ۋران ەكسپورتتاۋدىڭ بالاما جولدارىن ىزدەيمىز - ەنەرگەتيكا ءمينيسترى

استانا. قازاقپارات - گەوساياسي جاعدايدىڭ تۇراقسىزدىعىنا بايلانىستى قازاقستان ۋران تاسىمالداۋدىڭ بالام جولدارىن ىزدەمەكشى.

بۇل تۋرالى ەنەرگەتيكا ءمينيسترى بولات اقشولاقوۆ ۆەدومستۆونىڭ كەڭەيتىلگەن القا ماجىلىسىندە ايتتى، دەپ حابارلايدى قازاقپارات ءتىلشىسى.

«2022-جىلدىڭ قورىتىندىسى بويىنشا ۋران ءوندىرۋ كولەمى 21,3 مىڭ توننا بولدى. تۇراقسىز گەوساياسي جاعدايدى ەسكەرە وتىرىپ، 2023-جىلى ۋران ونىمدەرىن تاسىمالداۋ باعىتتارىن ءارتاراپتاندىرۋ ماسەلەسى پىسىقتالادى»، - دەدى بولات اقشولاقوۆ.

سونداي-اق ول بىلتىر جەلتوقسان ايىندا قىتايعا جىلۋ بولگىش قۇراستىرمالاردىڭ ءبىرىنشى پارتياسى جەتكىزىلگەنىن ەسكە سالدى.

«بيىل «جىلۋ ەنەرگەتيكاسى تۋرالى» زاڭ قابىلدانادى. ساپالى جوندەۋ ناۋقانىن قامتاماسىز ەتۋ جانە ينۆەستيتسيالىق باعدارلامالاردىڭ ورىندالۋىن باقىلاۋ سالاسىندا اتومدىق جانە ەنەرگەتيكالىق قاداعالاۋ كوميتەتىنىڭ ءرولىن كۇشەيتۋ جوسپارلانۋدا»، - دەدى مينيستر.