ر ف ۇكىمەتىنىڭ ءتوراعاسى قازاقستانعا قوناقجايلىلىعى ءۇشىن العىس ءبىلدىردى
«قۇرمەتتى ەۋرازيالىق ۇكىمەتارالىق كەڭەس وتىرىسىنا قاتىسۋشىلار، ارىپتەستەر، دوستار! ەڭ الدىمەن، وزدەرىڭىزگە رەسەي پرەزيدەنتى ۆلاديمير ۆلاديميروۆيچ پۋتيننىڭ ىزگى تىلەگىن جەتكىزگىم كەلەدى جانە قازاقستانعا قوناقجايلىلىق پەن شارانى تاماشا ۇيىمداستىرعانى ءۇشىن العىس ايتامىن»، - دەپ باستادى ءسوزىن ميحايل ميشۋستين.
ونىڭ ايتۋىنشا، رەسەي فەدەراتسياسى ينتەگراتسيالىق قۇرىلىستى نىعايتۋعا باعىتتالعان باعداردىڭ ساباقتاستىعىن قامتاماسىز ەتەدى.
«بۇل ءوڭىرىمىزدىڭ ەكونوميكالىق تۇراقتىلىعى ءۇشىن قاجەت. رەسەي پرەزيدەنتى ۆلاديمير پۋتين اتاپ وتكەندەي، ە ا ە و تۇراقتى دامىپ كەلە جاتىر جانە ءوز تيىمدىلىگى مەن قاجەتتىلىگىن ايقىن كورسەتىپ وتىر. وسى ۋاقىتقا دەيىن مەملەكەتتەر اراسىنداعى ءوزارا ساۋدانىڭ ابسوليۋتتى كولەمى ءبىر جارىم ەسەدەن استامعا ارتتى. سىرتقى ساۋدا ەكى ەسەگە جۋىق ۇلعايدى. ىشكى ساۋدا اينالىمىندا قوسىلعان قۇنى جوعارى شيكىزاتتىق ەمەس تاۋارلار ۇلەسى ارتىپ كەلەدى. ءبىز بىرگە ەڭ قيىن سىناقتارعا توتەپ بەرە الامىز»، - دەدى ميحايل ميشۋستين.
ونىڭ ايتۋىنشا، سىرتقى قىسىمعا جانە كۇردەلى حالىقارالىق جاعدايعا قاراماستان، ە ا ە و ءتيىمدى جۇمىس ىستەپ جاتىر. سونىمەن قاتار تۋىنداعان ماسەلەلەردى ءوزارا قولداۋ نەگىزىندە دەر كەزىندە شەشۋگە دايىن. بۇل ءتاسىل تۇراقتىلىقتى ساقتاۋعا مۇمكىندىك بەرەدى.
«ءتوراعالىقتىڭ باسىمدىعى رەتىندە رەسەي پرەزيدەنتى «بەستىكتىڭ» تەحنولوگيالىق الەۋەتىن دامىتۋدى، شىنايى تاۋەلسىزدىككە قول جەتكىزۋدى اتاپ وتەدى. سونداي- اق سيفرلىق ترانسفورماتسيا سالاسىنداعى ءوزارا ءىس- قيمىلدى جانداندىرۋ قاجەت، بۇل رەتتە ەاەو ورتاق نارىعى جاڭا جوعارى تەحنولوگيالىق كاسىپورىنداردى ىسكە قوسىپ، ءوندىرىس پروتسەسىنە زاماناۋي شەشىمدەردى ەنگىزۋ ءۇشىن جاعدايلاردى قامتاماسىز ەتۋى ءتيىس. ازىق- تۇلىك قاۋىپسىزدىگى سالاسىندا ءبىرتۇتاس ساياسات جۇرگىزۋدىڭ دە ماڭىزى زور. ءبىز ورتاق ەنەرگەتيكالىق نارىق قۇرۋ بويىنشا بىرلەسكەن شەشىمدەر قابىلداۋدى جالعاستىرۋىمىز كەرەك. ءبىز بىرىگىپ، دوسىمىزعا جاتپايتىن ەلدەردىڭ ۆاليۋتالارىن پايدالانۋدان تۋىندايتىن ەكونوميكالىق تاۋەكەلدەردى ازايتۋعا ءتيىسپىز»، - دەپ اتاپ ءوتتى ر ف ۇكىمەتىنىڭ باسشىسى.
ونىڭ ايتۋىنشا، تاعى ءبىر باسىمدىق - جاڭا كولىك- لوگيستيكالىق ينفراقۇرىلىمدى قالىپتاستىرۋ، سونداي- اق ە ا ە و مەن سىرتقى سەرىكتەستەر مەن حالىقارالىق بىرلەستىكتەر اراسىندا ءوزارا ءتيىمدى جانە تەڭ قۇقىلى ىنتىماقتاستىقتى قۇرۋ.
بۇعان دەيىن الماتىدا ەۋرازيالىق ۇكىمەتارالىق كەڭەستىڭ شاعىن قۇرامداعى وتىرىسى ءوتىپ جاتقانى تۋرالى جازعان بولاتىنبىز.
اۆتور
الما مۇقانوۆا