مەملەكەت باسشىسى قاراعاندىلىق سپورت ارداگەرىنە العىس حات جولدادى

None
قاراعاندى. قازاقپارات - قازاقستان پرەزيدەنتى قاسىم-جومارت توقايەۆ قاراعاندى وبلىسى شەت اۋدانىنىڭ 73 جاستاعى تۇرعىنى، سپورت ارداگەرى ءدارىباي وسپانوۆقا العىس حات جولدادى، دەپ حابارلايدى قازاقپارات اكىمدىككە سىلتەمە جاساپ.

وبلىس اكىمى ەرماعانبەت بولەكپايەۆ ارداگەرگە پرەزيدەنت اتىنان العىس حات، ساعات جانە بۋرابايداعى دەمالىس ۇيىنە جولداما تابىس ەتتى. دەنە شىنىقتىرۋ جانە سپورت باسقارماسى اقساقالدى سپورتتىق قۇرال-جابدىقتار سەرتيفيكاتىمەن ماراپاتتادى.

«مەن كەرەمەت اسەر الدىم. شىنىمدى ايتسام، ءبىزدىڭ پرەزيدەنت قاراپايىم ادامداردىڭ ءومىرىن باقىلاپ وتىرعانىنا تاڭ قالدىم. مەنىڭ كوپ جىلعى ەڭبەگىمدى قاسىم-جومارت توقايەۆ بايقاعانى وتە قۋانىشتى. ءبىز ۇلدارىمىزبەن بىرگە بۇكىل ەلدىڭ ءۇمىتىن اقتاۋعا تىرىسامىز»، - دەپ ءبولىستى ءدارىباي وسپانوۆ.

قاراعاندى وبلىسىنداعى اعادىر كەنتىندە تۇراتىن وسپانوۆتار وتباسى تۋرالى كوپشىلىك بىلەدى. ولار حالىقارالىق ارەنادا 31 رەت جەڭىسكە جەتكەن. جەڭىس يەلەرىنىڭ قۇرمەتىنە قازاقستان رەسپۋبليكاسىنىڭ ءانۇرانى 18 رەت ورىندالدى.

قازاقستاننىڭ بىرنەشە دۇركىن چەمپيونى، پاۋەرليفتينگتەن ازيا مەن الەمنىڭ ەكى دۇركىن چەمپيونى، ەڭبەك سىڭىرگەن جاتتىقتىرۋشى ءدارىباي وسپانوۆ 1949-جىلى تەمىرجولشىلار وتباسىندا دۇنيەگە كەلگەن. ول اتا-اناسىنىڭ ءىزىن باسىپ، بۇكىل ءومىرىن تەمىرجولعا ارناعان. سپورتپەن جاس كەزىنەن اينالىسقان. سوڭعى 18 جىل پاۋەرليفتينگكە قاتتى قىزىعۋشىلىق تانىتقان. ول ءوزىنىڭ العاشقى جەڭىسىن 2010-جىلى فيليپپيندە وتكەن ازيا چەمپيوناتىندا جەڭىپ، سالماعى 140 كەلى شتانگانى كوتەرگەن.

ءدارىباي وسپانوۆ ءۇش بالا تاربيەلەپ، ولاردىڭ بارلىعىندا سپورتقا دەگەن سۇيىسپەنشىلىگىن وياتقان. كەنجە ۇلى قاراماندى 13 جاسىنان باستاپ ءوزى جاتتىقتىرادى. ناتيجەسىندە قارامان ق ر ەڭبەك سىڭىرگەن سپورت شەبەرى، پاۋەرليفتينگتەن حالىقارالىق دارەجەدەگى سپورت شەبەرى اتاندى. ول جارىستاردا ونەر كورسەتىپ قانا قويماي، تۋعان اۋىلى اعادىردا بالالاردى جاتتىقتىرادى.

ۇلكەن ۇلى الماز وسپانوۆ – ق ر حالىقارالىق دارەجەدەگى سپورت شەبەرى، جوعارى ساناتتى جاتتىقتىرۋشى. ورتاڭعى ۇلى - ماناس وسپانوۆ سپورت شەبەرى بولدى. اۋلەتتىڭ جاستارى دا ارتتا قالماۋدا. ءدارىباي وسپانوۆتىڭ نەمەرەسى ايتاس - پاۋەرليفتينگتەن سايىستارعا بىرنەشە مارتە قاتىسقان، سپورت شەبەرى ءنورماتيۆىن ورىنداعان.

ءدارىباي وسپانوۆ مۇنىمەن توقتاپ قالمايتىنىن ايتادى. ول اپتاسىنا بەس رەت جاتتىعۋدى جالعاستىرىپ، ۇلدارىمەن بىرگە بيىلعى حالىقارالىق جارىستاردا قازاقستاننىڭ نامىسىن قورعاۋعا جينالۋدا.

«قازان ايىندا موڭعولياداعى الەم بىرىنشىلىگىنە قاتىسۋدى جوسپارلاپ وتىرمىز، ال ماۋسىم ايىندا ءۇندىستانعا بارامىز. ۇنەمى دايىندالامىز. سپورتتاعى ۇزاق ءومىر ءسۇرۋدىڭ باستى قۇپياسى - جاتا بەرمەي، ۇنەمى دەنە شىنىقتىرۋمەن اينالىسۋ، جاقسى قان اينالىمى ءۇشىن سىرتتا جۇگىرۋ قاجەت. سونىمەن قاتار، الدىمىزعا ماقسات قويىپ، ولارعا قول جەتكىزۋىمىز كەرەك. مەنىڭ ماقساتىم - ەڭبەك سىڭىرگەن سپورت شەبەرى اتاعىن الۋ جانە بىرنەشە رەت چەمپيون بولۋ»، - دەيدى سپورت ارداگەرى.

سوڭعى جاڭالىقتار