امەريكالىقتار قالادان قاشىپ جاتىر

استانا. قازاقپارات - اۋىلدا تۇرعان جاقسى ما، قالا دۇرىس پا؟ مۇحيتتىڭ ارعى جاعىنداعى امەريكالىقتار دا مەگاپوليستەردەن قاشىپ، جانعا تىنىش جايلى جەر ىزدەپ جاتىر.

سەبەپ سول - تاماق قىمبات، سالىق بار، كوممۋنالدىق تولەماقى دا حالىقتى ىعىر قىلعان. وسىنداي قىمباتشىلىق فرانسۋزداردى دا شارشاتتى. بۇل ەلدە ءۇيسىز- كۇيسىز جۇرگەندەر كوبەيدى. ناقتىلاساق 4 ميلليون ادام باسپاناعا مۇقتاج.

امەريكا حالقى قالادان قاشىپ، جايلى ءومىردى اۋىلدى جەردەن ىزدەۋگە كوشتى. ويتكەنى الىپ مەگاپوليستەردە كۇن كورۋ قيىن. قىمباتشىلىق ەمىن- ەركىن ءومىر سۇرۋگە مۇرشا بەرمەيدى. ۇلتتىق ريەلتورلار قاۋىمداستىعىنىڭ دەرەگىنە سايكەس، بىلتىر ەلدىڭ 25 شتاتىنان ازاماتتاردىڭ جاپپاي قونىس اۋدارۋى بايقالعان. ماسەلەن، قالتالىلار قالاسىنا اينالعان نيۋ- يوركتەن وتكەن جىلى 300 مىڭ ادام كوشىپ كەتسە، كاليفورنيامەن 350 مىڭداي تۇرعىن قوشتاسىپتى.

مامانداردىڭ ايتۋىنشا، مۇنىڭ باستى سەبەبى وزگە وڭىرلەردىڭ ەڭبەك نارىعىنداعى وسىممەن بايلانىستى. ەكىنشىدەن، باسپانانىڭ قولجەتىمدى بولۋى جانە سالىقتىڭ تومەندىگى.

فرانسيادا ۇيسىزدەر سانى ارتتى

فرانسيادا ۇيسىزدەر سانى ارتتى. بۇگىندە ولاردىڭ قاتارى 330 مىڭ ادامنان اسادى. بۇل 10 جىل بۇرىنعى كورسەتكىشتەن 2 ەسە كوپ. جالپى، قازىر فرانسيادا پاتەر ساتىپ الۋعا قولى قىسقا 4 ميلليون ادام تۇرادى. ساراپشىلار الەۋمەتتىك وسال توپتاعى ازاماتتاردىڭ مۇنداي قيىندىققا تاپ بولۋىنا ەلدەگى ينفلياتسيا اسەر ەتكەنىن ايتادى. وسى باعىتتا قابىلدانىپ جاتقان شارالار ماردىمسىز، دەيدى ولار. دەگەنمەن، وسى اپتادا ەل ۇكىمەتى تۇرعىن ۇيگە مۇقتاج جاندارعا ارنالعان جاڭا باعدارلاما جۇزەگە اساتىنىن جاريا ەتتى.

قىتايدا ەكونوميكا تولىق قالپىنا كەلگەن جوق

ال كورشى قىتايدا جىلجىمايتىن مۇلىك نارىعى توقىراپ تۇر. باسپانا ساتىلىمى 30 پايىزعا تومەندەپ كەتكەن. مۇنىڭ ءبارى كوروناۆيرۋستىق شەكتەۋلەردىڭ كەسىرى. وسى رەتتە ماماندار اتالعان سەكتوردىڭ ايىعۋ ءۇشىن شامالى ۋاقىت كەرەگىن ايتادى. جالپى، قىتاي ەكونوميكاسى ىندەتتەن كەيىن ءبىرشاما ەڭسە تىكتەگەنىمەن، ءوندىرىس تىزبەكتەرى ءالى تولىق قالپىنا كەلگەن جوق.

ح ۆ ق: الەم ەكونوميكاسى وسەدى

ءوز كەزەگىندە حالىقارالىق ۆاليۋتا قورى تاقاۋدا الەم ەكونوميكاسىنىڭ وسىمىنە قاتىستى بولجام جاسادى. بيىل ول 2,9 پايىزعا ارتادى ەكەن. وعان ەڭ الدىمەن قىتايدىڭ كوروناۆيرۋسقا قارسى ساياساتىنىڭ جەڭىلدەۋى اسەر ەتسە كەرەك. سونىمەن قاتار، ا ق ش پەن ەۋروپا ەكونوميكالارىنىڭ تۇراقتىلىعى دا سەپتىگىن تيگىزەدى. ەكونوميستەر بيىل جاھاندىق رەتسەسسيانىڭ بولمايتىنىن دا ايتادى. 2023 -جىلى الەم ەكونوميكاسى تۇرالاعاننىڭ وزىندە كەلەر جىلى قايتا وسەتىنىن العا تارتادى.

www.24.kz