تۇركىستان قالاسىنىڭ ەرەكشە مارتەبەسى تۋرالى زاڭ جوباسى دايىندالىپ جاتىر
بۇل تۋرالى تۇركىستان وبلىسىنىڭ اكىمى دارحان ساتىبالدى تۇركىستان قالاسى تۇرعىندارىمەن كەزدەسۋ جيىنىندا ايتتى، دەپ حابارلايدى قازاقپارات ءتىلشىسى.
تۇركىستان وبلىسىنىڭ اكىمى دارحان ساتىبالدى بيىلعا جوسپارلانعان حالىقپەن كەزدەسۋىن وبلىس ورتالىعىنان باستادى. ەل الدىندا ەسەپ بەرۋ جيىنىندا ايماق باسشىسى الدىمەن وتكەن جىلى اتقارىلعان جۇمىستاردى بايانداپ، حالىقپەن كەزدەسۋلەردىڭ ناتيجەسىمەن ءبولىستى. سونداي- اق وتكەن جىلدان بەرى وڭىردە جۇزەگە اسىپ جاتقان جۇمىستارعا كەڭىنەن توقتالىپ، الداعى جوسپارلارىن ايتتى.
«مەملەكەت باسشىسى قاسىم- جومارت توقايەۆ تۇركىستان وڭىرىنە جاساعان جۇمىس ساپارىندا تۇركىستان قالاسىنا ەرەكشە مارتەبە بەرۋدى تاپسىرعان ەدى. بۇل باعىتتا ءتيىستى جۇمىستار باستالىپ كەتتى. بۇگىندە «تۇركىستان قالاسىنىڭ ەرەكشە مارتەبەسى تۋرالى» زاڭ جوباسى دايىندالىپ جاتىر. وسى زاڭ قابىلدانعان سوڭ، قالا اكىمدىگى مەن ءماسليحاتىنا قوسىمشا قۇزىرەتتەر بەرىلەتىن بولادى. بۇل تۇرعىنداردىڭ كۇردەلى ماسەلەلەرىن تەز ارادا شەشۋگە مۇمكىندىك بەرەدى. اتاپ ايتقاندا، تۇرعىن ءۇي- كوممۋنالدىق شارۋاشىلىق، كولىك جانە اۆتوموبيل جولدارى، ساۋلەت، قالا قۇرىلىسى، ساۋدا جانە قىزمەت كورسەتۋ سۇراقتارى قالا دەڭگەيىندە دەربەس شەشىلەتىن بولادى»، - دەدى وبلىس اكىمى دارحان ساتىبالدى.
«اقجايىق» مۋزىكالىق مەكتەبىندە وتكەن اكىمنىڭ حالىققا ەسەپ بەرۋ كەزدەسۋىنە 500 دەن استام تۇركىستاندىق كەلدى. ونىڭ 100 گە جۋىعى - جاستار. سۇراق- جاۋاپ فورماتىندا ۇيىمداستىرىلعان جيىندا ايماق باسشىسى تۇركىستاننىڭ ەلىمىزدىڭ رۋحاني جانە تاريحي ورتالىعىنا اينالۋ جولىندا جۇزەگە اساتىن ماڭىزدى شارالارعا توقتالىپ، دامۋدىڭ ءتۇرلى سالالارى بويىنشا كورسەتكىشتەردى ءمالىم ەتتى.