قاڭتار وقيعاسىنا قاتىسقاندارعا سوت ۇكىمى شىقتى

None
اقتوبە. قازاقپارات - اقتوبە وبلىستىق قىلمىستىق ىستەر جونىندەگى مامانداندىرىلعان اۋدانارالىق سوتىندا قاڭتار وقيعاسىنا قاتىسقان ءبىر توپ كۇدىكتىگە سوت ۇكىمى وقىلدى، دەپ حابارلايدى قازاقپارات ءتىلشىسى.

قاڭتار وقيعاسىنان سوڭ قوزعالعان قىلمىستىق ءىس «جاپپاي تارتىپسىزدىك»، «قۇقىق قورعاۋ ورگانى، ارناۋلى مەملەكەتتىك ورگان قىزمەتكەرىنىڭ، اسكەري قىزمەتشىنىڭ ومىرىنە قولسۇعۋشىلىق»، «قارۋدى، وق-دارىلەردى، جارىلعىش زاتتار مەن جارىلىس قۇرىلعىلارىن جىمقىرۋ نە قورقىتىپ الۋ» باپتارى بويىنشا قارالدى. جارىس ءسوز كەزىندە مەملەكەتتىك ايىپتاۋشىلار كولىگىمەن پوليتسيا قىزمەتكەرلەرى مەن ادامداردى قاققان سوتتالۋشىنى يسايەۆتى 15 جىلعا باس بوستاندىعىنان ايىرۋدى سۇرادى. كەيبىر سوتتالۋشىلاردىڭ جازاسىن جەڭىلدەتۋ قاجەت دەپ تاپتى.

سوت ۇكىمىمەن سوتتالۋشىلار ە. اجنيازوۆ، ا. وماروۆ اقتالدى. تاعىلعان ايىپ بويىنشا قۇقىقبۇزۋشىلىق انىقتالماي، ولار سوت زالىنان بوساپ شىقتى. ەندى ە. اجنيازوۆ، ا. وماروۆ ءوز قۇقىعىن قورعاپ، زاڭسىز قۋدالاۋعا ۇشاراعانى ءۇشىن شاعىم تۇسىرە الادى.

«ن. يسايەۆ قىلمىستىق كودەكستىڭ 370-1-بابى 2-بولىگى 1, 5 تارماقتارى جانە 272-بابى 2-بولىگى بويىنشا ايىپتى دەپ تانىلىپ، تۇپكىلىكتى 15 جىلعا باس بوستاندىعىنان ايىرۋ جازاسى تاعايىندالسىن. جازاسىن قاۋىپسىزدىگى جوعارى تۇزەتۋ مەكەمەسىندە وتەسىن. جازاسىن وتەۋ مەرزىمى 2022-جىلدىڭ 9-قاڭتارىنان باستاپ ەسەپتەلسىن. كولىگى مەملەكەت مەنشىگىنە تاركىلەنسىن. سوتتالۋشى د. قامي قىلمىستىق كودەكستىڭ 272-بابى 2-بولىگىمەن ايىپتى دەپ تانىلىپ، 4 جىلعا باس بوستاندىعىنان ايىرىلسىن»، - دەدى سۋديا نۇرلان باقتىعاليەۆ.

سوتتالۋشى د. ابيەۆ ايىپتى دەپ تانىلىپ، تۇپكىلىكتى 9 ايعا باس بوستاندىعىنان ايىرۋ جازاسى تاعايىندالدى. جازاسىن وتەۋ مەرزىمى قاماۋعا العان كۇندەرىمەن ەسەپتەلىپ، سوت زالىنان بوسادى. ءدال وسىلاي سوتتالۋشىلار ج. ەسمۋرزايەۆا، ق. شامۋراتوۆ، ن. مۇحيت، ا. بەكەيەۆ، ب. امانعوسوۆ ايىپتى دەپ تانىلعانىمەن، سوت زالىنان ۇيىنە جىبەرىلدى.

ال الاڭعا تاس تاسىعان ە. قۇتتىبايەۆ، ق. بايمۇراتوۆ ايىپتى دەپ تانىلىپ، 9 ايعا شارتتى تۇردە باس بوستاندىعىنان شەكتەلدى. ال ەكى جۇك كولىگى تاركىلەندى. سونىمەن بىرگە ن. ءومىرالى، ج. يسكاكوۆ، ب، قۇسپانوۆ، ر. احمەتوۆ، ا. سادۋاقاسوۆ، ءا. داۋكەن 9 اي پروباتسيالىق باقىلاۋدا بولادى.

سوت وبلىس اكىمدىگى، وبلىستىق پوليتسيا دەپارتامەنتى مەن كۇزەت باسقارماسىنىڭ شىعىندى ءوندىرۋ تۋرالى ارىزىن قاراۋسىز قالدىردى. بۇل ازاماتتىق ءىس رەتىندە بولەك قارالادى.

سوت ۇكىمى زاڭدى كۇشىنە ەنگەن جوق. تاراپتار 15 كۇندە اپەللياتسيالىق شاعىم تۇسىرە الادى.

سوڭعى جاڭالىقتار