سەمەيدەگى اسپالى كوپىردى جاپوندىق كومپانيا كۇردەلى جوندەۋدەن وتكىزەدى

سەمەي. قازاقپارات - سەمەي قالاسىنداعى اسپالى كوپىردى جاپوندىق كومپانيا كۇردەلى جوندەۋدەن وتكىزەدى، دەپ حابارلايدى قازاقپارات ءتىلشىسى.

اباي وبلىسى اكىمدىگىنىڭ مالىمەتىنە سۇيەنسەك، بۇگىن ايماق باسشىسى نۇرلان ۇرانحايەۆ سەمەيدەگى اسپالى كوپىردى جوندەۋگە قاتىستى جاپوندىق ITOCHU كومپانياسىنىڭ وكىلدەرىمەن كەزدەسۋ وتكىزدى. وندا كوپىردى زەرتتەۋدىڭ بارىسى مەن جوندەۋ جۇمىستارىنىڭ جوسپارى ءسوز ەتىلدى. بۇگىنگى تاڭدا كوپىردەگى نەگىزگى جانە جۇك كوتەرگىش قۇرىلىمدارداعى اقاۋلار جويىلىپ وتىر.

«كوپىردىڭ قىزمەت ەتۋ مەرزىمىن ۇزارتۋ ءۇشىن تىرەك كابەلدەر سۋ وتكىزبەيتىن قاباتپەن جابىلۋى كەرەك. انكەرلى تىرەك كابەلدەرى ءۇشىن كەپتىرۋ جۇيەسىن ورناتۋ قاجەت. اسفالتتى اۋىستىرۋ دا كوزدەلگەن. سونداي- اق الداعى ۋاقىتتا كوپىردى جاقسى كۇتىپ- ۇستاۋ ءۇشىن ونىڭ جاعدايىن جۇيەلى تۇردە باقىلاعان ءجون»، - دەدى وبلىس اكىمىنىڭ ورىنباسارى دميتري گاريكوۆ.

قازىرگى ۋاقىتتا ءتيىستى جۇمىس جوسپارى بەلگىلەندى. جاقىن ارادا جوبالىق- سمەتالىق قۇجاتتاما ازىرلەنىپ، كوپىرگە جوندەۋ جۇمىستارىن جۇرگىزۋ ءۇشىن جاپوندىق كومپانيامەن كونسورتسيۋم قۇرىلماق.

ايتا كەتەيىك، سەمەيدەگى اسپالى كوپىرى 2001 -جىلى سالىنعان. كوپىردىڭ جالپى ۇزىندىعى - 1086 مەتر. پايدالانۋعا بەرىلگەن ۋاقىتتان بەرى كۇتىپ- ۇستاۋ جۇمىستارى دۇرىس جۇرگىزىلمەگەندىكتەن كوپىر كۇردەلى جوندەۋدى قاجەت ەتەدى.

اۆتور

تالعاتجان مۇحامەتبەك ۇلى