ە ا ە و اۋماعىنا ورتاق ۆاليۋتا ەنگىزۋ ماسەلەسى كۇن تارتىبىندە جوق - باقىتجان ساعىنتايەۆ

استانا. قازاقپارات - ەۋرازيالىق ەكونوميكالىق كوميسسيانىڭ ەكونوميكا جانە قارجى ساياساتى ءمينيسترى باقىتجان ساعىنتايەۆ اتالعان وداق اياسىندا ورتاق ۆاليۋتا قۇرۋ تالقىلانىپ جاتپاعانىن ايتتى، - دەپ حابارلايدى قازاقپارات ءتىلشىسى.

«بۇل بىزدەگى وداق كەلىسىمشارتىنان شىعىپ وتىر. ول كەلىسىمشارتقا سايكەس، 2025 -جىلعا قاراي ءبىز ە ا ە و ەلدەرىنە ورتاق، ءبىرىڭعاي قارجى نارىعىن قالىپتاستىرۋىمىز كەرەك. وسىنىڭ اياسىندا قارجىلى سالاسىنىڭ زاڭناماسىن ۇندەستىرۋ تۋرالى كەلىسىم قابىلدانۋى كەرەك. قارجى سالاسى دەگەندە بانكتەر، باعالىق قاعازدار، ساقتاندىرۋ نارىعى ەكەنىن بىلەسىز»، - دەدى باقىتجان ساعىنتايەۆ ەۋرازيالىق ۇكىمەتارالىق كوميسسيانىڭ الماتىدا ءوتىپ جاتقان كەڭەيتىلگەن وتىرىسىنىڭ كۋلۋارىندا.

ونىڭ ايتۋىنشا، وداققا مۇشە ەلدەردىڭ قارجى سالاسىن رەتتەۋشى ورگاندارى اراسىندا دا، ەۋرازيالىق ەكونوميكالىق كوميسسيا اياسىندا وسى باعىتتاعى جۇمىستار جالعاسىپ جاتىر.

«ونىڭ ۇستىنە ورتاق قارجى نارىعىن قالىپتاستىرۋ تۋرالى 2019 -جىلى قابىلدانعان تۇجىرىمداما بار. بۇل قۇجات بويىنشا دا جۇمىس ءجۇرىپ جاتىر. كەلىسىمشارت بويىنشا 2025 -جىلعا قاراي ۇكىمەتتەر ۇستىنەن قارايتىن قارجى رەتتەۋشى ورگان قۇرىلۋى كەرەك. ونىڭ بازاسى الماتىدا بولاتىنى ايتىلعان. قازىر ە ا ە و قارجى رەتتەۋشىلەرى كوميسسيامەن بىرگە وسى باعىتتا جۇمىس ىستەپ جاتىر. بۇل جەردە ورتاق ۆاليۋتا ەنگىزۋ ماسەلەسى تۋىنداي ما؟ جوق، ارينە. ءبىزدىڭ بازالىق قۇجاتتاردىڭ بارىندە - كەلىسىمشارتتا دا، تۇجىرىمدامادا دا، باسقا قۇجاتتاردا دا ول تۋرالى ەشتەڭە ايتىلمايدى. تەك زاڭنامانى ۇندەستتىرۋ تۋرالى عانا ايتىلعان. ياعني، بۇگىندە كوميسسيا اياسىندا دا، ەش جەردىڭ كۇن تارتىبىندە ورتاق ۆاليۋتا ەنگىزۋ تۋرالى ماسەلە قويىلىپ وتىرعان جوق»، - دەدى ول.