سمارتفون سالدارىنان بالالاردىڭ ەستە ساقتاۋ، سويلەۋ قابىلەتى ناشارلايدى - سەناتور

استانا. قازاقپارات - اتا- انالاردىڭ 65 پايىزى بالالارىنا 3-5 جاستان گادجەت ۇستاتادى. بۇل تۋرالى سەناتور نۇرتورە ءجۇسىپ ايتتى، دەپ حابارلايدى قازاقپارات ءتىلشىسى.

«عالىمداردىڭ ايتۋىنشا، اۋتيزم - «ⅩⅩ عاسىردىڭ وباسى». ال سيفرلىق اۋتيزم - ХХІ عاسىردىڭ دەرتى. قازىر بۇكىل الەمدە، ونىڭ ىشىندە قازاقستاندا دا «سيفرلىق اۋتيزم» بەلگىلەرى بايقالا باستاعانىن اتاپ ءوتتى. بالالار سمارتفوندى ۇزاق ۇستاۋى سالدارىنان ەستە ساقتاۋ، كورۋ جانە سويلەۋ قابىلەتىنەن ايىرىلىپ جاتىر. ولاردىڭ ءوز بەتىنشە ويلاۋى، ۇزاق ماتىندەردى قابىلداۋى، اينالاعا نازار اۋدارۋى قيىنعا سوعىپ وتىر»، - دەدى ن. ءجۇسىپ سەناتتىڭ جالپى وتىرىسىندا ۇكىمەت باسشىسىنىڭ ورىنباسارى التاي كولگىنوۆتىڭ اتىنا جولداعان ساۋالىندا.

وسى ورايدا ول ەلىمىزدە ءتىلى كەش شىعاتىن بالالار كوبەيىپ بارا جاتقانىن ايتتى.

«جەتى اتاسىن جاتقا بىلەتىن ۇرپاق ورنىنا جەتى اۋىز ءسوزدى ازەر ايتاتىن تولقىن پايدا بولدى. سكرينەيدجەر، زۋممەر، نەمەسە Z - ۇرپاق - ءوز ءومىرىن ەلەكتروندى قۇرىلعىسىز ەلەسەتەتە المايتىن جاڭا بۋىن. اتا- انالاردىڭ 65 پايىزى بالالارىنا 3-5 جاستان گادجەت ۇستاتادى. ءبىر سوزبەن ايتقاندا، قولىنا «سمارتفون ۇستاپ تۋعان» بۋىن ومىرگە كەلدى»، - دەدى دەپۋتات.

سەناتور گادجەتيزاتسيا مەن زاماناۋي تەحنولوگياعا قارسى تۇرۋ دا دۇرىس ەمەس ەكەنىن ايتتى. دەپۋتات وسىعان بايلانىستى مەكتەپتەر مەن بالاباقشالارداعى اتا- انالار كوميتەتتەرىنە، سونداي- اق سالالىق ۇكىمەتتىك ەمەس ۇيىمدارعا كيبەرمانيانىڭ زيانى تۋرالى بەلسەندى تۇردە ايتىپ بەرۋىن ۇسىندى.

ن. ءجۇسىپ وسكەلەڭ ۇرپاقتىڭ دەنساۋلىعىنا باقىلاۋ جۇرگىزۋگە تىكەلەي بايلانىستى ۇسىنىستارىن دا ورتاعا سالدى.

«ۇكىمەتكە جاڭا تۋعان نارەستەلەردى جاپپاي رەتينوپاتيا جانە اۋديولوگيالىق سكرينينگتەن وتكىزۋدىڭ ساپاسىنا ءمان بەرۋدى، الماتى قالاسىنداعى ا. وستروۆسكي اتىنداعى زاعيپ جانە كوزى ناشار كورەتىن بالالارعا ارنالعان №4- مەكتەپ- ينتەرناتقا قوسىمشا عيمارات سالۋدى ۇسىنامىز. سونىمەن قاتار، لوگوپەد جانە وفتالمولوگ ماماندىقتارىنا بولىنەتىن مەملەكەتتىك گرانت سانىن كوبەيتكەن ماڭىزدى»، - دەدى نۇرتورە ءجۇسىپ.