وڭتۇستىك كورەيا سولتۇستىك كورەيامەن شەكارادا قاتەلەسىپ، پۋلەمەتتان وق اتتى

چحۋنچحون. رەنحاپ - قازاقپارات – وڭتۇستىك كورەيالىق سولدات وقۋ-جاتتىعۋ كەزىندە سولتۇستىك كورەيامەن شەكارادا ابايسىزدا پۋلەمەتتەن وق اتىپ جىبەردى.

اسكەريلەر تەز ارادا سولتۇستىك كورەياعا حابار جىبەرىپ، وق ادەيى اتىلماعانىن جەتكىزگەن، دەپ حابارلايدى قازاقپارات رەنحاپ اگەنتتىگىنە سىلتەمە جاساپ.

وڭتۇستىك كورەيا اسكەريلەرى شىعىستاعى كانۆوندو پروۆينتسياسىنداعى كورەيا شەكاراسىنا جاقىن ماڭدا اسكەري بولىمشەنىڭ وقۋ-جاتتىعۋى كەزىندە، سەنبى كۇنى ساعات 18:27 دە پۋلەمەتتەن ءتورت رەت وق اتىلعانىن مالىمدەدى.

وقتىڭ ءبارى اسكەري دەماركاتسيالىق شەكارانىڭ وڭتۇستىك بولىگىنە تۇسكەن، زاقىم كەلگەنى تۋرالى اقپارات جوق. وقۋ-جاتتىعۋ كەزىندە وق اتىلاتىنى جوسپارلانباعان.

رەسمي تۇلعالاردىڭ سوزىنشە، اسكەري بولىمشە سولتۇستىك كورەياعا بىرنەشە رەت وق ادەيى اتىلماعانىن راديو ارقىلى حابارلادى. دەسە دە توتەنشە جاعدايعا دايىندىعىن كۇشەيتتى.

«سولتۇستىك كورەيا جاقتان ەرەكشە ەشتەڭە بايقالمايدى، وقيعانىڭ ناقتى قالاي بولعانى تەرگەلىپ جاتىر»، - دەدى بولىمشە وكىلى.

2020-جىلدىڭ مامىرىندا سولتۇستىك كورەيادان وڭتۇستىك كورەيانىڭ دەميليتاريزاتسيالانعان ايماعىنىڭ ورتالىق بولىگىندەگى كۇزەت ورنىنا ءتورت وق ءتۇستى، وڭتۇستىك كورەيا اسكەرى جاۋاپ رەتىندە وق جاۋدىرۋعا ءماجبۇر بولدى.

بۇل وڭتۇستىك جانە سولتۇستىك كورەيا اراسىنداعى ۇزاق ۋاقىت تىنىشتىقتان كەيىنگى اتىس ەدى. 2018-جىلدىڭ قىركۇيەگىندە قول قويىلعان اسكەري كەلىسىم بويىنشا، ەكى كورەيا ءبىر-بىرىنە دەگەن قاستاندىق ارەكەتتەرىن توقتاتىپ، شيەلەنىستى ازايتىپ، سەنىمدى ۇلعايتۋ تۋرالى كەلىسكەن بولاتىن.

ۇزىندىعى 250 جانە ەنى 4 شاقىرىم بولاتىن دەمەليتاريزاتسيالانعان اۋماق الەمدەگى ەڭ كۇشتى شەكارالاردىڭ ءبىرى سانالادى. وسى جەر باسەكەلەس كورەيالار اراسىنداعى جانجال ورنىنا ءجيى اينالاتىن ەدى.