گەرمانيادا قوعامدىق كولىكتەردە ماسكا تاعۋ رەجيمى الىنىپ تاستالدى
ءۇش جىلعا سوزىلعان كوروناۆيرۋس پاندەمياسىنان كەيىن الىس قاشىقتىققا قاتىنايتىن پويىزداردا ماسكا تاعۋ مىندەتتى بولعان. سونداي- اق 9 فەدەرالدى جەردە وڭىرلىك قوعامدىق كولىكتە ماسكامەن ءجۇرۋ تالابى جويىلدى، دەپ حابارلايدى «قازاقپارات» Deutsche Welle سىلتەمە جاساپ.
كولىك كاسىپورىندارى سوڭعى كەزدەرى بۇل تالاپ قازىرگى جاعدايدا وزەكتى ەمەس ەكەنىن ايتىپ، ونى الىپ تاستاۋدى سۇراپ جۇرگەن. ولار ۇشاقتا نەمەسە كونسەرت زالىندا ماسكاسىز وتىرۋعا بولادى دا، ال سوندا بارا جاتقاندا اۆتوبۋستا نە ترامۆايدا نەگە ماسكا تاعۋعا مىندەتتى ەكەنىن جولاۋشىلارعا ءتۇسىندىرۋ قيىنعا سوعاتىنىن العا تارتادى.
Deutsche Bahn تەمىرجول كونسەرنى دە گ ف ر ۇكىمەتىنەن الىس جولعا باراتىن پويىزداردا ماسكا تاعۋ رەجيمىن الىپ تاستاۋدى سۇراعان. ناتيجەسىندە ۇكىمەت ماسكا تاعۋ رەجيمىن 2-اقپاننان الىپ تاستاۋ تۋرالى قاۋلى شىعاردى.
بۇعان دەيىن ونى ساۋىردە الىپ تاستايدى دەپ جوسپارلانعان ەدى. گفر دەنساۋلىق ساقتاۋ ءمينيسترى كارل لاۋتەرباح (Karl Lauterbach) ءوز ەركىمەن ماسكا تاعا بەرۋدى ۇسىندى.
ماسكا تاعۋ رەجيمى 2020 -جىلدىڭ باسىندا پاندەميا كەزىندە بىرتىندەپ ەنگىزىلگەن بولاتىن. تۇرعىنداردىڭ ءبىر بولىگى ماسكاسىز ادامداردىڭ قاسىندا وتىرعىسى كەلمەيتىندەر ءۇشىن پويىزداردا ارنايى ورىن بەلگىلەۋدى تالاپ ەتۋدە. الايدا Deutsche Bahn وكىلى بۇنداي بولمايتىنىن ايتتى.
اۋرۋحانا، مۇگەدەكتەر مەن قارتتار ۇيىنە، دارىگەرلەر پراكتيكاسى مەكەمەلەرىنە باراتىندار ءۇشىن ماسكا تاعۋ 7-ساۋىرگە دەيىن ءالى دە مىندەتتى بولادى.
سونىمەن قاتار كلينيكالار مەن قارتتار ۇيىنە كىرۋ ءۇشىن كوروناۆيرۋسقا تەست تاپسىرىپ، تەرىس ناتيجەسىن كورسەتۋ كەرەك.