الماتىدا اپات سالدارىنان تۇرعىندار سۋسىز قالدى

الماتى. قازاقپارات- الماتىنىڭ مەدەۋ اۋدانىندا ماگيسترالدى سۋ قۇبىرى زاقىمدالدى. جارىلعان قۇبىردى «الماتى سۋ» بريگاداسى قالپىنا كەلتىرىپ جاتىر، دەپ حابارلايدى قازاقپارات ءتىلشىسى.

«الماتى سۋ» م ك ك مالىمەتىنشە، نازاربايەۆ داڭعىلى بويىمەن وتەتىن قۇبىرداعى اپاتتى قالپىنا كەلتىرۋ جۇمىستارىنا 8 بىرلىك تەحنيكا مەن ەكى بريگادا جۇمىلدىرىلدى.

«وسىعان بايلانىستى نازاربايەۆ داڭعىلىنىڭ بويىندا ساتبايەۆ كوشەسىنەن گوگول كوشەسىنە دەيىن ورنالاسقان تۇرعىن ۇيلەر مەن اكىمشىلىك عيماراتتارعا سۋ بەرۋ توقتاتىلدى»، - دەپ حابارلادى دەپ حابارلادى «الماتى سۋ» م ك ك باسپا ءسوز قىزمەتى.

الدىن الا مالىمەتتەر بويىنشا، اپاتقا قۇبىردىڭ توزۋى سەبەپ بولعان. ول وسىدان ەلۋ جىل بۇرىن پايدالانۋعا بەرىلگەن.

«بۇعان دەيىن حابارلانعانداي، الماتى قالاسى بويىنشا سۋمەن جابدىقتاۋ جەلىلەرىنىڭ 54,2 پايىزى توزعان. ينجەنەرلىك جەلىلەردى قايتا جاڭعىرتۋدى جەدەلدەتۋ ماقساتىندا سۋمەن جابدىقتاۋ جانە سۋ بۇرۋ سالاسىندا جاڭا تاريفتىك ساياساتتى ەنگىزۋ جوسپارلانۋدا»، - دەپ اتاپ ءوتتى «الماتى سۋ» كومپانياسىنان.