تۇركىستان وبلىسىنىڭ اكىمى تاسقىن سۋ كىرگەن ەلدى مەكەن تۇرعىندارىمەن كەزدەستى

تۇركىستان. قازاقپارات - كەشە تۇركىستان وبلىسىنىڭ اكىمى دارحان ساتىبالدى تاسقىن سۋ كىرگەن ەلدى مەكەندەردى ارالاپ، تۇرعىندارمەن كەزدەستى، دەپ حابارلايدى قازاقپارات ءتىلشىسى.

كەشە تاڭەرتەڭ تۇركىستان وڭىرىندە بىرنەشە ەلدى مەكەندى سۋ باسىپ قالعانىن بۇعان دەيىن حابارلاعان بولاتىنبىز. تاسقىن سۋ اعىنى ءالى كەلىپ جاتىر. جەكەلەگەن اۋىلدا تۇرعىندار ۇيلەرىنەن ەۆاكۋاتسيالاندى.

دارحان ساتىبالدى ساۋران اۋدانى مەن كەنتاۋ قالاسىنداعى سۋ باسقان بىرنەشە ەلدى مەكەندى ارالاپ، تۇرعىندارمەن كەزدەستى. وراڭعاي، قۇسشى اتا اۋىلدارىن ارالادى. كوشەلەردەن سۋ اعىزۋ جۇمىستارىن كوردى. توتەنشە جاعداي دەپارتامەنتىنىڭ وكىلدەرىمەن بىرگە جەرگىلىكتى تۇرعىندارمەن جۇزدەستى.

«جاۋىن- شاشىننىڭ مولشەردەن تىس كوپ ءتۇسۋى، اۋا رايىنىڭ كۇرت جىلىنىپ، قاردىڭ ەرۋى وسى جاعدايعا اكەلدى. تۇرعىنداردىڭ قاۋىپسىزدىگى مەن اماندىعى ماڭىزدى. بۇل جاعدايدا سابىر كەرەك. ەڭ باستىسى، ەل امان. بارلىق اۋدان، قالاداعى جاعداي باقىلانىپ، ءتيىستى جۇمىستار اتقارىلىپ جاتىر. يرريگاتسيالىق جۇيەلەر اشىلىپ، كانالدار تازارتىلعان. جاعداي باقىلاۋدا»، - دەدى دارحان ساتىبالدى.

قازىر قارناق اۋىلىندا قارعىن سۋدى بوگەپ، باعىتىن بۇرۋ جۇمىسى ءجۇرىپ جاتىر. تۇرعىندار حالىق اراسىنان تابىلعان وبلىس اكىمىنە ريزاشىلىق ءبىلدىرىپ، سۋ تاسقىنى زاردابىن جويۋ جۇمىستارى بويىنشا ۇسىنىستارىن جەتكىزدى.

دارحان ساتىبالدى ساۋران اۋدانى شاعا اۋىلىنداعى بىرنەشە اۋماقتىدا ارالاپ كوردى. جاۋىن- شاشىننىڭ توقتاۋىنا بايلانىستى سۋ دەڭگەيى تومەندەگەن. دەگەنمەن قاۋىپسىزدىك شارالارى كۇشەيتىلەدى.

تۇركىستان وبلىسى توتەنشە جاعدايلار دەپارتامەنتىنىڭ باستىعى نۇرعالي ءجۇنىسوۆتىڭ ايتۋىنشا، جاڭا جىلدان بەرى سۋ تاسقىنىنىڭ الدىن الۋ باعىتىندا جۇيەلى جۇمىس جۇرگىزىلگەن. اكىمدىكتەر مەن دەپارتامەنتتىڭ بىرلەسكەن ءىس- ارەكەتى ارقىلى جاعداي باقىلاۋعا الىنىپ وتىر.

قازىر ءوڭىردىڭ سۋ باسۋ قاۋپى بار ايماقتارى مەن سۋ نىساندارىندا 24 ساعاتتىق كەزەكشىلىك ۇيىمداستىرىلدى. سۋدىڭ دەڭگەيى جانە ەلدى مەكەندەردى قارعىن سۋدان ساقتاۋ جۇمىستارى تۇراقتى باقىلاۋعا الىندى.

ايتا كەتەيىك، مول جاۋعان جاڭبىر مەن قاردىڭ جىلدام ەرۋىنەن قالىپتاسقان تاسقىن سۋ بايدىبەك، ساۋران، ورداباسى اۋداندارىنداعى بىرنەشە اۋىلعا كىردى.

وبلىس اكىمدىگى ۇسىنعان سوڭعى مالىمەتتەرگە سايكەس، قازىر 19 ەلدى مەكەندەگى كوشەلەر مەن اۋلا ۋچاسكەلەرى ارقىلى سۋ اعىپ جاتىر. قازىرگى تاڭدا 21 كوشە، 234 اۋلا، 1 جەكە ۇيگە سۋ كىرگەن. ت ج د كۇشىمەن سۋ باسقان اۋلا اۋماعىنان 200-دەن استام ادام ەۆاكۋاتسيالاندى. بارلىعى تۋىستارىنىڭ ۇيلەرىنە كەتتى. حالىقتى ەۆاكۋاتسيالاۋ جانە ۋاقىتشا ورنالاستىرۋ ءۇشىن ساۋران اۋدانىندا 4 ەۆاكۋاتسيالىق پۋنكت دايىندالدى. سۋ تاسقىنى سالدارىن جويۋعا بارلىعى 300-دەن استام ادام، 100-گە جۋىق تەحنيكا، 28 موتوپومپا جۇمىلدىرىلدى. سونىمەن بىرگە باسقارمالار مەن كاسىپكەرلەر ارقىلى ونداعان تەحنيكا كومەككە كەلدى.

جاۋاپتى ورگان باسشىلارىنىڭ شتاب وتىرىسىندا ساراپشىلار اتاپ وتكەندەي، بىرنەشە ايدان بەرى وڭىردە جۇرگىزىلگەن الدىن الۋ جۇمىستارىنىڭ ناتيجەسىندە تاسقىن سۋدان كەلەر الاپات اپاتقا جول بەرىلگەن جوق. جالپى جىل باسىنان وبلىس اكىمى دارحان ساتىبالدىنىڭ تاپسىرماسىمەن بارلىق اۋدان، قالادا سۋ تاسقىنىنا قارسى جۇمىس كۇشەيتىلگەن بولاتىن. ماسەلە تۇراقتى تالقىلانىپ، ءاربىر اۋدان، قالا اكىمىنە ناقتى مىندەتتەر جۇكتەلدى. اۋا رايىنىڭ الدىن الا بولجامى نازارعا الىنىپ، ارىقتار مەن كانالدار تازارتىلدى. توتەنشە جاعداي دەپارتامەنتى مەن جەرگىلىكتى اكىمدىككە قاراستى تەحنيكالار دايىندىققا كەلتىرىلدى.

اۆتور

قايرات زاينيشيەۆ