قازاقستان كاسپي ارقىلى قىتاي مەن ەۋروپانىڭ اراسىندا دەرەكتەر تاسىمالدايتىن ءدالىز جاسايدى

استانا. قازاقپارات - سيفرلىق دامۋ، يننوۆاتسيالار جانە ايروعارىش ونەركاسىبى مينيسترلىگىنىڭ «قولجەتىمدى ينتەرنەت» ۇلتتىق جوباسىنىڭ اياسىندا كاسپي ارقىلى قىتاي مەن ەۋروپا اراسىندا دەرەكتەر تاسىمالدايتىن «ءدالىز» توسەمەكشى، دەپ حابارلايدى قازاقپارات ءتىلشىسى.

كاسپي تەڭىزى ارقىلى قىتايدان ەۋروپاعا تالشىقتى- وپتيكالىق بايلانىستى توسەۋ جونىندەگى جوبانى ىسكە اسىرۋ بولىگىندە قازاقستان مەن ازەربايجان اراسىندا كاسپي تەڭىزىنىڭ تۇبىمەن تالشىقتى- وپتيكالىق بايلانىس جەلىسىن بىرلەسىپ توسەۋگە جاردەمدەسۋ جونىندە ەكىجاقتى ۇكىمەتارالىق كەلىسىم جاسالدى.

«جوبا ترافيكتىڭ قازاقستان اۋماعى بويىنشا جانە سۋاستى كابىلى ارقىلى ازەربايجانعا دەيىن ءارى قاراي ەۋروپاعا (گرۋزيا - قارا تەڭىز - بولگاريا - سلوۆاكيا ارقىلى گەرمانياعا) شىعۋىن كوزدەيدى»، - دەلىنگەن ۇلتتىق جوبا ماتىنىندە.

كاسپي تەڭىزىنىڭ تۇبىندەگى كابىلدىڭ ۇزىندىعى شامامەن 380-400 شاقىرىم، ال تاسىمالداناتىن دەرەكتەردىڭ جوبالىق سىيىمدىلىعى كەمىندە سەكۋندىنا 4-6 تەرابيت بولماق.

«سونداي- اق ترانزيتتىك ترافيكتى وتكىزۋ كەزىندە كىدىرىستەردى ازايتۋ ءۇشىن قازاقستان اۋماعى بويىنشا شىعىستان باتىسقا قاراي ۇلتتىق گيپەرماگيسترال سالۋ قاجەت. سونىمەن قاتار ترانزيت پەن حالىقارالىق ترافيكتى ساقتاۋ ءۇشىن Tier- III دەڭگەيىنەن تومەن ەمەس دەرەكتەر وڭدەۋ ورتالىقتارىن قۇرۋ قاجەت. وسى جوبالاردى ىسكە اسىرۋ حالىقارالىق دەرەكتەر ترانزيتىنىڭ بالامالى باعىتىن قامتاماسىز ەتۋگە، ەۋروپا مەن شىعىس ازيا اراسىنداعى دەرەكتەر ترانزيتىندەگى قازاقستاننىڭ ۇلەسىن ارتتىرۋعا، سونداي- اق ەل نارىعىنا ءىرى تەحنولوگيالىق (big tech) كومپانيالاردى تارتۋعا مۇمكىندىك بەرەدى»، - دەلىنگەن قۇجاتتا.

ەسكە سالساق، بۇعان دەيىن قازاقستان- ازەربايجان باعىتىندا كاسپي ءتۇبى ارقىلى بايلانىس جەلىلەرىنىڭ قۇرىلىسى باستالاتىندىعى ايتىلدى. جالپى بۇل جوبا 2019 -جىلدان بەرى ايتىلىپ كەلەدى.

اۆتور

ەسىمجان ناقتىباي