بولات نازاربايەۆتىڭ زاڭسىز يەلەنگەن جەرلەرى مەملەكەتكە قايتارىلدى - ەرلان سايروۆ
بۇل تۋرالى «AMANAT» پارتياسى جانىنداعى مەملەكەتتىك باسقارۋدى دامىتۋ جانە سىبايلاس جەمقورلىققا قارسى ءىس- قيمىل جونىندەگى رەسپۋبليكالىق قوعامدىق كەڭەستىڭ ءتوراعاسى ەرلان سايروۆ ايتتى، دەپ حابارلايدى قازاقپارات پارتياعا سىلتەمە جاساپ.
ول قازىرگى ۋاقىتتا مەملەكەتكە بولات نازاربايەۆتىڭ ەنشىلەس كومپانيالارىنا تيەسىلى ماڭعىستاۋ وبلىسىندا 239 مىڭ گەكتار، جامبىل وبلىسىندا 60 مىڭ گەكتار جەر مەملەكەتكە قايتارىلعانىن اتاپ ءوتتى. بۇعان دەيىن باس پروكۋراتۋرامەن بىرلەسىپ جۇرگىزىلگەن جۇمىس بارىسىندا بولات نازاربايەۆقا تيەسىلى جالپى اۋماعى 244 گەكتار بولاتىن 59 جەر تەلىمى انىقتالعان ەدى.
«امانات پارتياسىنىڭ قوعامدىق الاڭ رەتىندە ءاربىر ازاماتتىڭ ەنشىسى بولىپ تابىلاتىن ۇلتتىق بايلىقتى مەملەكەتكە قايتارۋ باستى ميسسياسى دەپ بىلەمىز! «بارماق باستى، كوز قىستىمەن» جىمقىرىلعان حالىق ىرىزدىعىن قايتارۋ جۇمىسىن جۇيەلى جۇرگىزەمىز. مارتەبەلى فاميلياعا، «بۇرىنعى ەڭبەگىڭىزگە»، قالتاڭىزدىڭ قالىڭدىعىنا قارامايمىز. حالىقتىڭ مەنشىگىنە قول سالدىڭىز با؟ قايتاراسىز. الماقتىڭ دا سالماعى بار جانە ول اۋىر»، - دەدى ەرلان سايروۆ.
كەڭەس مۇشەلەرى سوڭعى ءۇش جىلدا استانا قالاسىنداعى جەرگىلىكتى اتقارۋشى ورگاندارداعى سىبايلاس جەمقورلىققا قارسى ءىس- قيمىل جونىندەگى جۇمىستى تالدادى. كورسەتىلگەن كەزەڭدە سىبايلاس جەمقورلىققا قارسى قىزمەت 203 سىبايلاس جەمقورلىق قىلمىستى تىركەدى. ولاردىڭ نەگىزگى بولىگى پاراقورلىق – 147، ۇرلىق - 47 جانە لاۋازىمدىق وكىلەتتىكتەرىن اسىرا پايدالانۋدىڭ 9 فاكتىسى تىركەلدى.
كەڭەس ءتوراعاسىنىڭ ورىنباسارى عالىم بايتوق اتاپ وتكەندەي، جەرگىلىكتى اتقارۋشى ورگانداردىڭ سىبايلاس جەمقورلىققا قارسى ءىس- قيمىل جۇمىسىندا فورماليزم ورىن الۋدا.
«ەلورداداعى جەرگىلىكتى اتقارۋشى ورگانداردىڭ جۇكتەلگەن مىندەتتى ورىنداۋ كەزىندەگى جاۋاپكەرشىلىگى تومەن ەكەنىن اتاپ ءوتۋ قاجەت. استانا قالاسى بويىنشا سىبايلاس جەمقورلىققا قارسى ءىس- قيمىل جانە مەملەكەتتىك باسقارۋدى دامىتۋ جونىندەگى ىستەردىڭ جاي- كۇيىن زەردەلەۋ بارىسىندا كەڭەستىڭ جۇمىس توبى سۇراتقان اقپاراتتى الماتى اۋدانىنىڭ اكىمدىگى جانە قۇرىلىس باسقارماسى مۇلدەم بەرمەگەن»، - دەدى ع. بايتوق.