ون جاسار بالانىڭ ۇيدەن قاشۋىنڭ سەبەبى ايتىلدى. جەتكىنشەك بالالار ۇيىنە جىبەرىلدى
بۇگىندە جاس ءوسپىرىمنىڭ ونى اسىراپ العان ەرلى-زايىپتىدان ءجابىر كورگەنى انىقتالدى، دەپ حابارلايدى قازاقپارات ءتىلشىسى.
س ق و پروكۋراتۋراسىنىڭ مالىمەتىنشە، ۇيدەن قاشىپ، ەكى كۇننەن كەيىن يەسىز ۇيدەن تابىلعان بالانىڭ دەنەسى كوگەرگەن.
قازىر اۋداندىق اۋرۋحانادا ەم الىپ جاتقان بالانىڭ جاعدايى قاناعاتتانارلىق، ءومىرى مەن دەنساۋلىعىنا قاۋىپ جوق.
«دەنەسىندەگى جاراقاتتاردىڭ بولۋى ق ر ق ك-نىڭ 140-بابى 2-بولىگى «كامەلەتكە تولماعاندى تاربيەلەۋ بويىنشا مىندەتتەرىن ورىنداماۋ» بويىنشا سوتقا دەيىنگى تەرگەپ- تەكسەرۋدىڭ باستالۋىنا نەگىز بولدى.
اۋدان پروكۋراتۋراسىنىڭ مۇرىندىق بولۋىمەن پاتروناتتىق تاربيەلەۋ تۋرالى شارت توقتاتىلدى، كامەلەتكە تولماعان بالانى اتا-اناسىنىڭ قامقورىنسىز قالعان جەتىم بالالارعا ارنالعان ءبىلىم مەكەمەسىنە ورنالاستىرۋ تۋرالى شەشىم قابىلداندى.
بالانى ءتيىستى تاربيەلەمەۋدىڭ بۇل دەرەگى قاداعالاۋ ورگانى وكىلىنىڭ قاتىسۋىمەن اۋدان اكىمدىگىنىڭ جانىنداعى كامەلەتكە تولماعانداردىڭ ىستەرى بويىنشا كوميسسيادا قارالدى»، - دەلىنگەن پروكۋراتۋرانىڭ باسپا ءسوز حابارلاماسىندا.
بۇل ءىس ەگجەي-تەگجەيلى تەكسەرىلمەك. وكىلەتتى ورگاندار - پروكۋراتۋرا، قامقورشىلىق ورگان جانە ءبىلىم باسقارماسى وكىلدەرىنەن جۇمىس توبى قۇرىلدى.
ودان بولەك، وبلىس پروكۋراتۋراسى وكىلەتتى ورگانداردىڭ لاۋازىمدى تۇلعالارىنىڭ ارەكەتىنە باعا بەرمەك.
بۇعان دەيىن س ق و ءۋاليحانوۆ اۋدانىندا 10 جاسار بالا جوعالىپ، تەك ەكى تاۋلىكتەن كەيىن عانا امان- ەسەن تابىلعانىن ايتقان ەدىك.
جاس ءوسپىرىم پوليتسيانىڭ قىزمەتتىك-ىزدەستىرۋ ءيتىنىڭ كومەگىمەن بوس تۇرعان ۇيلەردىڭ بىرىنەن تابىلدى.
وسى وقيعاعا قاتىستى س ق و ءبىلىم باسقارماسى دا تۇسىنىك بەردى.
ۆەدومستۆونىڭ باسپا ءسوز قىزمەتىنىڭ مالىمەتىنشە، ءجاسوسپىرىم 2017 -جىلى 3 جاسىندا بالالار ۇيىنەن وتباسىنا پاتروناتتىق تاربيەگە بەرىلگەن.
30-قاڭتار كۇنى پاتروناتتى تاربيەشىمەن پاتروناتتىق تاربيە تۋرالى كەلىسىمنىڭ كۇشى جويىلدى.
سونداي-اق ءبىلىم باسقارماسى دا ءىستىڭ انىق-قانىعىنا جەتۋ ءۇشىن ارنايى كوميسسيا قۇردى.
ونىڭ قورىتىندىسى بويىنشا ءۋاليحانوۆ اۋداندىق قورعانشىلىق جانە قامقورشىلىق ورگاندارىنىڭ جانە مەكتەپ ۇجىمىنىڭ جۇمىسىنا باعا بەرىلمەك.