15:12, 01 - اقپان 2023 | GMT +6
مەملەكەت باسشىسى س ك ا ت اۋە كومپانياسىنىڭ پرەزيدەنتىن قابىلدادى
استانا. قازاقپارات - مەملەكەت باسشىسى قاسىم- جومارت توقايەۆ SCAT اۋە كومپانياسىنىڭ پرەزيدەنتى ۆلاديمير دەنيسوۆتى قابىلدادى، دەپ حابارلايدى اقوردا.
پرەزيدەنتكە اۋە كومپانياسىنىڭ بىلتىر اتقارعان جۇمىستارىنىڭ نەگىزگى ناتيجەلەرى، سونداي- اق الداعى كەزەڭگە ارنالعان دامۋ جوسپارى تۋرالى باياندالدى.
مەملەكەت باسشىسىنا 2030 -جىلعا دەيىن كومپانيانىڭ اۋە كەمەلەرى پاركى مەن باعىت جەلىلەرىن كەڭەيتۋ جونىندە مالىمەت بەرىلدى.
بۇدان بولەك، پرەزيدەنتكە شىمكەنت اۋەجايىنداعى اەروۆوكزال كەشەنى قۇرىلىسىنىڭ بارىسى جانە اۆياتسيالىق حابتى دامىتۋ شارالارى تۋرالى باياندالدى.
قاسىم- جومارت توقايەۆ SCAT اۋە كومپانياسىنىڭ قىزمەتىنە وڭ باعا بەرىپ، ونىڭ دامۋ ستراتەگياسىن قولدادى.
مەملەكەت باسشىسى شىمكەنتتەگى اۆياتسيالىق حابتىڭ قۇرىلىسىن اياقتاۋدىڭ، اۆياتسيالىق تاسىمالداۋ سالاسىنىڭ وڭىردەگى باسەكەگە قابىلەتتىلىگىن قامتاماسىز ەتۋدىڭ جانە كورسەتىلەتىن قىزمەتتەردىڭ ساپاسىن ارتتىرۋدىڭ ماڭىزدىلىعىنا نازار اۋداردى.