قازاقستان كريپتوۆاليۋتا ءوندىرۋ بويىنشا كوشباسشىلار قاتارىندا

None
الماتى. قازاقپارات- كريپتوۆاليۋتا - بەلسەندى ءونىم، اشىق جانە حالىقارالىق نارىق.

قازاقستاندىقتار ءۇشىن بەيمالىم دۇنيە ەمەس. مۇنداي پىكىردى ءتورتىنشى ونەركاسىپتىك ريەۆوليۋتسيا ۇلەستەس ورتالىعىنىڭ باسشىسى پاۆەل كوكتىشيەۆ «Digital Almaty 2023: جاڭا بولمىستاعى سيفرلىق ارىپتەستىك» اتتى حالىقارالىق فورۋم بارىسىندا ايتتى، دەپ حابارلايدى قازاقپارات ءتىلشىسى.

سپيكەردىڭ سوزىنشە، قازاقستان كريپتوۆاليۋتا ءوندىرۋ كورسەتكىشى بويىنشا كوشباسشىلار قاتارىندا.

«كريپتوۆاليۋتا الەمنىڭ كەيبىر ەلدەرىندە تولەم قۇرالى رەتىندە قولدانىلسا، ەندى ءبىر جەردە اكتيۆ رەتىندە پايدالانىلادى. ادامدار ونى ساقتاپ، قايتا ساتا الادى. ماسەلەن، قازاقستاندا بۇل اكتيۆتەردىڭ گەنەراتسياسى وتكەن جىلى ورىن الدى، ول شامامەن 18 پايىزدى قۇرادى. بۇل بەلسەندى ءونىم، اشىق حالىقارالىق نارىق. قازاقستاندىقتار ءۇشىن بەيمالىم دۇنيە ەمەس. سوندىقتان ءبىزدىڭ ەلدە دە ماڭىزدى ءرول اتقاردى. ارينە، بۇل نارىق تەز دامىپ كەلە جاتقاندىقتان، ويىن ەرەجەسىن قۇرۋ ماڭىزدى بولدى. 1-قاڭتاردان باستاپ ەلىمىزدە تسيفرلىق اكتيۆتەردى شىعارۋعا جانە ولاردىڭ اينالىمىنا، سيفرلىق ماينينگ قىزمەتىن دامىتۋعا قاتىستى زاڭ كۇشىنە ەندى»، - دەيدى ءتورتىنشى ونەركاسىپتىك ريەۆوليۋتسيا ۇلەستەس ورتالىعىنىڭ باسىشىسى پاۆەل كوكتىشيەۆ.

ايتۋىنشا، بۇل سيفرلىق اكتيۆتەردىڭ زاڭدى نارىعىن قالىپتاستىرۋعا، وسى سالاعا شەتەلدىك ينۆەستيتسيالاردى تارتۋعا جانە قازاقستان ەكونوميكاسىن دامىتۋعا ىقپال ەتپەك.

«مىسالى تۇسكەن سالىق دەنساۋلىق ساقتاۋ سالاسىنىڭ ينفراقۇرىلىمىنا باعىتتالۋى مۇمكىن. ماينينگ قانا ەمەس، جالپى بارلىق سيفرلىق سالا مەن تەحنولوگيالار، كەز كەلگەن IA جوبا وڭتايلاندىرۋعا ۇمتىلاتىنىن ءتۇسىنۋ وتە ماڭىزدى. ونىڭ سالىق ارقىلى قارجى اكەلەتىنىن ۇمىتپاۋىمىز كەرەك. ال مەملەكەتتىڭ الەۋمەتتىك تولىق پورتفەلى سالىقتان قالىپتاسادى»، - دەدى سپيكەر.

قازاقستاندىق بلوكچەين- تەحنولوگيالار قاۋىمداستىعىنىڭ ءتوراعاسى ساپار احمەتوۆ اتالمىش سالادا جۇمىس ىستەيتىن قازاقستاندىق كومپانيالاردىڭ دا ايتارلىقتاي قيىندىقتارعا تاپ بولعانىن ايتا كەتتى.

«الايدا بيىل ءبىز وڭ ۇردىستەردى بايقاپ وتىرمىز. مەملەكەت سالانىڭ دامۋ ۇردىستەرىنە تۇسىنىستىكپەن قارايدى. بۇل اۋەلى قازاقستاندا جۇزەگە اسىرىلىپ جاتقان جوبانىڭ العىشارتتارى. ءبىزدىڭ قاۋىمداستىق ۇكىمەتپەن جانە ا ح ق و- مەن جۇمىستى بيىل دا جالعاستىرادى»، - دەدى ول.

احمەتوۆ قاۋىپسىزدىك ماسەلەلەرىن ەسكەرە جانە اقشانى جىلىستاتۋعا قارسى ءىس- قيمىل جاساۋعا جاعداي جاساي وتىرىپ، قازاقستاندا كريپتوۆاليۋتا اينالىمىن ەنگىزۋ قاجەت ەكەنىنە سەنىمدى. قاۋىمداستىق ءوز تاراپىنان ءبىلىم بەرۋ باعدارلامالارىن جۇزەگە اسىرۋدى قاراستىرا باستادى. سەبەبى نارىقتا كريپتوترەيدەرلەر مەن الاياقتاردىڭ كوبەيۋىنە بايلانىستى ازاماتتاردى ساۋاتتاندىرۋ قاجەت.

«كوپتەگەن ەلدەردە كريپتوۆاليۋتالار تولەم قۇرالى رەتىندە قولدانىلادى. بىزدە وعان ۇلتتىق بانك ءالى دايىن ەمەس، دەگەنمەن بولاشاقتا جەتەمىز دەپ ويلايمىن»، - دەدى ول.

ايتا كەتەيىك، الماتىدا «Digital Almaty 2023: جاڭا بولمىستاعى سيفرلىق ارىپتەستىك» حالىقارالىق فورۋمى ءوتىپ جاتىر.

سوڭعى جاڭالىقتار