قازاقستاننىڭ عىلىم سالاسىنا جاس كادرلار قاجەت - ساياسات نۇربەك

الماتى. قازاقپارات - قازاقستاننىڭ عىلىم سالاسىندا جاس كادرلاردى كوبەيتۋ قاجەت.

بۇل تۋرالى الماتىدا ءوتىپ جاتقان Digital Almaty حالىقارالىق سيفرلىق فورۋمىندا ق ر عىلىم جانە جوعارى ءبىلىم ءمينيسترى ساياسات نۇربەك ايتتى، دەپ حابارلايدى قازاقپارات ءتىلشىسى.

ءمينيستردىڭ ايتۋىنشا، قازىرگى تاڭدا ەلىمىزدە عىلىم، ءبىلىم سالاسىنىڭ كادرلارىن دايارلاۋ وتە وزەكتى ماسەلە بولىپ تۇر.

«ەلىمىزدىڭ عىلىم سالاسىندا قازىر وكىنىشكە وراي كادرلاردىڭ تاپشىلىعى بار. قازىرگى تاڭدا عىلىمي قىزمەتكەرلەردىڭ ورتا جاسى - 59 بولسا، ۇلتتىق اكادەمياداعى اكادەميكتەردىڭ ورتا جاسى - 69. بۇل قاۋىپتى جاعداي. سوندىقتان كادرلاردى دايارلاۋدى ءبىز مەكتەپتەن باستاۋىمىز كەرەك. ياعني، مەكتەپ دەڭگەيىندە بولسىن، ج و و دەڭگەيىندە بولسىن عىلىمي زەرتتەۋلەردى بىرىكتىرىپ، كادرلاردى دايارلاۋ، جاڭا تۇرپاتتى عالىمداردى نارىققا شىعارۋعا ۇلكەن باسىمدىق بەرىپ وتىرمىز»، - دەدى ساياسات نۇربەك.

سونداي-اق ونىڭ ايتۋىنشا قازىرگى ۋاقىتتا جوعارى ءبىلىم سالاسىن سيفرلاندىرۋ وتە وزەكتى ماسەلەگە اينالعان.

«پاندەميا كەزىندە كوپ ەلدەر سيفرلاندىرۋعا دايىن ەمەس ەكەندەرىن ءبىلدى. بۇل بىزگە دە ۇلكەن اباق بولدى. سول سەبەپتى قازىر مينيسترلىك سيفرلاندىرۋ سالاسىنا كوپ كوڭىل ءبولىپ وتىر. سەبەبى، ءبىلىم سالاسىندا الەم بويىنشا قازىر ۇلكەن دەموگرافيالىق قىسىم بايقالادى. مىسالى، ءۇندىستاننىڭ وزىندە جاسى 23 تەن تومەن جاستاردىڭ سانى 600 ميلليوننان اسىپ كەتتى. بۇل ۇلكەن نارىق. وكىنىشكە وراي، ەلىمىزدىڭ اكادەميالىق ينفراقۇرىلىمى مۇنداي نارىققا دايىن ەمەس. سوندىقتان عىلىم سالاسىن سيفرلاندىرۋ، گيبريدتىك فورماتتارعا كوشكەن دۇرىس»، - دەدى عىلىم جانە جوعارى ءبىلىم ءمينيسترى.

ساياسات نۇربەك Digital Almaty حالىقارالىق سيفرلىق فورۋمى اياسىندا ماڭىزدى كەلىسىم شارتتار جاسالىپ، جاڭا سەرىكتەستەر تابىلىپ جاتقانىن مالىمدەدى.

«ءبىز Hp, Master card, Huawei, Binance, Microsoft سەكىلدى تانىمال، مىقتى كومپانيالارمەن كەلىسىم شارتتار جاساستىق. Coursera كومپانياسىمەن جاساسقان كەلىسىم شارت اياسىندا بيىلدان باستاپ ءبىزدىڭ ستۋدەنتتەرگە، وقۋشىلار Coursera-نىڭ كۋرستارىنان وتەتىن بولادى. سونىمەن قاتار، Coursera-نىڭ ەلىمىزدە وقىتىلماعان ەڭ وزەكتى 654 كۋرسى قازاق تىلىنە اۋدارىلىپ، بيىل بۇكىل ۋنيۆەرسيتەتتەرگە بەرىلەتىن بولادى. جالپى، بۇگىنگى فورۋمعا ون ج و و وكىلدەرى، «روبوتوتەحنيكا» سالاسىنداعى وليمپيادالار مەن جارىستاردىڭ جۇلدەگەرلەرى قاتىسۋدا»، - دەدى عىلىم جانە جوعارى ءبىلىم ءمينيسترى ساياسات نۇربەك.

ەسكە سالايىق، كەشە الماتىدا «Digital Almaty 2023: جاڭا بولمىستاعى سيفرلىق ارىپتەستىك» اتتى حالىقارالىق فورۋم باستالعان بولاتىن.