مەملەكەت باسشىسى كاسىپكەرگە ءدانۋاتقىش اپپاراتىن سىيعا تارتتى

None
جامبىل وبلىسى. قازاقپارات - مەملەكەت باسشىسى قاراپايىم اۋىل تۇرعىنىنىڭ تۇرمىس-تىرشىلىگىمەن تانىسۋ ءۇشىن جەكە قوسالقى شارۋاشىلىعىن جۇرگىزىپ وتىرعان قوستوبە اۋىلى تۇرعىنىنىڭ ۇيىنە باردى، دەپ حابارلايدى اقوردا.

اۋىل تۇرعىنى سالامات راحمانبەرديەۆ 2020-جىلى «اۋىل اماناتى» باعدارلاماسى اياسىندا 2,5 پايىزبەن 3,6 ميلليون تەڭگە نەسيە الىپ، 6 باس ءمۇيىزدى ءىرى قارا، 3 باس جىلقى، 10 باس قوي ساتىپ العان.

كاسىپكەر مال بورداقىلاپ ساتۋمەن اينالىسادى. قازىر ءتول باسىن ارتتىرىپ، تاپقان تابىسىنا جۇك كولىگىن ساتىپ العان. ول ءوز ءناپاقاسىن تابۋمەن قاتار، اۋىلدىڭ ەكى تۇرعىنىن جۇمىسپەن قامتىپ وتىر.


سالامات راحمانبەرديەۆ الداعى ۋاقىتتا جەم ساتاتىن دۇكەن اشىپ، مال باسىن كوبەيتۋ ءۇشىن تاعى دا جەڭىلدىكپەن 10 ميلليون تەڭگە كرەديت الۋعا نيەتتەنىپ وتىرعانىن جەتكىزدى.

مەملەكەت باسشىسى ەڭبەكقور جىگىتتىڭ كاسىبىنە تابىس تىلەپ، ءوز اتىنان ءدانۋاتقىش اپپاراتىن سىيعا تارتتى.

ەسكە سالايىق، پرەزيدەنت جامبىل وبلىسىندا جۇمىس ساپارىمەن ءجۇر.

ق. توقايەۆ جازۋشى شەرحان مۇرتازانىڭ ەسكەرتكىشىنە گۇل شوعىن قويعاننان كەيىن زيالى قاۋىم وكىلدەرىمەن اڭگىمەلەستى.

كەيىن مەملەكەت باسشىسى شەرحان مۇرتازا اتىنداعى حالىقارالىق تاراز يننوۆاتسيالىق ينستيتۋتىنىڭ ستۋدەنتتەر ۇيىندە وقۋ ورنىنىڭ وقىتۋشىلارمەن جانە ستۋدەنتتەرمەن كەزدەستى.

بايزاق اۋدانىنىڭ كوكتال اۋىلدىق ورتا مەكتەبىنىڭ جۇمىسىمەن تانىسقان قاسىم-جومارت توقايەۆ ۇستازدار قاۋىمىمەن جۇزدەسىپ، جاڭا ءارى جايلى مەكتەپتە ءبىلىم الىپ جاتقان وقۋشىلارعا تابىس تىلەدى.

بايزاق اۋدانى مىرزاتاي اۋىلىنداعى «اۋليە اتا فەنيكس» قۇس فابريكاسىندا سەحتاردى ارالاپ كوردى.

سوڭعى جاڭالىقتار