پرەزيدەنتكە «اۋىل اماناتى» باعدارلاماسىنىڭ جۇزەگە اسىرىلۋ بارىسى باياندالدى
قازاقپارات بۇل تۋرالى اقورداعا سىلتەمە جاساپ حابارلايدى.
پرەزيدەنتكە «اۋىل اماناتى» باعدارلاماسىنىڭ جۇزەگە اسىرىلۋ بارىسى جونىندە باياندالدى. سونداي-اق وبلىستاعى جايىلىمدىق جەرلەردىڭ كولەمىن ۇلعايتۋ، اۋىل شارۋاشىلىعى جەرلەرىن ءتيىمدى پايدالانۋ بويىنشا اتقارىلعان جۇمىستار جونىندە مالىمەت بەردى.
اتالعان باعدارلاما جامبىل وبلىسىندا 2019-جىلدان بەرى «جامبىل وبلىسى تۇرعىندارىنىڭ تۇرمىستىق تابىسىن ارتتىرۋ» اتاۋىمەن جۇزەگە اسىرىلىپ، وڭ ناتيجەلەر كورسەتتى.
بۇل جوبا بويىنشا 2025-جىلعا دەيىن جامبىل وبلىسىنىڭ 153 اۋىلدىق وكرۋگ حالقىنا 2,5 پايىز مولشەرلەمەمەن 87,8 ميلليارد تەڭگە نەسيە بەرۋ كوزدەلگەن.
سونىڭ ءبىرى - وسى قوستوبە اۋىلدىق وكرۋگى. باعدارلامانىڭ بەس باعىتى بويىنشا قوستوبەنىڭ 256 اۋىل تۇرعىنىنا كاسىپپەن اينالىسۋعا 886 ميلليون تەڭگەدەن استام نەسيە بەرىلگەن. بۇل قارجى اۋىل حالقىنا ءتورت تۇلىك مال، باۋ-باقشا وسىرۋمەن، باسقا دا كاسىپپەن اينالىسىپ، وتباسىلىق تابىسىن ارتتىرۋ ءۇشىن ءبولىندى.
سونداي-اق «قوستوبە-2019» كووپەراتيۆىنە ليزينگ ارقىلى اۋىل شارۋاشىلىعى تەحنيكالارىن الۋعا جەڭىلدەتىلگەن نەسيە بەرىلدى. قازىر كووپەراتيۆ قاراماعىندا 12 اۋىل شارۋاشىلىعى تەحنيكاسى مەن 401 گەكتار جەرى بار. وعان 175 ادام مۇشە. ولاردىڭ قاتارى بىرتىندەپ كوبەيىپ كەلەدى. كووپەراتيۆ مۇشەلەرى باقشا داقىلدارىن وسىرۋمەن قاتار، مال شارۋاشىلىعىنا جەم-ءشوپ ازىرلەۋمەن شۇعىلدانادى.
جالپى، «اۋىل اماناتى» باعدارلاماسىن رەسپۋبليكانىڭ بارلىق وڭىرىندە جۇزەگە اسىرۋ ءۇشىن وبلىس اكىمدىكتەرىنە 2023-جىلى 52,4 ميلليارد تەڭگە بولىنەدى. بۇل قارجىعا 11606 ميكروكرەديت، ونىڭ ىشىندە جامبىل وبلىسى بويىنشا 11,5 ميلليارد تەڭگە كولەمدە 3,6 مىڭ ميكروكرەديت بەرۋ جوسپارلانىپ وتىر.
سونداي-اق رەسپۋبليكالىق بيۋدجەتتى ناقتىلاۋ اياسىندا وبلىس اكىمدەرى 2023-جىلى اۋىل حالقىنا قوسىمشا 15090 ميكروكرەديت بەرۋ ءۇشىن 73,5 ميلليارد تەڭگەگە ءوتىنىم بەردى.
سونىمەن قاتار مەملەكەت باسشىسى «قوستوبە-2019» كووپەراتيۆىندە وبلىستاعى اۋىل شارۋاشىلىعى ءونىمىن ءوندىرۋشى شارۋالارمەن كەزدەستى. پرەزيدەنت اۋىل شارۋاشىلىعى كووپەراتيۆتەرىن قۇرۋدىڭ وڭ تاجىريبەسىن ەلىمىزدىڭ باسقا دا وڭىرلەرىندە تاراتۋدىڭ ماڭىزدى ەكەنىن اتاپ ءوتتى.
«جالپى، اۋىل شارۋاشىلىعىنا ايرىقشا ءمان بەرىپ وتىرمىز. پرەزيدەنت بولىپ سايلاعاننان كەيىن، ەڭ الدىمەن، اۋىلدىق اۋماقتاردى دامىتۋ تۇجىرىمداسىن ازىرلەۋ تۋرالى جارلىققا قول قويدىم. الداعى ءۇش جىلدا كووپەراتسيالاردى دامىتۋعا 1 تريلليون تەڭگە بولەمىز. وسى قوماقتى قارجىنى ءتيىمدى پايدالانۋ كەرەك. مەملەكەت اۋىل شارۋاشىلىعى ەڭبەككەرلەرىنە ءارقاشان قولداۋ بىلدىرەدى»، - دەدى پرەزيدەنت.
بۇل مىندەت سايلاۋالدى باعدارلاماسىنا ەنگىزىلگەنىن، سوندىقتان ونىڭ ورىندالۋ بارىسى پرەزيدەنت اكىمشىلىگىنىڭ تىكەلەي باقىلاۋىندا بولاتىنىن ەسكەرتتى.
ەسكە سالايىق، پرەزيدەنت جامبىل وبلىسىندا جۇمىس ساپارىمەن ءجۇر.
ق. توقايەۆ جازۋشى شەرحان مۇرتازانىڭ ەسكەرتكىشىنە گۇل شوعىن قويعاننان كەيىن زيالى قاۋىم وكىلدەرىمەن اڭگىمەلەستى.
كەيىن مەملەكەت باسشىسى شەرحان مۇرتازا اتىنداعى حالىقارالىق تاراز يننوۆاتسيالىق ينستيتۋتىنىڭ ستۋدەنتتەر ۇيىندە وقۋ ورنىنىڭ وقىتۋشىلارمەن جانە ستۋدەنتتەرمەن كەزدەستى.
بايزاق اۋدانىنىڭ كوكتال اۋىلدىق ورتا مەكتەبىنىڭ جۇمىسىمەن تانىسقان قاسىم-جومارت توقايەۆ ۇستازدار قاۋىمىمەن جۇزدەسىپ، جاڭا ءارى جايلى مەكتەپتە ءبىلىم الىپ جاتقان وقۋشىلارعا تابىس تىلەدى.
بايزاق اۋدانى مىرزاتاي اۋىلىنداعى «اۋليە اتا فەنيكس» قۇس فابريكاسىندا سەحتاردى ارالاپ كوردى.