اۋا رايى ەسكەرتۋىن ەلەمەي ساياحاتقا شىعاتىن تۋريستەر دە جازالانباق

استانا. قازاقپارات - ەلىمىزدە اۋا رايى قولايسىزدىعىنا بايلانىستى ەسكەرتۋگە قۇلاق اسپاي جولعا شىققانى ءۇشىن جازا ارقالايتىندار قاتارى كوبەيە تۇسپەك.

توتەنشە جاعدايلار مينيسترلىگى ەرەجەگە باعىنباعان كولىك جۇرگىزۋشىلەرىمەن قوسا تۋريستەردى دە جازاعا تارتپاق. بۇل تۋرالى اتالعان ۆەدومستۆونىڭ ءبىرىنشى ۆيتسە- ءمينيسترى يبراگيم كۇلشىمبايەۆ ءمالىم ەتتى، دەپ حابارلايدى قازاقپارات ءتىلشىسى.

«وڭىرلىك توتەنشە جاعدايلار دەپارتامەنتتەرى مەن وعان قاراستى بولىمشەلەردە تۋريستەردىڭ ساياحاتتاۋ مارشرۋتتارى تۋرالى مالىمەتتەر جوق. وسىعان بايلانىستى قۇتقارۋشىلار جوعالعان تۋريستەردى ىزدەۋگە كوپ رەسۋرس پەن ۋاقىت جۇمسايدى. تاۋلى ايماقتاردا جوعالعان ادامدى ىزدەۋ بارىسىنا تومەن تەمپەراتۋرا مەن جاۋىن- شاشىن تىكەلەي اسەر ەتەدى. وسى ورايدا ءبىز بارلىق ءوڭىر بويىنشا توتەنشە جاعدايلار دەپارتامەنتتەرىنە تۋريستەردىڭ ءجۇرىپ- تۇرۋ مارشرۋتتارى تۋرالى حابار بەرۋ باستاماسىن كوتەرىپ جاتىرمىز. سونىمەن قاتار جەرگىلىكتى تجد- دىڭ جۇمىس ىستەۋ ءتارتىبى مەن قۇقىعى ايقىندالماق»، - دەدى يبراگيم كۇلشىمبايەۆ و ك ق- دە وتكەن بريفينگىدە.

ونىڭ تۇسىندىرۋىنشە، اتالعان جاڭاشىلدىقتى ەنگىزۋ «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ازاماتتىق قورعاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» ازىرلەنىپ جاتقان زاڭ شەڭبەرىندە جوسپارلانىپ وتىر.

«وسىلايشا الداعى ۋاقىتتا جوعارىدا اتالعان نورمالاردى ەلەمەگەنى ءۇشىن تۋريستەردى جاۋاپكەرشىلىككە تارتۋ ءراسىمىن زاڭنامالىق دەڭگەيدە رەتتەۋدى جوسپارلاپ وتىرمىز»، - دەيدى سپيكەر.

بۇعان دەيىن ءبىرىنشى ۆيتسە- مينيستر اۋا رايى ەسكەرتۋىن ەلەمەي جولعا شىققان 8 كولىك جۇرگىۋشىسىنىڭ جاۋاپقا تارتىلعانى تۋرالى ايتقان ەدى.