ارال سۋى مولايا تۇسۋدە

None
استانا. قازاقپارات- ەجەلدەن داريا بويىن ەن جايلاعان جۇرت ءۇشىن تىرشىلىك ءنارىنىڭ كوبەيگەنى قۋانارلىق جايت.

قۋاڭشىلىقتان ايدىن كولدەرىنىڭ ءتۇبى كورىنگەن قىزىلوردا وبلىسىنىڭ اۋماعىنا قازىر سەكۋندىنا 630 تەكشە مەتر سۋ كەلىپ جاتىر. سىربويىلىق ماماندار كول-كوسىر سۋدى سوڭعى 5 جىلدا ءنار تامباعان ەسكى ارنالارعا باعىتتاپ جاتىر. ەڭ باستىسى ارال تەڭىزىنىڭ قورى ءبىراز مولايىپ قالدى.

جىل باسىنان بەرى تەڭىزدىڭ سولتۇستىك بولىگىنە 100 ميلليون تەكشە مەتردەن استام سۋ جىبەرىلدى. قازىر ارالعا قۇيار ساعاداعى اقلاق توسپاسى ارقىلى سەكۋندىنا 180 تەكشە مەتر شاماسىندا سۋ ءوتىپ جاتىر. جالپى ودان بولەك وڭىردەگى 200-گە جۋىق ءىرىلى-ۇساقتى كولدىڭ % 70-ىنە سۋ بارىپ ۇلگەردى. سونداي-اق شابىندىق پەن جايىلىمدىقتار سۋلاندىرىلدى.

«ءساتىن سالسا، بيىل ءشوپ شۇيگىن بولادى»، - دەيدى شارۋالار. ەڭ باستىسى، اڭقاسى كەپكەن ارالدىڭ ءسال دە بولسا سۋسىنى قانباق.

سەيىلبەك نۇرىمبەتوۆ، ارال-سىرداريا باسسەيندىك ينسپەكسياسىنىڭ باسشىسى:

- مۇزدىڭ جاعدايىنا بايلانىستى، تومەنگە جىبەرىلەتىن سۋدىڭ كولەمى بىرتىندەپ جوعارىلاپ كەلە جاتىر. سوعان بايلانىستى سولتۇستىك ارال تەڭىزىنە بەرىلەتىن سۋدىڭ كولەمى دە بىرتىندەپ ارتادى.

تەڭىز ماڭىن مەكەندەسە دە تىرشىلىك نارىنە جارىماعان شارۋالار بيىل العاش رەت مىڭ جارىم گەكتار القاپقا ەگىن ەكپەك. ونىڭ باسىم بولىگىنە مال ازىعى قالعانىنا باقشا داقىلدارى ەگىلەدى. قۋاڭشىلىقتا قىسىلعان شارۋانىڭ ءبىرى - قايىربول اقساقال. وتكەن جىلى جاڭبىرلاتىپ سۋارۋ ادىسىمەن جوڭىشقا ەككەن امانوتكەل اۋىلىنىڭ تۇرعىندارى بيىل كارتوپ پەن قاۋىن-قاربىز ەگۋدى جوسپارلاپ وتىر.

قايىربول قايىپەرەنوۆ، امانوتكەل اۋىلىنىڭ تۇرعىنى:

- قامباش كولى بار، مىنا اقشاتاۋ كولى بار ءبارى كەۋىپ قالىپ ەدى. سولاردىڭ بارىنە سۋ باردى. سۋ كەلگەسىن ءبارى تىرلىك جاساپ جاتىر. بىلتىر قۋاڭشىلىقتا مالىمىز دا ءولدى، جان-جاقتان ايتەۋىر كومەك بولدى. قۇدايعا شۇكىر سۋ بار جەردە نۋ بولادى دەمەكشى ءبارى جاقسى بولىپ كەلە جاتىر دەپ ەسەپتەيمىز. ۇزاعىنان ءسۇيىندىرسىن.

مەملەكەت باسشىسىنىڭ تاپسىرماسىمەن سولتۇستىك ارالدى ساقتاۋ جوباسى قارجىلاندىرىلىپ، تەڭىز ماڭىنداعى گيدروقۇرىلعىلاردى جوندەۋ جۇمىستارى باستالىپ كەتتى.

سەرىك سەرماعامبەتوۆ، ارال اۋدانىنىڭ اكىمى:

- قاراشالاڭ كولىنەن 2 كانال جانە بوگەن قاسىنداعى سارىتەرەڭ كانالىنان 1 كانال قازۋ باستالىپ كەتتى. وسى جوبا 2024 جىلى ىسكە اسىرىلاتىن بولادى. سونىڭ ناتيجەسىندە تەڭىزدىڭ تۇزدانۋ جاعدايى تومەندەتىلەدى. بالىقتىڭ ونۋىنە ۇلكەن سەپتىگىن تيگىزەدى دەگەن ويىمىز بار. سىرداريا جاعالاي قونىستانعان اۋىلداردان بولەك قۇمنىڭ اراسىنداعى ەلدى مەكەن تۇرعىندارى دا ەگىنشىلىككە بەت بۇرماق. ول ءۇشىن اۋداننىڭ ەگىس كولەمى 3 مىڭ گەكتارعا دەيىن جەتكىزىلىپ، قۇدىقتار قازىلادى.
www.24.kz

سوڭعى جاڭالىقتار