الەمدى جايلاعان سوعىستى كورە تۇرا ءوز سەزىمىمدى انمەن جەتكىزگىم كەلدى - ديماش قۇدايبەرگەن

استانا. قازاقپارات - مەن ءۇشىن ادامنىڭ قانداي ۇلتتان ەكەنى ماڭىزدى ەمەس. ءبارىمىز ءبىر قۇدايدىڭ بالاسىمىز. ءۇندىستانداعى كينوفەستيۆالدەن كەيىن تىڭدارماندارى مەن ب ا ق وكىلدەرىنىڭ ساۋالدارىنا جاۋاپ بەرگەن ءانشى ديماش قۇدايبەرگەن وسىلاي مالىمدەدى، دەپ حابارلايدى قازاقپارات ءتىلشىسى.

باسپاءسوز كونفەرەنسياسىندا جانكۇيەرلەرى ديماش قۇدايبەرگەنگە «ءان ارقىلى حالىققا قانداي دا ءبىر ويدى جەتكىزۋگە بولاتىنىنا سەنەسىز بە؟» دەگەن ساۋال قويدى.

«وسىدان ءۇش جىل بۇرىن، سول 25 شاماسىندا «ءبىر اسپان تاعدىرى» دەپ اتالاتىن شىعارما جازعان بولاتىنمىن. بۇل جوبا ارقىلى الەمدە بولىپ جاتقان كوپ سوعىستى كورە تۇرا سوعان قاتىستى ءوز سەزىمىمدى جەتكىزگىم كەلدى. الەمدە ءبىر- بىرىمىزگە قۇرمەت كورسەتۋدىڭ قانشالىقتى ماڭىزدى ەكەنىن، ءبىر- ءبىرىمىزدى قالاي ءسۇيۋ كەرەكتىگىن كورسەتۋىمىز كەرەك. جۋرناليستەر مەنەن سوعىس تۋرالى كوزقاراسىمدى ءجيى سۇرايدى. مەن ءۇشىن جامان ۇلت جوق. ماعان ادامنىڭ قازاق، ءۇندىس، امەريكالىق، قىتاي، ۋكراين، فرانسۋز، وزبەك، قىرعىز نەمەسە ورىس ۇلتىنان ەكەنى ماڭىزدى ەمەس. ءبىز ءبارىمىز ءبىر قۇدايدىڭ بالاسىمىز. سوندىقتان 25 جاسىمدا وسىنداي جوبا جاسادىم»، - دەپ جاۋاپ بەردى ديماش قۇدايبەرگەن.

سونىمەن قاتار، كونفەرەنسياعا قاتىسۋشىلار ونەر يەسىنەن قايدان شابىت الاتىنىن سۇرادى. ديماش قۇدايبەرگەن بۇل قۇبىلىستىڭ تىلسىم ەكەنىن ءمالىم ەتتى.

«مىنا الەمدە بولاتىن قۇبىلىستىڭ ءبارى جاراتقان يەمىزدەن. ءبىزدىڭ تالانتىمىز بەن دارىنىمىز بىزگە تيەسىلى ەمەس، قۇدايعا تيەسىلى. ءان نەمەسە سسەناري جازعان كەزدە شابىت قايدان كەلەتىنىن ءالى كۇنگە تۇسىنە الماي كەلەمىن. ونى مەن ءدوپ باسىپ، وسىنداي ساتتە، وسىنداي كوڭىل- كۇيدە عانا كەلەدى دەسەم، وتىرىك بولادى. ءتىلسىم، ءوز باسىم تۇسىنبەيمىن»، - دەپ تۇيىندەدى وتاندىق ءانشى.

ەسكە سالاي كەتەيىك، كەشە الەمدىك دەڭگەيدەگى ءانشى ديماش قۇدايبەرگەن شاڭحاي ىنتىماقتاستىق ۇيىمىنا مۇشە ەلدەر كينوفەستيۆالىنە قاتىسۋ ءۇشىن ءۇندىستانعا ساپارمەن بارعانىن حابارلاپ ەدىك.

اتالعان كينوفەستيۆال مۋمباي قالاسىندا 27-قاڭتاردا باستالىپ، 31- قاڭتارعا دەيىن جالعاسادى. كينوفەستيۆال بارىسىندا ش ى ۇ ەلدەرىنەن 57 فيلم ۇسىنىلادى.

ديماش قۇدايبەرگەن وندا قازاقستان اتىنان قازىلار القاسىنىڭ قۇرامىندا بولادى.

اۆتور

ءاليحان اسقار