وتكەن جىل جينالىپ قالعان ءبىراز ماسەلەنىڭ بەتىن اشتى - رومان سكليار

استانا. قازاقپارات - پرەمەر-ءمينيستردىڭ ءبىرىنشى ورىنباسارى رومان سكليار ەنەرگەتيكا سالاسىنا قاتىستى ءبىرقاتار پروبلەمانى ۆەدومستۆو الدىندا كوتەردى، دەپ حابارلايدى قازاقپارات ءتىلشىسى.

«وتىن-ەنەرگەتيكا كەشەنى ەل ەكونوميكاسىندا ۇلكەن ءرول اتقارادى. بۇگىندە ونىڭ جالپى ىشكى ونىمدەگى ۇلەسى - 22 پايىز. بيۋجەت كىرىسىنىڭ 40 پايىزى جانە ينۆەستيتسيانىڭ 30 پايىزى وسى وتىن-ەنەرگەتيكا سالاسى قامتاماسىز ەتەدى. وتكەن جىلدىڭ قورىتىندىسى بويىنشا اتالعان سالانىڭ نەگىزگى كورسەتكىشتەرى جامان ەمەس. مۇناي - 1,6 پايىز جانە گاز - 3,1 پايىز، ال مۇناي ونىمدەرى - 3,2 پايىز جانە ەلەكتر ەنەرگياسى ءوندىرىسى 3,4 پايىزدى قۇرادى.

وتكەن جىل كوپتەن بەرى جينالىپ قالعان ءبىراز ماسەلەنىڭ بەتىن اشتى. ايتار بولساق، ديزەل تاپشىلىعى. سونىمەن قاتار گازبەن قامتاماسىز ەتۋدەگى قيىنشىلىقتار بولدى. ەلەكتر قۋاتىنىڭ جەتپەي قالۋى، جىلۋ بەرۋ وبەكتىلەرىندەگى اپاتتار. وسىنىڭ ءبارى سالا بويىنشا وتە اۋقىمدى پروبلەمالاردىڭ بارىن كورسەتتى. اتالعان پروبلەمالاردى جەدەل شەشۋ قاجەت»، - دەدى رومان سكليار ەنەرگەتيكا مينيسترلىكتىڭ كەڭەيتىلگەن القا وتىرىسىندا.

ونىڭ ايتۋىنشا، ەنەرگەتيكا سالاسى الدىندا اۋقىمدى مىندەتتەر تۇر.

«حالىقارالىق ساراپشىلاردىڭ بولجامى بويىنشا 2023-جىل وتكەن جىلعا قاراعاندا كۇردەلى بولۋى مۇمكىن. سوندىقتان ىشكى نارىقتى قاجەتتى شيكىزات قورى جانە ەنەرگورەسۋرستارمەن ۇزبەي قامتاماسىز ەتۋ - ۇكىمەتتىڭ باستى مىندەتتەرىنىڭ ءبىرى»، - دەيدى ول.