مۇعالىمدەر ەرەۋىلگە شىقتى

None
لوندون. قازاقپارات – ۇلى بريتانيادا ەرەۋىلدەردىڭ جاڭا تولقىنى بەلەڭ الدى. وتكەن جىلى باستالعان نارازىلىق شارالارى الداعى ايلاردا كۇشەيە تۇسەيىن دەپ تۇر، دەپ حابارلايدى قازاقپارات ءتىلشىسى.

تەك اقپان ايىندا 20 كۇن قاتارىنان مۇعالىمدەر، مەملەكەتتىك قىزمەتكەرلەر، ۋنيۆەرسيتەتتەر مەن كوللەدج وقىتۋشىلارى، پويىز، سونداي-اق اۆتوبۋس جۇرگىزۋشىلەرى جانە تاعى باسقالارى كوشەگە شىعىپ جاتىر. بارلىعى جالاقىلارىن كوتەرىپ، جۇمىس شارتتارىن جەڭىلدەتۋدى تالاپ ەتۋدە. ولاردىڭ بيلىكتەگى كونسەرۆاتورلار پارتياسىنىڭ جۇمىسىنا كوڭىلى تولمايدى.

مۇعالىمدەر بۇرىن-سوڭدى بولماعان اۋقىمدى ەرەۋىلگە قاتىسىپ، ميلليونداعان وقۋشى مەكتەپكە بارا الماي قالدى. جالاقىلارىنا كوڭىلى تولماعان پويىز جانە اۆتوبۋس جۇرگىزۋشىلەرى، مەملەكەتتىك قىزمەتكەرلەر دە نارازىلىقتارىن ءبىلدىرىپ، كوشەگە شىقتى.

ۇلى بريتانيادا سوڭعى ونجىلدىقتا مۇعالىمدەردىڭ جالاقىسى ازايىپ كەتتى. ناتيجەسىندە پەداگوگتاردى جۇمىسقا تارتۋ جانە ىنتالىندىرىپ، ۇستاپ وتىرۋ مۇمكىن بولماي قالدى. فيسكالدىق زەرتتەۋلەر ينستيتۋتىنىڭ مالىمەتى بويىنشا، اعا مۇعالىمدەردىڭ جالاقىسى 2010-2022-جىلدار ارالىعىندا 13 پايىزعا قىسقارعان. وتكەن جازدا ۇكىمەت ۇستازداردىڭ كوپشىلىگىنىڭ ايلىعى شامامەن 5 پايىزعا وسەتىنىن مالىمدەگەن بولاتىن. ءبىراق قوس وكپەنى قىسقان قىمباتشىلىقتىڭ كەسىرىنەن ول اقشا دىم بولماي قالدى. ءسويتىپ ۇلتتىق ءبىلىم بەرۋ كاسىپوداعىنىڭ مۇشەلەرى ەرەۋىلگە شىعۋدى ۇيعاردى.

«بۇگىن مەن جالاقىنى ءوسىرۋدى تالاپ ەتۋگە كەلدىم. از ايلىققا ەشكىم مۇعالىم بولعىسى كەلمەيدى. بالالاردىڭ ءبىلىم دەڭگەيى تومەندەپ جاتىر. ۇكىمەت ءبىزدىڭ مۇڭ-مۇقتاجىمىزعا قۇلاق اسادى دەپ ۇمىتتەنەمىن»، دەيدى ەرەۋىلشىلەردىڭ ءبىرى.

«مۇعالىم رەتىندە اي سايىن 1,5 ميلليون تەڭگە جالاقى الامىن. ءبىراق ۋنيۆەرسيتەتتە وقىعانىم ءۇشىن تولەيتىن نەسيەم بار. بانكتەردىڭ پايىزدىق مولشەرلەمەسى اسپانداپ كەتتى. قارىزعا بەلشەدەن باتتىم. ودان بولەك گاز بەن جارىقتىڭ تولەماقىسى قىمباتتاپ جاتىر»، دەپ شاعىمدانادى تاعى ءبىرى.

مۇعالىمدەردىڭ ەرەۋىلدەرى ءبىر كۇنمەن شەكتەلمەيىن دەپ تۇر. الداعى ۋاقىتتا تاعى التى رەت ۇيىمداستىرىلماق. نارازىلىقتار كەزىندە 23400 مەكتەپتە وقيتىن 4,5 ميلليون وقۋشى ساباقسىز قالادى. پاندەميا كەزىندەگىدەي ونلاين ءبىلىم بەرىلمەيدى. سوڭعى رەت مۇعالىمدەردىڭ ەرەۋىلى 7 جىل بۇرىن وتكەن، ءبىراق مۇنداي كەڭ كولەمدى نارازىلىق شاراسى ءبىرىنشى رەت ۇيىمداستىرىلىپ وتىر. كاسىپوداق ۇيىمىنىڭ ايتۋىنشا، كوشەگە شىققان ۇستازداردىڭ سانى جارتى ميلليون شاماسىندا.

«ءبىز ءبارىن دە تۇسىنەمىز. حالىق كەدەيشىلىكتىڭ قامىتىن كيۋگە ءماجبۇر. ءبىراق قازىرگى ۇكىمەتتىڭ باستى ماقساتى ينفلياتسيا دەڭگەيىن ەكى ەسەگە دەيىن تومەندەتىپ، ازاماتتاردىڭ جاعدايىن جاقسارتۋ. ەگەر ءبىز جالاقىنى وسىرەتىن بولساق، قىمباتشىلىقتى اۋىزدىقتاۋ مۇمكىن بولماي قالادى»، دەيدى ۇلى بريتانيانىڭ ءبىلىم ءمينيسترى دجيلليان كيگان.

بۇل كۇنى مۇعالىمدەر عانا ەمەس جەتى ءتۇرلى ماماندىق يەلەرى جالاقىلارىن كوتەرۋدى تالاپ ەتۋدە. 124 ۇكىمەتتىك دەپارتامەنتتە جۇمىس ىستەيتىن مەملەكەتتىك قىزمەتكەرلەر، 15 كومپانيانىڭ تەمىرجولشىلارى، لوندون اۆتوبۋستارىنىڭ جۇرگىزۋشىلەرى، ۋنيۆەرسيتەت وقىتۋشىلارى مەن وقىتۋشىلىق- پروفەسسورلىق قۇرامعا كىرمەيتىن قىزمەتكەرلەر جانە كىتاپحاناشىلار ەرەۋىلدەتىپ جاتىر.

ەسكە سالساق، ۇلىبريتانيادا سوڭعى ون جىلدا بولماعان ءىرى نارازىلىق اكتسياسى ءوتىپ جاتىر.

سوڭعى جاڭالىقتار