوپعاسىرلىق ءداستۇرلى كيىمدەرى جانە دالا گۇلدەرى مەن شوپتەرىنىڭ حوش يىستەرىنەن جاسالعان ءيىسسۋلار كورسەتىلدى.
جۋىردا تاراز دۇنيەجۇزىلىك قولونەرشىلەر قالالارى تىزىمىنە ەنگەنى تۋرالى سەرتيفيكات الدى.