الماتىدا «وڭتۇستىك» ساياباعى مەملەكەت مەنشىگىنە قايتارىلدى

الماتى. قازاقپارات - الماتىدا «وڭتۇستىك» ساياباعى ورنالاسقان جەر ۋچاسكەسىن مەملەكەت قاجەتتىلىگى ءۇشىن قايتارىپ الۋ ءراسىمى اياقتالدى.

اكىمدىك جەكە كومپانياعا 2,3 ميلليارد تەڭگەدەن استام سوما وتەماقى تولەيدى، دەپ حابارلايدى قازاقپارات ءتىلشىسى.

الماتى اكىمى ەربولات دوسايەۆتىڭ بوستاندىق اۋدانى تۇرعىندارىمەن كەزدەسۋىنىڭ بىرىندە قالا تۇرعىندارى اتالعان جەر ۋچاسكەسىن مەملەكەتتىك مەنشىككە الۋ جانە ساياباققا اباتتاندىرۋ جۇمىستارىن جۇرگىزۋ قاجەتتىگى تۋرالى باستاما كوتەرگەن بولاتىن.

«2022-جىلعى 5- قازاندا الماتى قالاسى مامانداندىرىلعان اۋدانارالىق ەكونوميكالىق سوتىنىڭ شەشىمىمەن جەر ۋچاسكەسىن مەملەكەت قاجەتتىلىگىنە قايتارۋ جونىندەگى اكىمدىك تالابى قاناعاتتاندىرىلدى، وتەماقى سوماسى 2338817000 تەڭگە مولشەرىندە ايقىندالدى (ساراپشىلاردىڭ 2022-جىلعى 21- قىركۇيەكتەگى 5386№ قورىتىندىسىنا سايكەس).

2022-جىلعى 22- جەلتوقساندا الماتى قالالىق سوتى ءبىرىنشى ساتىداعى سوتتىڭ شەشىمىن وزگەرىسسىز قالدىردى.

2023-جىلعى 13- قاڭتاردا وتەماقى سوماسى «Jusan Property» ج ش س- عا اۋدارىلدى»، - دەپ حابارلادى الماتى اكىمدىگىنىڭ باسپا ءسوز قىزمەتىنەن.

قازىرگى كەزدە الماتى قالاسىنىڭ ەكولوگيا جانە قورشاعان ورتا باسقارماسى «وڭتۇستىك» ساياباعىن اباتتاندىرۋ بويىنشا جوبالاۋ-سمەتالىق قۇجاتتامانى ازىرلەۋ قۇجاتتارىن دايىنداپ جاتىر.

ەسكە سالساق، 2007-جىلى بوستاندىق اۋدانىنداعى سي سينحاي كوشەسىنىڭ وڭتۇستىگىندە، جاروكوۆ كوشەسىنىڭ شىعىسىندا (كاد. 20-313-011-518№) جەر تەلىمى كوپ قاباتتى تۇرعىن ءۇي سالۋ جانە پايدالانۋ ءۇشىن «Turkuaz Invest» ج ش س جەكە مەنشىگىنە بەرىلگەن بولاتىن (الماتى قالاسى اكىمدىگىنىڭ 08.11.2007 ج. 9/1097-39№ قاۋلىسى). كەيىن ۋچاسكە «Jusan Property» ج ش س- عا بەرىلدى.