تۇركىستان وبلىسىندا تاسقىن سۋ كولىكتەردى جول ۇستىنەن اعىزىپ جىبەردى
«شولاققورعان - شايان» جولىندا تاسقىن سۋ ءنوپىرى «Toyota Camry» كولىگىن جولدان شىعارىپ جىبەرگەن. كولىكتەگى ەكى ادام دەر كەزىندە قۇتقارىلدى.
ءدال وسىنداي جاعداي ارىس قالاسىندا دا بولعان. مۇندا سۋ ورتاسىندا قالعان «نيۆا» كولىگىنەن 5 جولاۋشى قاۋىپسىز جەرگە ەۆاكۋاتسيالاندى.
ەسكە سالايىق، كەشە بايدىبەك اۋدانىنداعى «شايان - مىڭبۇلاق» وبلىستىق ماڭىزى بار اۆتوجولىمەن كەلە جاتقان «ۆاز-2106» كولىگىن تاسقىن سۋ اعىزىپ اكەتكەن ەدى. اۆتوكولىك ىشىندە 39 جاستاعى ەر ادام، 33 جاستاعى جۇكتى ايەل مەن 7 جاسار بالا بولعان. ولار تۇگەلىمەن دەرلىك سۋ استىندا قالعان ماشينانىڭ ۇستىنە شىعىپ، امان قالدى. تۇرعىنداردى قۇتقارۋعا ۇمتىلعاندار اراسىندا بولعان مىڭبۇلاق اۋىلدىق وكرۋگىنىڭ اكىمى عالىمجان اكىمبايەۆ جۇكتى ايەل مەن بالانى بەلىنە ارقان بايلاپ سۋدان الىپ شىقتى.
2-اقپاندا تۇركىستان وبلىسىنىڭ بىرنەشە اۋدانىن سۋ باسقان بولاتىن. ادامدار ەۆاكۋاتسيالانىپ، وڭىرگە توتەنشە جاعدايلار ءمينيسترى يۋري يلين ۇشىپ شىقتى.
ساۋران اۋدانىندا مەكتەپ وقۋشىلارى ونلاين وقۋعا كوشتى. سونداي- اق وسى اۋداندا 7 بالاباقشا جۇمىسىن توقتاتتى. تۇركىستان وبلىسىنىڭ اكىمى دارحان ساتىبالدى سۋ كىرگەن ەلدى مەكەن تۇرعىندارىمەن كەزدەستى.
بۇگىن ءمالىم ەتىلگەندەي، ساۋران اۋدانىنىڭ ەۆاكۋاتسيالانعان تۇرعىندارى ۇيلەرىنە ورالا باستادى.
سونداي- اق توتەنشە جاعدايلار ءبىرىنشى ۆيتسە- ءمينيسترى يبراگيم كۇلشىمبايەۆ ورتالىق كوممۋنيكاتسيالار قىزمەتىندە وتكەن بريفينگىدە تۇركىستان وبلىسىنداعى سۋ تاسقىنىنا قاتىستى سوڭعى مالىمەتتەردى جاريالادى.
«قازىر رەسپۋبليكانىڭ وڭتۇستىك وڭىرلەرىندە، ونىڭ ىشىندە تۇركىستان وبلىسىندا سۋ تاسقىنى جاعدايى كۇردەلەنە ءتۇستى. 1-2-اقپاندا قاتتى جاۋىن- شاشىن مەن تەمپەراتۋرانىڭ 7-8 گرادۋسقا دەيىن كوتەرىلۋى ناتيجەسىندە اتالعان وبلىستىڭ 4 اۋدانىن تاۋدان ەرىگەن قار سۋلارى شايا باستادى. اتاپ ايتقاندا، ساۋران، ورداباسى، سوزاق جانە بايدىبەك اۋدانىنىڭ اۋماعى. سونداي- اق ارىس جانە كەنتاۋ قالالارى دا بار. سالدارىنان 21 ەلدى مەكەن جانە 234 اۋلا اۋماعى سۋ استىندا قالدى»، - دەدى ول.
ۆيدەودان الىنعان كادر