توقايەۆ: ەڭ باستى مىندەتىمىز - مەملەكەتتىلىگىمىزدى ساقتاپ قالۋ

تاراز. قازاقپارات - ەڭ باستى مىندەتىمىز - مەملەكەتتىلىگىمىزدى ساقتاپ قالۋ. بۇل تۋرالى بۇگىن تارازدا جازۋشى شەرحان مۇرتازانىڭ ەسكەرتكىشىنە گۇل شوعىن قويۋ راسىمىنەن كەيىن زيالى قاۋىم وكىلدەرىمەن اڭگىمەلەسۋ كەزىندە مەملەكەت باسشىسى قاسىم- جومارت توقايەۆ ايتتى، دەپ حابارلايدى قازاقپارات اقورداعا سىلتەمە جاساپ.

پرەزيدەنت ەلىمىز دامىپ، وركەندەۋى ءۇشىن الداعى ساياسي ناۋقاندار كەزىندە دە، ەڭ الدىمەن، اۋىزبىرشىلىك قاجەت ەكەنىنە نازار اۋداردى.

«ەڭ باستى ماسەلە - ءادىل، اشىق بولۋ كەرەك. وسىنداي لايىقتى ادامدار ءبىزدىڭ پارلامەنتكە كەلسە، ەلىمىزدىڭ دامۋىنا ۇلەس قوسادى دەپ ۇمىتتەنەمىن. دۇنيەجۇزىندە بولىپ جاتقان جاعدايدى وزدەرىڭىز جاقسى بىلەسىزدەر. ىشكى ساياسات تا، سىرتقى ساياسات تا سىندارلى، سالماقتى بولۋى كەرەك. ەڭ باستى مىندەتىمىز - مەملەكەتتىلىگىمىزدى ساقتاپ قالۋ. سىن- قاتەرلەر از ەمەس. سوندىقتان ءبارىمىز ءبىر ەل، ءبىر حالىق، ءبىر ۇلت بولىپ ۇيىسىپ، ەل ءۇشىن قىزمەت ەتەيىك»، - دەدى ق. توقايەۆ.