توقايەۆ جوعارى تەحنولوگيالى قۇرىلعىلارمەن جابدىقتالعان اۋىل ەمحاناسىنا باردى

بايزاق. قازاقپارات - پرەزيدەنت قاسىم-جومارت توقايەۆ جامبىل وبلىسى، بايزاق اۋدانى سارىكەمەر اۋىلىنداعى جاڭا ەمحانانىڭ جۇمىسىمەن تانىستى.

قازاقپارات بۇل تۋرالى اقورداعا سىلتەمە جاساپ حابارلايدى.

قاسىم-جومارت توقايەۆقا تاياۋدا سالىنعان مەديتسينالىق مەكەمەدە 125 مىڭ ادام تىركەۋدە تۇرعانى جونىندە باياندالدى.

اۋىل ەمحاناسىندا كۇن سايىن پروفيلاكتيكالىق، جەدەل جانە جوسپارلى مەديتسينالىق كومەك كورسەتىلەدى. ەمحانا زاماناۋي جوعارى تەحنولوگيالى قۇرىلعىلارمەن جابدىقتالعان. اۋدان تۇرعىندارىنا 260 تان اسا دارىگەر، ورتا جانە كىشى ساناتتاعى مەديتسينا قىزمەتكەرلەرى قىزمەت كورسەتەدى.

فۋنكتسيونالدى دياگنوستيكا بولىمشەسىن ارنايى ارالاپ كورگەن مەملەكەت باسشىسىنا كومپيۋتەرلىك توموگرافيا، سيفرلىق رەنتگەن جانە مامموگرافيا اپپاراتتارى تانىستىرىلدى.

سونىمەن قاتار پرەزيدەنتكە جامبىل وبلىسىنداعى دەنساۋلىق ساقتاۋ سالاسىنىڭ دامۋ بارىسى باياندالدى. 2023-2024-جىلدارى وڭىردە 30 مەديتسينا نىسانىن سالۋ جوسپارلانعان. وعان بيۋجەتتەن 5,2 ميلليارد تەڭگە ءبولىنىپ وتىر.

بىلتىر مەديتسينا قىزمەتكەرلەرىنىڭ جالاقىسى 20-30 پايىزعا ارتتى. بيىل تاعى سونداي كولەمدە وسەدى. پرەزيدەنتتىڭ تاپسىرماسىمەن قولعا الىنعان «اۋىلداعى دەنساۋلىق ساقتاۋدى جاڭعىرتۋ» ۇلتتىق جوباسى اياسىندا رەسپۋبليكا بويىنشا 309 مەديتسينالىق-سانيتاريالىق العاشقى كومەك نىسانى سالىنىپ، 12 ورتالىق اۋداندىق اۋرۋحاناعا كۇردەلى جوندەۋ جۇمىستارى جۇرگىزىلەدى.

سونىمەن قاتار ۇلتتىق جوبا اياسىندا دەنساۋلىق ساقتاۋ ۇيىمدارىن 575 دانا زاماناۋي مەديتسينالىق قۇرىلعىمەن جابدىقتاۋ قاراستىرىلعان. وسى شارالاردى جۇزەگە اسىرۋ ناتيجەسىندە 2023-جىلى قوسىمشا 2,4 ميلليوننان استام اۋىل حالقى ارناۋلى مەديتسينالىق كومەكپەن قامتاماسىز ەتىلەدى.

ەسكە سالايىق، پرەزيدەنت جامبىل وبلىسىندا جۇمىس ساپارىمەن ءجۇر.

ق. توقايەۆ جازۋشى شەرحان مۇرتازانىڭ ەسكەرتكىشىنە گۇل شوعىن قويعاننان كەيىن زيالى قاۋىم وكىلدەرىمەن اڭگىمەلەستى.

كەيىن مەملەكەت باسشىسى شەرحان مۇرتازا اتىنداعى حالىقارالىق تاراز يننوۆاتسيالىق ينستيتۋتىنىڭ ستۋدەنتتەر ۇيىندە وقۋ ورنىنىڭ وقىتۋشىلارمەن جانە ستۋدەنتتەرمەن كەزدەستى.

بايزاق اۋدانىنىڭ كوكتال اۋىلدىق ورتا مەكتەبىنىڭ جۇمىسىمەن تانىسقان قاسىم-جومارت توقايەۆ ۇستازدار قاۋىمىمەن جۇزدەسىپ، جاڭا ءارى جايلى مەكتەپتە ءبىلىم الىپ جاتقان وقۋشىلارعا تابىس تىلەدى. بايزاق اۋدانى مىرزاتاي اۋىلىنداعى «اۋليە اتا فەنيكس» قۇس فابريكاسىندا سەحتاردى ارالاپ كوردى.

ودان ءارى پرەزيدەنت قاراپايىم اۋىل تۇرعىنىنىڭ تۇرمىس-تىرشىلىگىمەن تانىسۋ ءۇشىن جەكە قوسالقى شارۋاشىلىعىن جۇرگىزىپ وتىرعان قوستوبە اۋىلى تۇرعىنىنىڭ ۇيىنە باردى.