ەلىمىزدە حيدجاما جاسايتىندارعا ليتسەنزيا بەرىلمەيدى

استانا. قازاقپارات - الايدا سوڭعى ۋاقىتتا اۋرۋدى قان شىعارۋ ءتاسىلى ارقىلى ەمدەيتىندەر كوبەيگەن. ماماندار بۇل ءتاسىلدىڭ دەنساۋلىققا كەرى اسەرى بولۋى مۇمكىن، - دەيدى.

سەبەبى قان شىعارۋعا مۇلدەم بولمايتىن جاعدايلار بولادى. دارىگەرلەر، بۇل پروتسەدۋرانى قاداعالاپ، زاڭمەن رەتتەۋ قاجەت دەپ وتىر.

الەۋمەتتىك جەلىدە تاراعان مىنا بەينەجازبا كوپتىڭ ۇرەيىن تۋعىزدى. جاڭا تۋعان نارەستەنىڭ ماڭدايىن ءتىلىپ، قان شىعارىپ جاتقان ەمشىنىڭ ارەكەتى جەلى قولدانۋشىلارىنىڭ اشۋىنا ءتيدى. وندا نارەستەگە حيدجاما جاساپ جاتقانىن كورۋگە بولادى. ال كاسىبي مەديتسينا ماماندارى بۇل پروتسەدۋرانىڭ مەديتسينالىق قىزمەت تۇرىنە جاتپايتىنىن ايتادى. ءداستۇرلى مەديتسيناعا ءدال وسى شەرتپە ەمى كىرمەگەن. ءتىپتى، قازىر كۋرس وقىپ، سەرتيفيكات العاندار مۇنى كاسىپكە اينالدىردى دەپ دابىل قاقتى.

جاسان زەكەي ۇلى، مەديتسينا عىلىمدارىنىڭ دوكتورى، پروفەسسور:

- حيدجامانى ءبىز 2 جىلدان بەرى عانا ەستىپ جاتىرمىز. ول قازاق تاريحىندا جوق. حيدجامانى قايدان ۇيرەندىڭ دەسە ايتادى بالەنباي دارىگەر اشقان كۋرسقا باردىم 10 كۇن ۇيرەتتى مىنە سەرتيفيكات. بۇل جاساعان قان، ول سول دونور قان تاپسىراتىن ادامداردىڭ جۇمىسىن اتقارىپ وتىر، دالاعا توگىپ وتىر. ءبىر تامشى قاننىڭ سۇراۋى بار. ءىس جۇزىندە ونى دا اقشانىڭ كوزىنە اينالدىردى، ودان قانشا ادامداردىڭ كوزى كورمەي قالادى، قانشا ادام مينينگيت بولادى، مۇمكىن ۋاقىتشا داۆلەنيە تۇسكەن بولار، نەرۆتى كەسىپ تاستاسا ۋاقىتشا شانشۋ توقتايدى. ال ءىس جۇزىندە قانداي زارداپ بولادى حالىق قايدان بىلەدى؟

حيجاما ءداستۇرلى مەديتسيناعا جاتپايتىندىقتان بۇل پروتسەدۋرا زاڭنامادا جوق. سايكەسىنشە، ليتسەنزيا دا بەرىلمەيدى. ال حيجاما جاسايتىندار اۋرۋدان % 100 ايىقتىرامىز دەپ ۋادە بەرە المايتىنىن ايتادى.

بۇل عانا ەمەس، حالىق ەمى دەپ ومىرتقانى بالعامەن ۇرىپ ەمدەيتىندەر شىققان. ارنايى ماماندار ونىڭ دا زاردابى بارىن ايتادى.

يۋريي پاك، مانۋالدى تەراپيەۆت:

- مانۋلدىق تەراپيادا دۇرىس دياگنوز قويۋ ءۇشىن ارنايى ادىستەر بار. الاقانمەن سيپاۋ سياقتى تەحنيكالار بار. قولمەن سوققىلاۋ ءادىسى بۇيرەك ايماعىندا وتە مۇقيات جاسالۋى كەرەك. سەبەبى، ىشكى اعزاعا زيان تيگىزۋى مۇمكىن. الايدا بالعامەن ۇرۋ دەگەندى مەن قۇپتامايمىن. بۇگىندە ءتىپتى ونلاين وقىپ، سەرتيفيكاتىم بار دەپ جۇمىس ىستەپ جۇرگەندەر بار. دارىگەر ەمەس، مۇنداي ماماندارعا قالاي سەنۋگە بولادى؟ ال نارەستەگە حيدجاما جاساعاندار زاڭ بويىنشا جاۋاپ بەرەدى. دەنساۋلىق ساقتاۋ مينيسترلىگى بۇل جاعدايدى ارنايى باقىلاۋعا الدى. ءارى حيدجاما ورتالىقتارىنىڭ دا جۇمىسى تەكسەرىلەدى.

www.24.kz