نەلىكتەن باس اينالادى؟
باس اينالۋ - بۇل اينالاڭىزداعى كەڭىستىك قوزعالىپ نەمەسە اينالىپ جاتقانداي كورىنەتىن سەزىم. نەمەسە كەرىسىنشە، ءسىز قوزعالىپ نەمەسە قۇلاپ بارا جاتقانداي سەزىمدە بولاسىز. باس اينالعان كەزدە تەپە- تەڭدىك بۇزىلادى. قوزعالىس سەنىمسىز بولا تۇسەدى.
نەلىكتەن باس اينالادى؟
كۇتپەگەن جەردەن باس اينالىپ، ول ءبىر رەتىك جاعداي بولۋى مۇمكىن. سونداي-اق ول سوزىلمالى بولۋى جانە ءجيى پايدا بولۋى مۇمكىن. ونىڭ بىرنەشە سەبەبى بار.
سۋسىزدانۋ
اعزا سۋسىزدانعاندا قان قىسىمى تۇسەدى. قان ميعا ناشار قۇيىلادى جانە وعان وتتەك جەتىسپەيدى. سول ءۇشىن ءبىزدىڭ باسىمىز اينالادى. اسىرەسە، وتىرعان كۇيدەن جىلدام تۇرعاندا باسىڭىز اينالىپ كەتەدى. اعزا سۋسىزدانعان كەزدەگى باس اينالۋ ءجيى كوزدىڭ قارايۋىمەن بىرگە جۇرەدى. بۇل جاعداي قارتتاردا جانە ديابەتپەن قينالاتىن ادامداردا ءجيى كەزدەسەدى.
ءدارى-دارمەك ءىشۋ
كەي دارىلىك قۇرالدار باسىڭىزدى اينالدىرۋى مۇمكىن. مىسالى، كوپشىلىك بۇل اسەردى قابىنۋعا قارسى دارىلەردى ىشكەننەن كەيىن بايقايدى. ول سونداي- اق كەي انتيبيوتيكتەر، تىرىسۋعا قارسى جانە قىسىمدى رەتتەيتىن دارىلەردەن كەيىن دە پايدا بولۋى مۇكىن.
قاناعىم پروبلەماسى
باس اينالۋ اعزادا قاناعىم پروبلەماسى بارىن كورسەتەتىن بەلگى بولۋى مۇمكىن. مي ۇنەمى قاننان وتتەك كەلۋىنە مۇقتاج. ال ەگەر ونىڭ اينالىمى بۇزىلسا، باس اينالۋى مۇمكىن. ميعا قاننىڭ قۇيىلۋى تومەن بولسا، قان ۇيىپ قالۋى، ارتەريالاردىڭ بىتەلۋى، جۇرەك جەتكىلىكسىزدىگى جانە رەتسىز جۇرەك سوعىسى پايدا بولۋى مۇمكىن.
سونداي-اق انەميا كەزىندە دە باس ءجيى اينالادى. ول سوزىلمالى شارشاڭقىلىقپەن جانە السىزدىكپەن قاتار جۇرەدى.
مەنەر اۋرۋى
بۇل اۋرۋ ادامنىڭ ىشكى قۇلاعىن زاقىمدايدى. ادەتتە، باس اينالۋ بۇل جاعدايدا قۇلاقتا شۋ بولۋمەن بىرگە جۇرەدى، ءتىپتى، ۋاقىتشا ءبىر قۇلاعىڭىز ەستىمەي قالۋى مۇمكىن. مەنەر اۋرۋى كەزىندە ۇستاما 1 ساعاتتان بىرنەشە ساعاتقا دەيىن سوزىلادى. ولار سورزىلمالى بولۋى دا، سونداي- اق بىرنەشە ايدا ءبىر رەت پايدا بولۋى دا مۇمكىن. بۇل اۋرۋ جاعىمسىز بولسا دا، قاۋىپتىگە جاتپايدى. ول جۇيكە جۇيەسىمەن بايلانىستى باسقا اۋرۋلاردى شاقىرمايدى. الايدا دارىگەرگە ۋاقىتىندا قارالۋ كەرەك. ايتپەسە، ونىڭ جيىلەنىپ كەتۋ قاۋپى بار.
ۆەستيبۋليارلىق نيەۆريت جانە لابيرينتيت
بۇل اۋرۋلار ءجيى جۇقپا سەبەبىنەن پايدا بولىپ، ىشكى قۇلاقتى زاقىمدايدى. كەيدە نەۆريت جانە لابيرينتيت قاراپايىم تۇماۋمەن بىرگە جۇرەدى. قوزعالىس بەلسەندىلىگىنە قاراي باس اينالۋى جانە جۇرەك اينۋى مۇمكىن. جۇقپانى ەمدەگەن كەزدە بۇل بەلگىلەر دە كەتەدى.
كۇيزەلىس
كەي ادامداردىڭ كۇيزەلىستىك جاعدايلاردا باسى اينالادى. مۇنداي باس اينالۋدى پسيحوگەندى دەپ ايتادى. بۇل جۇيكە جۇيەسىنىڭ شامادان تىس جۇكتەلۋىمەن جانە سايكەسىنشە قىسىم وزگەرىسىمەن، سونداي- اق وكپەنىڭ اسا جەلدەتىلۋىمەن (وتە ءجيى جانە تەرەڭ ەمەس تىنىس الۋ) بايلانىستى. ول ميدا وتتەك جەتىسپەۋىن تۋدىرادى.
فيزيكالىق تىتىركەندىرگىشتەر
بارلىق جاعدايدا بىردەي باس اينالۋ اۋرۋ بەلگىسى ەمەس. ول فيزيكالىق تىتىركەندىرگىشتەرگە دەگەن تابيعي رەاكتسيا بولۋى مۇمكىن. مىسالى: تەربەلگەندە نەمەسە بيىكتىكتەن سەكىرگەندە. سونداي- اق وتكىر ءيىسى بار حيميالىق زاتتاردان باسىڭىز اينالۋى مۇمكىن.
باس ساقيناسى
باس ساقيناسى ۆەستيبۋليارلىق اپپارات جۇمىسىنا جاۋاپ بەرەتىن مي بولىكتەرىندەگى قان اينالىمدى بۇزادى. بۇل اپپارات بىزگە تەپە-تەڭدىك ساقتاۋعا جانە كەڭىستىكتە باعىت الۋعا كومەكتەسەدى. باس ساقيناسى كەزىندەگى باس اينالۋ ءجيى جەلكە تۇسىنىڭ اۋرۋىمەن قاتار جۇرەدى.
وستەوحوندروز، مويىن جانە باس زاقىمى
ۆەستيبۋليارلىق اپپاراتتىڭ باقىلاۋ جۇيەسى ناقتى مي بولىكتەرىنەن عانا تۇرمايدى. وعان بۇكىل اعزانىڭ سەزىمتال بۇلشىق ەت رەتسەپتورلارى مەن بايلامدارى قاتىسادى. سوندىقتان ونىڭ جۇمىسى بۇزىلعان كەزدە ءبىزدىڭ باسىمىز اينالادى.
مىسالى، وستەوحوندروز - مويىننىڭ سەزىمتال بولىكتەرىنىڭ جۇمىسى بۇزىلۋى كەزىندە، باس اينالىپ، تەپە- تەڭدىك ساقتاۋ قيىنعا سوعادى. باس پەن مويىن زاقىمدارى دا ۆەستيبۋليارلىق اپپارات پروبلەماسىنا، ناتيجەسىندە باس اينالۋعا اكەلۋى مۇمكىن.
جۇكتىلىك
جۇكتىلىك كەزىندە ايەلدىڭ ءجيى باسى اينالۋى، جۇرەگى اينۋى، السىزدەنۋى جانە شارشاۋى مۇمكىن. بۇل ءجيى اعزاداعى گورموندى وزگەرىستەرمەن جانە توكسيكوزبەن بايلانىستى. جۇكتىلىك كەزىندەگى باس اينالۋ تومەن ارتەريالىق قىسىممەن نەمەسە گليۋكوزا جەتىسپەۋشىلىگىمەن بايلانىستى بولۋى مۇمكىن.
باس اينالسا، نە ىستەۋ كەرەك؟
باس اينالعان كەزدە، ەڭ الدىمەن وتىرۋ كەرەك. بۇل قۇلاۋ جانە زاقىم الۋ قاۋپىن ازايتادى. مۇنداي كەزدە جاعدايىڭىزدى جاقسارتۋعا كومەكتەسەتىن جاتتىعۋلار بار.
براندت-داروفف جاتتىعۋى
توسەكتەن تۇرعاندا باسىڭىز اينالىپ كەتسە، سىزگە بۇل ءادىس قاجەت بولادى. اسىقپاي تۇرىپ، سودان سوڭ تابان ەدەنگە ءتيىپ تۇراتىنداي ەتىپ ديۆانعا نەمەسە وتىرعىشقا وتىرۋ كەرەك. سودان سوڭ ءبىر جاققا قاراي 45 گاردۋسقا ەڭكەيىپ، سول كۇيدە 30 سەكۋند تۇرۋىڭىز كەرەك. سودان سوڭ باستاپقى كۇيگە كەلىپ، جاتتىعۋدى ەكىنشى جاققا جاساڭىز. بۇل جاتتىعۋدى كۇنىنە ەكى رەت تاڭەرتەڭ جانە ۇيىقتار الدىندا جاساۋ ۇسىنىلادى.
فوستەر جاتتىعۋى
بۇل جاتتىعۋدى ورىنداۋ ءۇشىن ءتورت اياقتاپ تۇرۋ كەرەك. توبەگە قاراڭىز، سودان سوڭ ماڭدايىڭىز ەدەنگە تيگەنشە جايلاپ باسىڭىزدى تومەن ءتۇسىرىڭىز. سودان سوڭ باسىڭىزدى سولعا بۇرىپ، وسى قالىپتا تۇرىڭىز. كەيىن باس قالپىن وزگەرتپەستەن، ونى ارقا دەڭگەيىنە دەيىن كوتەرىڭىز. وسى كۇيدە 30 سەكۋند تۇرىڭىز. بۇل جاتتىعۋدى كەلەسى جاققا قايتالاۋعا بولادى. سونداي-اق ونى بىرنەشە رەت جاساۋعا بولادى. ءبىراق ءار جاتتىعۋ اراسىندا 10-15 مينۋت دەمالۋ كەرەك.
اقپارات دەرەككوزى: https://massaget.kz/layfstayl/Zdorove/77677/