قازاقستان رەسەيدەگى ساۋدا وكىلدىگى مەكەمەسىن تاراتپاق

استانا. قازاقپارات - قازاقستان رەسەي فەدەراتسياسىنداعى ساۋدا وكىلدىگى مەكەمەسىن تاراتادى. «اشىق ن ق ا» پورتالىندا كوپشىلىك تالقىلاۋىندا شىعارىلعان قۇجاتتا وسىلاي دەلىنگەن، دەپ حابارلايدى قازاقپارات.

بۇل مەكەمە بۇگىنگە دەيىن ساۋدا جانە ينتەگراتسيا مينيسترلىگىنە قاراستى ۇيىم رەتىندە جۇمىس ىستەپ كەلگەن بولاتىن.

«قازاقستان رەسپۋبليكاسىنىڭ ساۋدا جانە ينتەگراتسيا مينيسترلىگىنىڭ «قازاقستان رەسپۋبليكاسىنىڭ رەسەي فەدەراتسياسىنداعى ساۋدا وكىلدىگى» مەملەكەتتىك مەكەمەسى تاراتىلسىن»، - دەپ جازىلعان ۇكىمەت قاۋلىسىنىڭ جوباسىندا.

قاۋلى جوباسى كوپشىلىك تالقىلاۋىنا 15- اقپانعا دەيىن ۇسىنىلىپ وتىر.

ايتا كەتسەك، ساۋدا وكىلدىگىنىڭ كەڭسەسى ماسكەۋدە ورنالاسقان. مەكەمە قازاقستان مەن رەسەي اراسىنداعى «ءوزارا ساۋدا وكىلدىكتەرىن قۇرۋ تۋرالى» 1992-جىلعى كەلىسىم نەگىزىندە جۇمىس ىستەيدى.