تۇركىستاندىق پوليتسەي تاسقىن سۋعا باتىپ بارا جاتقان تۇرعىندى قۇتقاردى

تۇركىستان. قازاقپارات - تۇركىستان وبلىسىندا ءتارتىپ ساقشىسى تاسقىن سۋعا باتىپ بارا جاتقان تۇرعىندى قۇتقارىپ قالدى، دەپ حابارلايدى قازاقپارات ءتىلشىسى.

وقيعا 2- اقپان كۇنى بولعان. ساۋران اۋدانىن سۋ العان ساتتە، شاعا اۋىلىندا كەزەكشىلىكتە جۇرگەن ۋچاسكەلىك پوليتسيا ينسپەكتورى اباي بايجۇمان بەلگىسىز ەر ادام تاسقىن سۋعا قۇلاپ كەتكەنىن كورگەن.

بىردەن كولىكتى توقتاتقان ول كيىممەن سۋعا كىرىپ، اعىن سۋدىڭ ورتاسىندا بولعان ەر ازاماتتى قاۋىپسىز جەرگە الىپ شىققان. كەيىن قۇتقارىلعان ادامدى جەدەل جاردەم قىزمەتكەرلەرى اۋرۋحاناعا الىپ كەتكەن.

«قيىن ساتتە تۇركىستان وبلىسىنىڭ پوليتسەيلەرى جۇدىرىقتاي جۇمىلىپ، ازاماتتاردى ەۆاكۋاتسيالاۋعا جانە ولاردىڭ مۇلكىن قورعاۋعا اتسالىسىپ جاتىر. ماسەلەن، نەبارى 2 كۇن ىشىندە تۇركىستان وبلىسىنىڭ پوليتسەيلەرى ارنايى ماماندارمەن بىرگە 200 دەن استام ادامدى ەۆاكۋاتسيالاپ، قاۋىپسىز جەرگە الىپ شىقتى»، - دەلىنگەن تۇركىستان وبلىسى پوليتسيا دەپارتامەنتىنىڭ باسپا ءسوز قىزمەتى تاراتقان اقپاراتتا.

2- اقپاندا تۇركىستان وبلىسىنىڭ بىرنەشە اۋدانىن سۋ باسقان بولاتىن. ادامدار ەۆاكۋاتسيالانىپ، وڭىرگە توتەنشە جاعدايلار ءمينيسترى يۋري يلين ۇشىپ شىقتى.

ساۋران اۋدانىندا مەكتەپ وقۋشىلارى ونلاين وقۋعا كوشتى. سونداي-اق وسى اۋداندا 7 بالاباقشا جۇمىسىن توقتاتتى. تۇركىستان وبلىسىنىڭ اكىمى دارحان ساتىبالدى سۋ كىرگەن ەلدى مەكەن تۇرعىندارىمەن كەزدەستى.

بۇگىن ءمالىم ەتىلگەندەي، ساۋران اۋدانىنىڭ ەۆاكۋاتسيالانعان تۇرعىندارى ۇيلەرىنە ورالا باستادى. توتەنشە جاعدايلار ءمينيسترى يۋري يلين اتالعان اۋداندا توتەنشە جاعداي جاريالانۋى مۇمكىن ەكەنىن ايتتى.

سونداي-اق توتەنشە جاعدايلار ءبىرىنشى ۆيتسە-ءمينيسترى يبراگيم كۇلشىمبايەۆ ورتالىق كوممۋنيكاتسيالار قىزمەتىندە وتكەن بريفينگىدە تۇركىستان وبلىسىنداعى سۋ تاسقىنىنا قاتىستى سوڭعى مالىمەتتەردى جاريالادى.

«قازىر رەسپۋبليكانىڭ وڭتۇستىك وڭىرلەرىندە، ونىڭ ىشىندە تۇركىستان وبلىسىندا سۋ تاسقىنى جاعدايى كۇردەلەنە ءتۇستى. 1-2- اقپاندا قاتتى جاۋىن-شاشىن مەن تەمپەراتۋرانىڭ 7-8 گرادۋسقا دەيىن كوتەرىلۋى ناتيجەسىندە اتالعان وبلىستىڭ 4 اۋدانىن تاۋدان ەرىگەن قار سۋلارى شايا باستادى. اتاپ ايتقاندا، ساۋران، ورداباسى، سوزاق جانە بايدىبەك اۋدانىنىڭ اۋماعى. سونداي-اق ارىس جانە كەنتاۋ قالالارى دا بار. سالدارىنان 21 ەلدى مەكەن جانە 234 اۋلا اۋماعى سۋ استىندا قالدى»، - دەدى ول.

سونداي-اق ونىڭ ايتۋىنشا، سۋ تاسقىنىنان ۇيلەر قۇلاسا، شىعىن جەرگىلىكتى بيۋجەتتەن وتەلەتىنىن ايتتى.

جالپى اعىن سۋ سالدارىنان وبلىستىق ماڭىزى بار 10 نان استام جول بۇلىنگەن.