استانادا سۋعا باتىپ بارا جاتقان ايەل مەن ءيتى قۇتقارىلدى

استانا. قازاقپارات - استانادا ەسىل وزەنىنە باتىپ بارا جاتقان ايەل مەن ءيتى قۇتقارىلدى، دەپ حابارلايدى قازاقپارات قالالىق توتەنشە جاعدايلار دەپارتامەنتىنە سىلتەمە جاساپ.

«31 -قاڭتار كۇنى تاڭعى ساعات 9.22-دە ەلوردالىق ت ج د جەدەل- قۇتقارۋ جاساعىنىڭ قۇتقارۋشىلارى كەنەسارى كوشەسى اۋدانىندا ەسىل وزەنىنە ءيت سۋعا باتىپ بارا جاتقانى تۋرالى حابارلاماعا شىقتى.

بەلگىلى بولعانداي، ايەل يتپەن سەرۋەندەپ جۇرگەن، كەنەت جانۋار وزەن ۇستىنە جۇگىرىپ شىعىپ، مۇز استىنا ءتۇسىپ كەتكەن»، - دەلىنگەن ۆەدومستۆو مالىمەتىندە.

ءيتىن قۇتقارماق بولىپ ۇمتىلعان ايەلدىڭ ارەكەتىنەن ناتيجە شىقپاي، ءوزى دە سۋعا باتا باستاعان. سول ۋاقىتتا سول ماڭنان ءوتىپ بارا جاتقان ەر ادام قۇتقارۋشىلار كەلگەنگە دەيىن ايەلدى سۋدان الىپ شىققان.

«ت ج د بولىمشەلەرى كەلگەن كەزدە ءيت ءالى دە سۋدا بولدى. قۇتقارۋشىلار دەرەۋ ءيتتى سۋدان شىعارۋعا كىرىستى. باقىتىمىزعا وراي، قۇتقارۋ وپەراتسياسى ءساتتى اياقتالدى، ءيت يەسىنە تاپسىرىلدى.

ايەل مەن ءۇي جانۋارىنىڭ جاعدايى جاقسى، ولاردىڭ ومىرىنە ەش قاۋىپ جوق»، - دەدى ت ج د- دان.

رەداكتور

گۇلميرا الياكپاروۆا