وسكەمەندە جاڭا جىلۋ ەلەكتر ستانتسياسىن سالۋ ۇسىنىلدى

استانا. قازاقپارات - سەناتور ولگا بۋلاۆكينا پرەمەر- مينيستر ءاليحان سمايىلوۆتىڭ اتىنا جولداعان ساۋالىندا وسكەمەن قالاسى تۇرعىندارىنىڭ دەنساۋلىعىنا وڭىردەگى اۋا ساپاسى ناقتى قاۋىپ ءتوندىرىپ تۇرعانىن ايتتى.

دەپۋتاتتىڭ ايتۋىنشا، اتموسفەراعا جالپى شىعارىندىلار جىلىنا 158 مىڭ توننانى قۇرايدى. بىلتىر تىركەلگەن دەرەكتەر بويىنشا 42 جاعدايدا اۋادا لاستاۋشى زاتتار شەكتى نورمادان اسىپ كەتكەن.

«شىعىس قازاقستان وبلىسىنىڭ ەكولوگيا دەپارتامەنتىنىڭ مالىمەتى بويىنشا كەي جەرلەردە ازوت ديوكسيدى 2 ەسەگە، كۇكىرتسۋتەگى 3,8 دەن 9,8 ەسەگە ءوسىپ كەتكەن بولاتىن. بۇل زاتتاردىڭ كوپ كولەمدە كەزدەسسە، تىنىس الۋ جۇيەسىنە كەرى اسەرىن تيگىزەدى، سونىمەن قاتار توپىراقتىڭ قىشقىلدانۋىنا، جانۋارلاردىڭ ۋلانۋىنا، وسىمدىكتەردىڭ قۋراپ كەتۋىنە، ەكوجۇيەنىڭ بۇزىلۋىنا اكەلۋى مۇمكىن»، - دەدى ولگا بۋلاۆكينا.

سەناتور وسكەمەن جەو جانە سوگرا ج ە و كاسىپورىندارىنىڭ شىعارىندىلارى ەڭ ۇلكەن ۇلەستى قۇرايتىنىن اتاپ ءوتتى. ولاردىڭ ۇلەسى جىلىنا 45 مىڭ تونناعا جەتەدى.

«بارلىق ەكولوگيالىق تالاپتاردى ەسكەرە وتىرىپ، وسكەمەن قالاسىندا جاڭا جىلۋ ەلەكتر ستانتسياسىن سالۋ ماسەلەسىن قاراۋدى، تەحنيكالىق بايقاۋ وپەراتورلارىنا قويىلاتىن تالاپتاردى قاتاڭداتۋدى، حالىق پەن جىلۋ ەنەرگەتيكا كاسىپورىندارىنا وتكىزىلەتىن مۇناي ونىمدەرى مەن قاتتى وتىننىڭ ساپاسىن باقىلاۋشى ورگاننىڭ جاۋاپكەرشىلىگىن كۇشەيتۋدى سۇرايمىن. جەكە سەكتورعا ارنالعان ەلەكتر ەنەرگياسىنا تۇنگى ءتاريفتى قايتارۋ مۇمكىندىگىن قاراستىرۋ ماڭىزدى دەپ سانايمىن. سونداي- اق ءىرى ونەركاسىپ ورىندارىنىڭ ءتۇتىن گازدارى مەن اعىندى سۋدى باقىلاۋدىڭ اۆتوماتتاندىرىلعان جۇيەسىن ەنگىزۋ ماسەلەسىن قاراستىرۋدى سۇرايمىن»، - دەدى سەناتور ولگا بۋلاۆكينا.